2 წლის წინ HBO Max-ის რებრენდინგის შემდეგ მხოლოდ Max დაგვიტოვეს, ახალი ნათელი ლურჯი და თეთრი ლოგოთი. ახლა კი ვიგებთ, რომ Warner Bros Discover-ის მფლობელობაში არსებული სტრიმინგის სერვისი კიდევ აახლებს ლოგოს. ამჯერად ლურჯს მეტალის ეფექტის მქონე თეთრი და შავი ლოგო ანაცვლებს.
მიუხედავად იმისა, რომ Max HBO-ს და სხვა Warner Bros Discovery-ის ბრენდების კონტენტს მოიცავს, იქნება ეს Adult Swim, Animal Planet, Cartoon Network, CNN Films Discovery თუ TNT, ახალი ლოგო მაინც HBO-ს მიამსგავსეს. ამ უკანასკნელს კი ისეთი ტოპ შოუები უკავშირდება, როგორებიცაა The White Lotus, The Sopranos და Succession.
ამგვარად, არც უნდა გაგვიკვირდეს, რომ Max-ის ახალი ლოგოც HBO-ს ბრენდის შავ-თეთრ ფერთა პალიტრას იმეორებს და a-ში ზუსტად ისეთ წრეს გვაჩვენებს, როგორიც HBO-ს O-ში გვხვდება.
უნდა აღინიშნოს, რომ სტრიმინგის ინდუსტრიაში საკმაოდ დიდი კონკურენციაა, სწორედ ამიტომ ცდილობს ინდივიდუალური ბრენდები ვიზუალური იდენტობების განახლებას. სურთ, ლურჯი ლოგოებით სავსე ინდუსტრიაში გამორჩეული ადგილი დაიკავონ და ზუსტად ამ გზას ადგას Max-იც. ასე ბრენდის პრემიუმ ასპექტს აძლიერებს, თუმცა, ნაკლებ აქცენტს აკეთებს ხელმისაწვდომობაზე.
Max-ის მიხედვით, ფერის ცვლილება უფრო დიდი განახლების დასაწყისია… მართალია, ახალი ლოგო შავ-თეთრში იქნება წარმოდგენილი, მაგრამ განახლებული ფერთა პალიტრა, რომელიც ლოგოს აპლიკაციებსა და მარკეტინგულ მასალებში მეტ მოქნილობას შესძენს, სავარაუდოდ, უფრო მეტ ფერს შემოგვთავაზებს, რასაც მომდევნო თვეებში ზუსტად გავიგებთ.
