ჩიკაგოში CosMc’s-ს გამოჩნდა, მაკდონალდსის ახალი სივრცე, ე. წ. ქვებრენდი, რომელიც უფრო მეტად სასმელებსა და წასახემსებლებზე იქნება ფოკუსირებული. აქ არც ბურგერებია, არც კარტოფილი და არც ადგილები, რომ მიირთვათ. Bubble tea-ით (boba), საუზმისთვის სენდვიჩებითა და 4-ხაზიანი დრაივითაა წარმოდგენილი. როგორც McDonald’s-ის CEO კრის კემპჩინსკი ამბობს: „CosMc’s მცირე ფორმატის კონცეფციაა მაკდონალდსის დნმ-ით, მაგრამ თავისი უნიკალური ინდივიდუალიზმით“.
სწრაფი კვების გიგანტისთვის CosMc’s ახალ, შეუსწავლელ ბაზრის სეგმენტებზე გასვლის შანსს ნიშნავს. ფოკუსი ეფექტურობისა და მომხმარებლებისთვის კიდევ უფრო მორგებული გამოცდილებისკენ ინაცვლებს. ე. წ. ქვებრენდების მშვენიერება კი იმაში იმალება, რომ მას აქვს უნარი, აითვისოს ახალი ტრენდები და პრეფერენციები ისე, რომ მთავარი ბრენდის მემკვიდრეობაც არ დაჩრდილოს. ამგვარად, ოქროს თაღების ნოსტალგიასაც იზიარებს და ახალ თავსაც წერს სარესტორნო გამოცდილებაში, რაც იდეალური ბალანსია ძველსა და ახალს შორის.
ეს იქ ყოფნასაც ეხება, სადაც მომხმარებლები არიან, როგორც ფიზიკური, ისე ფსიქოგრაფიული კუთხით. დიახ, მაკდონალდსმაც კარგად იცოდა, რომ ბოლო წლების მანძილზე ყავა მსუბუქი წასახემსებლით ყველა სარესტორნო ქსელის მოგებიანი ფორმულა გახდა, რაც CosMc’s-ის ბაზარზე გამოჩენის ერთ-ერთ მიზეზად ითვლება. თუმცა უფრო მეტად იგი Starbucks-სა და Dunkin’-ს შეგვიძლია მივამსგავსოთ…
სახელი კი იმ უცხოპლანეტელის თილისმიდან მოდის, რომელიც მაკდონალდსმა პირველად 1987 წელს გაგვაცნო. შესაბამისად, ბრენდში მკაფიოდ შეიმჩნევა რეტროფუტურიზმის დეტალები, რომლებიც 80-იან წლებს უკავშირდება. რაც შეეხება ლოგოს, მის ფერს კომპანია CosMc’s Blue-ს უწოდებს და თუ კარგად დააკვირდებით, შეამჩნევთ, რომ თავზე ოქროს თაღების ნახევარიც აქვს.
ხოლო მაგიდების, სკამებისა და სხვა სარესტორნო დანადგარების არარსებობას, მაკდონალდისთვის ნახშირბადის კვალის, ხარჯებისა და ოპერაციული კომპლექსურობის შემცირებას ნიშნავს. თუმცა, როგორც კომპანია ამბობს, ეს საბოლოო ვერსია არ არის, სატესტო რეჟიმშია, სასწავლო ლაბორატორიაა, რომელიც საჭიროების შემთხვევაში რაღაცებს გააუმჯობესებს. წლის ბოლომდე კი ტეხასში 10 ასეთი საპილოტე ლოკაციის დამატებას აპირებენ.
McDonald’s-ის მიერ CosMc’s-ის გახსნა კვლავ აძლიერებს თავის პოზიციებს, რომ მხოლოდ სწრაფი კვების ქსელის გიგანტი კი არა, ბრენდია, რომელიც ვითარდება, ადაპტირდება და თავისი წვლილი შეაქვს გლობალური კვების კულტურის ბაზრის ჩამოყალიბებაში. მართალია, დრო გვაჩვენებს, რამდენად წარმატებული იქნება ახალი კონცეფცია, მაგრამ მარკეტინგული თვალსაზრისით, ეს უკვე შესანიშნავია…