როცა ფსიქიკურ ჯანმრთელობას პრობლემა ექმნება, სამუშაო დღის გატარება ჩვეულებრივზე ბევრად რთულია ხოლმე. თუ თქვენი დატვირთვა ამძაფრებს შფოთვას, დეპრესიას ან ფსიქიკური ჯანმრთელობის სხვა სირთულეებს ქმნისც ცვ, ეს ყოველთვის არ არის სამუშაოს მოცულობის ბრალი. ზოგჯერ ეს იმიტომ ხდება, რომ თქვენი სამუშაო დღე არ არის განაწილებული სათანადოდ, რათა შეესაბამებოდეს თქვენს ბუნებრივ რიტმს ან ფსიქიკური ჯანმრთელობის გამოწვევებს.
თქვენი სამუშაო დღის ეფექტურად სტრუქტურირება დაგეხმარებათ მრავალი სირთულის მოგვარებაში, დეპრესიითა და შფოთვით დაწყებული ADHD-ითა და ბიპოლარული აშლილობით დასრულებული. არ არსებობს ფსიქიკურად ჯანსაღი სამუშაო დღის ერთი კონკრეტული რეცეპტი. ის, რაც თქვენთვის იქნებოდა ეფექტური, დაფუძნებული უნდა იყოს თვითშემეცნებაზე, ექსპერიმენტებსა და თქვენი საჭიროებების სხვების საჭიროებებთან დაბალანსებაზე.
ეს სტრატეგიები შეგიძლიათ გამოიყენოთ ფსიქიკური ჯანმრთელობის გამოწვევებთან გასამკლავებლად.
შფოთვა და დეპრესია
იმის მიუხედავად, თქვენი შფოთვა ან დეპრესია ქრონიკულია თუ მოკლევადიანი, ამან შეიძლება გამოიწვიოს გარკვეული სიტუაციების თავიდან არიდება და პროკრასტინაციისკენ მიდრეკილება. მაგალითად, თქვენ შეიძლება იგრძნოთ ზედმეტი მგრძნობელობა ნებისმიერი გარემო ფაქტორის მიმართ, რომ ვიღაც არ არის კმაყოფილი თქვენი მუშაობით. ასევე შეგიძლიათ თავიდან აიცილოთ ამ საკითხის განხილვა, უშუალოდ დალაპარაკებისა და მოგვარების მაგივრად. თუ ასე გეჩვენებათ, იფიქრეთ როგორ დაალაგოთ თქვენი დღის სტრუქტურა, რომ თავიდან აირიდოთ საქმის გადადება. მაგალითად, შექმენით მოკლე ვადები პროექტში შემავალი ეტაპების პატარ-პატარა ნაბიჯებისთვის და არა ერთიანი ვადა მთელი საქმისთვის. შეგიძლიათ გქონდეთ განსაზღვრული დრო დღის მანძილზე, როდესაც გადადგამთ სულ მცირე ერთი ნაბიჯს იმ დავალების შესრულებისკენ, რომელსაც თავს არიდებთ.
ADHD
ფსიქიკური ჯანმრთელობის პრობლემის დროს ადამიანებს უფრო მეტად უჭირთ დაგეგმვა და ვრცელი სურათის დანახვა. ეს დროებითია ისეთი პრობლემების შემთხვევაში, როგორიცაა დეპრესია, მაგრამ უფრო ქრონიკულია ისეთი მოცემულობისას, როგორიცაა ADHD. თუ დაგეგმვისას გადატვირთული ხართ, ეცადეთ სხვებს მიმართოთ დასახმარებლად. მაგალითად, სთხოვეთ კლიენტს განსაზღვროს ვადები პროექტის თითოეული ეტაპისთვის, ერთად დაგეგმვა თქვენი განრიგის თანმიმდევრულ ნაწილად აქციოს.
ბიპოლარული აშლილობა
განწყობის ცვლილების პრობლემის მქონე ზოგიერთ ადამიანს, განსაკუთრებით ბიპოლარული აშლილობისას, ძალიან უჭირს, როდესაც მათი რიტმი დარღვეულია – მაგალითად, თუ გთხოვენ ცვლაში მუშაობას ან დილით ადრე გამგზავრებას კონფერენციაზე. თუ თქვენ გჭირდებათ თანმიმდევრული განრიგი თქვენი ფსიქიკური ჯანმრთელობის ხელშეწყობისთვის, იფიქრეთ იმაზე, როგორ დააზუსტოთ თქვენს ხელმძღვანელთან, როგორი ადაპტაცია არის შესაძლებელი.
გამოიმუშავეთ ჩვევები სამსახურთან დაკავშირებით
ჩვევების გამომუშავება იმასთან დაკავშირებით, თუ როგორ მუშაობთ – მათ შორის, როგორ ასრულებთ სიღრმისეულ, ფოკუსირებულ სამუშაოს – დაგეხმარებათ იგრძნოთ თქვენი ცხოვრებისა და განრიგის კონტროლი.
რატომ? თანმიმდევრული რუტინა ჩვენს დღეებს ორგანიზებულობას მატებს და კონტროლის გრძნობას აძლიერებს. ჩვენი ტვინი ეჩვევა ქცევების თანმიმდევრულ შესრულებას და საბოლოოდ იწყებს ამის ავტოპილოტზე კეთებას. ჩვეულებრივი მაგალითი იმისა, თუ როგორ ხდება ქცევები ავტომატური: ავტომობილის სწავლიდან რამდენიმე თვეში ჩვენ ყველანი ვქოქავთ მანქანას, ვიმაგრებთ უსაფრთხოების ღვედს, ვათავისუფლებთ მუხრუჭს, შემდეგ ვიყურებით სარკეებში – ამას ვაკეთებთ ფიქრის გარეშე. იგივე მოხდება თქვენი პროდუქტიულობის ჩვევებთან დაკავშირებით, თუ თანმიმდევრული იქნებით, თუ როდის და სად აკეთებთ თქვენს საქმეს. თუ ღრმა, ფოკუსირებულ სამუშაოს შეასრულებთ დღის ერთსა და იმავე მონაკვეთში, მაგალითად, დილის 10 საათიდან შუადღემდე, ამ ჩვევის შენარჩუნება დროთა განმავლობაში უფრო ადვილი და ავტომატური გახდება, თუნდაც იმ დღეებში, როდესაც საუკეთესოდ ვერ გრძნობთ თავს.
შექმენით რუტინები დავალებების შესასრულებლად, ვადების გათვალისწინებით
რეგულარულად გამოყავით დრო ამ ტიპის მცირე ადმინისტრაციული ამოცანებისთვის. იქნება ეს კოლეგასთან საუბრის განახლება კვირების წინანდელი თანამშრომლობის შესახებ, თუ საბოლოო შეხვედრის დაგეგმვა ექიმთან ან თერაპევტთან, ადმინისტრაციულ ამოცანებს დიდი გონებრივი ენერგია მიაქვს. ეს ის მომენტია, როცა იცით, რომ საქმე თქვენი გასაკეთებელია და ამავდროულად, მას არ ასრულებთ. თან ეს ფიქრები სულ მეორდება.
დაასვენეთ გონება
მცდარია აზრი, თითქოს მთელი დღე უნდა ვიყოთ კონცენტრირებულები და დაძაბულები, საქმის საკეთებლად. ეს შეუძლებელიცაა და არასწორი პრაქტიკაც. უფრო სწორი იქნებოდა, თუკი ღრმა ფოკუსირებასა და მოდუნებას შეანაცვლებთ ერთმანეთს. ასე ძალებს მოკლე ვადაში აღიდგენთ და შემოქმედებით ენერგიასაც სწრაფად დაიბრუნებთ. იმის ნაცვლად, რომ აიძულოთ თქვენი ტვინი შეასრულოს დავალებები მიყოლებით, მიეცით მას საშუალება დაისვენოს და განაგრძოს საქმის კეთება მას შემდეგ, რაც გარკვეული ხნით პროდუქტიული იქნებით.
წყარო: HBR
