in

„ყოველდღიურად, 3000-ზე მეტ მომხმარებელს ვემსახურებით” – რა შეიცვალა menu.ge-ში Foodpanda-ს მიერთების შემდეგ

1 აგვისტოს Menu Group-მა შეიძინა Foodpanda-ს ოპერაციები საქართველოში, რის შემდეგაც დაიწყო ამ ორი კომპანიის შერწყმა. ორი კომპანიის გაერთიანების პროცესი რთული და შრომატევადი საკითხია. გარდა ამისა, უნდა აღინიშნოს, რომ ინტერნეტსივრცეში ხშირად გვხვდება მომხმარებელთა უკმაყოფილების გამომხატველი კომენტარები, რომელიც ამ ორი კომპანიის შეერთებასა და menu.ge-ს მომსახურებას ეხება. საინტერესოა, როგორ რეაგირებენ მათზე კომპანიაში, რა ნაბიჯები იდგმება menu.ge-ს მხრიდან, მომსახურებასთან დაკავშირებული პრობლემების აღმოსაფხვრელად, როგორი იყო ორი ონლაინ სერვისის შერწყმის პროცესი და როგორ იყენებენ Foodpanda-ს ყოფილი თანამშრომლები საკუთარ გამოცდილებას უკვე menu.ge-ში. აღნიშნულ კითხვებზე მარკეტერს Menu Group-ის აღმასრულებელმა დირექტორმა – სტეპან ასლანიანმა უპასუხა:


M: როგორი იყო Menu.ge-სა და Foodpanda-ს შერწყმის პროცესი?
შერწყმის პროცესი იყო საკმაოდ შრომატევადი და ჩემი აზრით, ასეც უნდა ყოფილიყო. ამგვარი ცვლილება ძნელად გადასატანია ორივე მხარისთვის. ნებისმიერი კომპანიისთვის, როცა ერთ დღეში შენი ოპერაციების რაოდენობა 50 %-ით იზრდება, პლუს, აქამდეც არც ისე მოდუნებულ რეჟიმში მუშაობდი, რამდენადაც არ უნდა შეემზადო ამისთვის, მაინც რთულია. Foodpanda არის საერთაშორისო ბრენდი, ჩვენ არ გვქონდა უფლება მათი სახელით გვესარგებლა, ამიტომაც, აუცილებელი იყო მისი მომსახურების გათიშვა. Foodpanda-ს თითოეულ თანამშრომელს შევთავაზეთ ემუშავათ ჩვენთან. შერწყმის პროცესი მიმდინარეობდა მთელი თვის განმავლობაში, რადგან არც ისე მცირე კომპანია იყო Foodpanda და დღეისათვის, მთელი „თრანზიშენ” პროცესი შეგვიძლია ვთქვათ, რომ დასრულებულია. შეთავაზებები, გარდა თანამშრომლებისა, ეხებოდათ რესტორნებსაც, რომლებიც აქამდე მხოლოდ Foodpanda-სთან თანამშრომლობდნენ. ჩვენმა გუნდმა შეასრულა დიდი სამუშაო, ამ თვის განმავლობაში და განაგრძობენ მომსახურების გაუმჯობესების მიზნით მუშაობას. ხოლო, გაზრდილი მომხმარებელთა რაოდენობის პირობებში, ჩვენ უკვე გავაკეთეთ რამდენიმე განახლება შიდა ბიზნეს პროცესებში, პროგრამის გაუმჯობესებისა და ვებსაიტის მთელი სამუშაო პროცესის ავომატიზაციის კუთხით. ცვლილებები გათვლილია მომსახურების ხარისხის გასაუმჯობესებლად.

M: როგორი იყო ყოველდღიურად, შემკვეთების საშუალო რაოდენობა Foodpanda-ს შესყიდვამდე და როგორ შეიცვალა ეს მაჩვენებელი ორი კომპანიის შერწყმის შემდეგ?
შერწყმამდე დაახლოებით 2000 ადამიანს ვემსახურებოდით. ეს არ არის შეკვეთის რაოდენობა, მხოლოდ შემკვეთის რაოდენობაა. აღსანიშნავია, რომ საქართველოს მასშტაბით 350 ობიექტთან ვთანამშრომლობთ და 40 000-ზე მეტი სახეობის პროდუქტის არჩევანი გვაქვს საიტზე. რაც შეეხება კომპანიების შეერთების შემდგომ მონაცემს, დღეისათვის, ყოველდღიურად, 3000-ზე მეტი ადამიანი იკვებება menu.ge-ს დახმარებით, ყოველდღიურად, 3000-ზე მეტ მომხმარებელს ვემსახურებით. ამ წუთისთვის, ჩვენთან მუშაობს 160 ადამიანზე მეტი და კიდევ აქტიურად ვეძებთ კადრებს სხვადასხვა პოზიციებზე. დაინტერესებულ პირებს შეუძლიათ ეწვიონ ჩვენს საიტს.

საინტერესოა, როგორ იყენებენ „ფუდპანდას” ყოფილი თანამშრომლები საკუთარ გამოცდილებას უკვე Menu.ge-ში მუშაობისას

ფუდპანდას ყოფილი თანამშრომელი, ნინო მოსულიშვილი – პროდაქტ მენეჯერი menu.ge
პანდაში ვმუშაობდი დაარსების დღიდან, შესაბამისად, კარგად ვიცი მისი ძლიერი და სუსტი მხარეები. გარდა ამისა, ვიცით რა ცვლილებები უნდა განვახორციელოთ აპლიკაციის მხრივ Menu.ge-ში. ვცდილობთ, ეს გამოცდილება შევაჯეროთ და გამოვიყენოთ იმისათვის, რომ შევქმნათ სრულფასოვანი სერვისი მომხმარებლის კმაყოფილებისთვის. ჩვენ გვყავს ორი ტიპის მომხმარებელი, რესტორანი და კლიენტი, რომელიც ამ რესტორანში ჩვენი მეშვეობით უკვეთავს საკვებს.ეს ცვლილებები მიმართულია ორივე მხარის მომსახურების გაუმჯობესებაზე. რაც ბაზარზე ხარისხს გააუმჯობესებს. მუდმივად ვმუშაობთ ახალი აპლიკაციების შემოტანა/განვითარებაზე და ახალი პროგრამების დანერგვაზე, რაც თავის მხრივ გააუმჯობესებს მომსახურების ხარიხს. რა თქმა უნდა, ჩვენ ვვითარდებით ყოველდღიურად, მიდის მოლაპარაკებები დეველოპერებთან, გვინდა გავაზიაროთ და გამოვიყენოთ ჩვენი გამოცდილება, რომელიც „ფუდპანდაში” მუშაობისას გვქონდა.”

M: უნდა აღინიშნოს, რომ ინტერნეტსივრცეში ხშირად გვხვდება Menu.ge-ს მომსახურებით უკმაყოფილო მომხმარებლების კომენტარები. როგორ რეაგირებთ მათზე და რა განმარტებას გააკეთებდით მათთან დაკავშირებით?
მადლობელი ვართ თითოეული კლიენტის, რომლებიც კონკრეტულად გვითითებენ, თუ რა არის გამოსასწორებელი აპლიკაციის, პროგრამის, პროდუქტის და მომსახურების მხრივ. ჩვენ ამას ყოველთვის ყურადღებით ვეკიდებით. ყოველთვის ველოდებით ჩვენი კლიენტებისგან უკუკავშირს. დღეისათვის, ყოველდღიურად, დაახლოებით, 3000 ადამიანზე მეტს ვემსახურებით, შესაბამისად, მუდმივად ვმუშაობთ ავტომატიზაციის პროცესისა და მომსახურების ხარისხის გაუმჯობესებაზე. 

M: როგორია menu.ge-ს სტატეგია არსებულ პრობლემებთან საბრძოლველად?
ჩვენ ვმუშაობთ, რომ გავაუმჯობესოთ ჩვენი სერვისი. ეს უწყვეტი და მუდმივი პროცესია რომელიც არასდროს მთავრდება, მაგალითად, ჩვენი გაყიდვების დეპარტამენტის ძირითადი ფუნქცია რესტორნებთან მუშაობა, მათთან ურთიერთობის მოწესრიგება და ახალი ობიექტების დამატებაა. ჩვენს ინტერესშია, პარტნიორმა ობიექტმა ხარისხიანად, სწორად და დროულად მოგვიმზადოს საკვები, საჭიროებისამებრ შეფუთოს, არ აურიოს შეკვეთა და გაითვალისწინოს კერძი ხახვით უნდა იყოს თუ მის გარეშე. ვმუშაობთ შეკვეთების ავტომატიზაციაზე, რომ მოთხოვნა ავტომატურად აისახოს რესტორანში. ასე, მეტი შანსია თავიდან ავიცილოთ შეცდომის დაშვება. ვცდილობთ, არც ერთი პრობლემა დაგვრჩეს ყურადღების მიღმა, გადაუჭრელად. ჩვენი მთავარი სტრატეგია ჩვენი დეპარტამენტების კომპლექსური მოქმედებაა, ამა თუ იმ პრობლემის გადასაჭრელად თუ მომსახურების გასაუმჯობესებლად.

M: როგორ აისახა Foodpanda-სა და Menu.ge-ს გარიგება ქართულ ელექტრონულ კომერციაზე?
ამ გარიგების შედეგად, შეიცვალა ელ. კომერცია საქართველოში. მათ, ვისაც არ სმენოდა ამ სფეროს შესახებ, გაიგო მასზე. ახლა შეიცვალა კურსი და ჩვენ გარკვეული წვლილი მიგვიძღვის ამ განვითარებაში. ნებისმიერი კომპანია, რომელიც დაკავებულია ელ. კომერციით ავითარებს ამ სფეროს. უფრო მეტი ხალხი იღებს მონაწილეობას ამ პროცესში, იღებს და იყენებს ამ გამოცდილებას სხვა, ახალი კომპანიების შესაქმნელად. ჩვენ ვიმყოფებით მომხმარებლისა და ელ. კომერციის ევოლუციის ეპოქაში, ამიტომ, Menu.ge აპირებს სწრაფ რეაგირებასა და სიახლეების დაგეგმვას კომპანიაში.

M: როგორ შეაფასებდით თქვენთვის კონკურენტულ სერვისებს  საქართველოში?
კონკურენტებს რაც შეეხება, ჩვენ მათი არსებობა ძალიან გვიხარია, ისინი არსებობენ და ჩვენ ღირსეულად გავუწევთ მათ კონკურენციას, დავაკვირდებით მათ ნამუშევარს და თუ ისინი რაღაც ღირებულს შექმნიან, ჩვენც მივიღებთ ამას მხედველობაში.

M: ამ ეტაპზე, რა სიახლეები და გეგმები აქვს menu.ge-ს?
პირველ რიგში, უნდა ითქვას, რომ ჩვენი მომსახურება, თბილისის, რუსთავისა და ბათუმის შემდეგ, 1 სექტემბრიდან, ხელმისაწვდომი გახდა ქუთაისშიც და ვმუშაობთ პარტნიორი რესტორნების რაოდენობის გაზრდაზე რეგიონებშიც. რაც შეეხება სამომავლო გეგმებს, რესტორნებთან დაკავშირებით გვაქვს პროექტი, ასევე განვიხილავთ ალტერნატიული და ინოვაციური მიტანის სერვისის განვითარების გზებს.

[R]

SQUISH BRA – ნაჭრის, არასტანდარტული ბიუსტჰალტერების ქართული სტარტაპი

ნაბეღლავი ლაიმით ალუმინის ქილაში!