როგორც Merck & Co. აცხადებს, მისმა ექსპერიმენტულმა პრეპარატმა პოსპიტალიზაციისა და სიკვდილიანობის შემთხვევები გაანახევრა იმ ადამიანებს შორის, ვინც ბოლო დროს დაინფიცირდა Covid-19-ით. ამიტომაც, ორგანიზაცია ჯანდაცვის წარმომადგენლებს მისი გამოყენების ნებართვას სთხოვს.
თუ Merck & Co. მართლაც მიიღებს პრეპარატის მოხმარებაში ჩაშვების უფლებას, ეს დიდი წინ გადადგმული ნაბიჯი იქნება პანდემიის დაძლევის თვალსაზრისით. კორონავირუსის ყველა პრეპარატი, რომელიც ამჟამად დამტკიცებულია აშშ-ში, ინტრავენურ შეყვანას ან ინექციას საჭიროებს.
Merck & Co.-მ და მისმა პარტნიორმა Ridgeback Biotherapeutics-მა განაცხადეს, რომ პირველადმა შედეგების მიხედვით, პაციენტებს, რომლებმაც წამალი მოლნუპირავირი მიიღეს, ჰოსპიტალიზაციისა და სიკვდილიანობის გაცილებით დაბალი მაჩვენებელი ჰქონდათ. კვლევაში 775 ადამიანი მონაწილეობდა, როგორც შედარებით მსუბუქი, ისე შედარებით მძიმე სიმპტომებით. ამასთან, თითოეული მათგანი რისკის ქვეშ იმყოფებოდა, გამომდინარე ჯანმრთელობის თანმდევი პრობლემებიდან.
პაციენტებს შორის, რომლებიც პრეპარატს იღებდნენ, 7.3% იყო ჰოსპიტალიზირებული ან გარდაიცვალა 30 დღის შემდეგ. ხოლო პლაცებოს მიღების შემთხვევაში ეს მაჩვენებელი 14.1%-ს აღწევდა. სამედიცინო ექსპერტების დამოუკიდებელმა ჯგუფმა, რომელიც კვლევას ცდას აკვირდებოდა, ორგანიზაციას ურჩია, კვლევა ადრე შეეწყვიტათ, რადგან შუალედური შედეგები საკმაოდ ძლიერი იყო. ამ ეტაპზე კი კომპანიის აღმასრულებლები FDA-სთან აწარმოებენ დისკუსიას.
“შედეგებმა მოლოდინს გადააჭარბა. როდესაც ჰოსპიტალიზაციისა და სიკვდილიანობის შემთხვევები 50%-ით მცირდება, ეს მნიშვნელოვან კლინიკურ გავლენას გულისხმობს” – აღნიშნავს Merck & Co.-ს ვიცე-პრეზიდენტი, დინგ ლი. მართალია, გვერდითი მოვლენები ორივე ჯგუფს აღენიშნებოდა, თუმცა პლაცებოს შემთხვევაში ეს უფრო აშკარა და ხშირი იყო. საგულისხმოა ის ფაქტიც, რომ პრეპარატი ეფექტური არ იყო იმ პაციენტებისთვის, რომელთა ავადმყოფობის ფორმაც უკვე საგრძნობლად მძიმე იყო.
ცოტა ხნის წინ აშშ-მ უკვე დაამტკიცა ერთი ანტივირუსული პრეპარატი – რემდესივირი, Covid-19-ის საწინააღმდეგო პრეპარატი და დამატებით 3 წამალი, რომელიც გადაუდებელ შემთხვევაში უნდა იქნას გამოყენებული. თუმცა თითოეული მათგანი საავადმყოფოებში ინტრავენურად ან ინექციის სახით უნდა იქნას მიღებული. თანაც, დელტა ვარიანტის ზრდის პარალელურად, მათი მარაგი ამოიწურა.
ჯანდაცვის ექსპერტები, მათ შორის წამყვანი ამერიკელი ინფექციური დაავადების ექსპერტი დოქტორი ენტონი ფაუჩი, უკვე დიდი ხანია მოსახერხებელ აბებს ითხოვენ, რომელთა მიღებაც კორონავირუსის საწყისი სიმპტომების დროს იქნება შესაძლებელი. სწორედ ასეთი წამლები განიხილება ვირუსის მომავალი ტალღების შესაჩერებლად და პანდემიის გავლენის შესამცირებლად.
ზემოთ ხსენებული პრეპარატი ფერმენტის შეჩერებით მუშაობს, რომელსაც კორონავირუსი თავისი გენეტიკური კოდის და საკუთარი თავის გამეორებისთვის იყენებს. მან მსგავსი მოქმედება სხვა ვირუსების წინააღმდეგაც გამოავლინა.
აშშ-ს მთავრობამ პირობა დადო, რომ FDA-ს მიერ დამტკიცების შემთხვევაში პრეპარატის 1.7 მილიონ დოზას შეიძენს. კომპანიის გათვლებით, წლის ბოლომდე 10 მილიონი დოზის წარმოებაა შესაძლებელი, თუმცა ფასი ჯერჯერობით უცნობია.
