Meta დაბადების თარიღების გადამოწმებისთვის მხოლოდ მომხმარებლის მიერ შეყვანილ ინფორმაციას აღარ ენდობა და უფრო მაღალტექნოლოგიურ მიდგომაზე გადადის. იმისთვის, რომ კომპანია გლობალურ რეგულაციებსა და Digital Services Act-ის მოთხოვნებს მოერგოს, იწყებს AI-სისტემის გამოყენებას, რომელიც ცდილობს განსაზღვროს, ნამდვილად იმ ასაკის არის თუ არა ადამიანი, რასაც საკუთარ პროფილში უთითებს.
სისტემა მხოლოდ ფორმაში ჩაწერილ თარიღს არ ეყრდნობა, ის პოსტებსა და კომენტარებში არსებულ მინიშნებებსაც აანალიზებს. მაგალითად:
დაბადების დღის მილოცვებს;
სკოლის კლასებთან ან ასაკთან დაკავშირებულ კომენტარებს;
სხვა დეტალებს, რომლებიც შეიძლება მიანიშნებდეს, რომ მომხმარებელი რეალურად უფრო პატარაა.
ყველაზე დიდი განხილვა გამოიწვია ვიზუალურმა ანალიზმა. Meta-ს AI ახლა ზოგად ფიზიკურ მახასიათებლებს სწავლობს, როგორიცაა: სიმაღლეს, ძვლების სტრუქტურას, სხეულის განვითარების ნიშნები. ამით ის ადგენს, ადამიანი ჯერ კიდევ ზრდის პროცესშია თუ არა.
კომპანია ამბობს, რომ ეს არ არის სახის ამოცნობის ტექნოლოგია და სისტემა კონკრეტული ადამიანის იდენტიფიკაციას არ ცდილობს. მათი თქმით, ეს უფრო „ციფრული ასაკის გამომცნობ“ სისტემას ჰგავს, რომელიც ჩონჩხის განვითარების ნიშნებს იყენებს.
თუ AI დაასკვნის, რომ მომხმარებელი შესაძლოა 13 წლამდე იყოს, ანგარიში იბლოკება, სანამ მომხმარებელი ასაკს არ დაადასტურებს.
ხოლო თუ სისტემა ფიქრობს, რომ ადამიანი 13-15 წლისაა: ანგარიში ავტომატურად გადადის Teen Account რეჟიმში, მკაცრდება შეტყობინებების შეზღუდვები და კონტენტის ფილტრებიც უფრო ძლიერდება.
მიუხედავად იმისა, რომ Meta ამას უსაფრთხოების მიზნით აკეთებს, ბევრი ადამიანი კონფიდენციალურობის საკითხებზე ღელავს. კრიტიკოსები ამბობენ, რომ თუნდაც Meta ამას „ბიომეტრიულ მონაცემებს“ არ უწოდებდეს, იდეა მაინც საკმაოდ ახლოს დგას ასეთ პრაქტიკასთან და დისკომფორტს იწვევს.
კითხვები ჩნდება სიზუსტეზეც, რადგან ზოგჯერ ზრდასრულებსაც აქვთ უფრო პატარა შეხედულება. ასე პროგრამამ შეიძლება შეცდომით არასრულწლოვნებად აღიქვას მომხმარებელი და საკუთარი ანგარიშის დასაბრუნებლად პირადობის ატვირთვა მოსთხოვოს.
Meta ასევე ცდილობს ინდუსტრიაში ასაკის გადამოწმების ახალი სტანდარტი დაამკვიდროს. კომპანიას სურს, რომ ასაკის ვერიფიკაცია აპლიკაციის ჩამოტვირთვის ეტაპზევე მოხდეს App Store-სა და Google Play-ში, რათა პასუხისმგებლობა მხოლოდ ცალკეულ აპებზე არ იყოს.
