როგორც ჩანს, მარკ ცუკერბერგს სარეკლამო სივრცის სრულიად შეცვლა დაუსახავს მიზნად — ევროპელი მომხმარებლებისგან თანხმობის მოპოვებას აპირებს მანამ, სანამ პერსონალიზებულ რეკლამებს აჩვენებს. ეს ცვლილება კი გადახვევაა მეტას წინა განცხადებიდან, რომ თითქოს, მონაცემების დამუშავება მხოლოდ კომპანიის ინტერესების სასარგებლოდ ხდება… ანუ რა გამოდის? იმოქმედებს ეს ამბავი რეკლამის განმთავსებლებსა და ციფრულ სარეკლამო ეკოსისტემაზე?
ცვლილების მარეგულირებელი ქარი
რეგულატორებში ამ ცვლილებამ მეტასგან მონაცემების დამუშავების ლეგალურობაზე წარმოშვა კითხვები. მაგალითად, ირლანდიის მარეგულირებლებმა მეტასგან თანხმობის გარეშე მომხმარებლების მონაცემების გამოყენება გააპროტესტეს სარეკლამო მიზნებისთვის, რასაც თან ჯარიმებიც ახლდა. შედეგად, მეტამაც არსებული მიდგომის შეცვლა გადაწყვიტა…
რეკლამის განმთავსებლები ნდობაზე უნდა ფოკუსირდნენ
მეტას განცხადებით, მარკეტერებისთვის ეს ცვლილება მონაცემებზე ორიენტირებული სტრატეგიებიდან ნდობაზე დაფუძნებული ჩართულობისკენ გადასვლას გულისხმობს. ამასთან, პირველი მხარის მონაცემებზე და ბრენდის ავთენტურ კომუნიკაციაზეც იზრდება მოთხოვნა. ეს ცვლილებები კი ხაზს უსვამს კლასიკური მარკეტინგული დისციპლინების მნიშვნელობას, იქნება ეს სეგმენტირება, სამიზნე ჯგუფის განსაზღვრა, პოზიციონირება თუ მარკეტინგის შესაბამისობა მომხმარებელთა კონფიდენციალურობის მოთხოვნასთან.
უნდა ვადევნოთ თუ არა თვალი?
როგორც ამბობენ, მეტასგან ეს ნაბიჯი ციფრული რეკლამის ეკოსისტემის ფართო ტრანსფორმაციის უბრალო პატარა ნაწილად უნდა ჩავთვალოთ. თუნდაც იმიტომ, რომ Apple-ის მიერ App Tracking Transparency-ის (ATT) ფუნქციის შემოღებამ მომხმარებლებს საშუალება მისცა, თავადვე განსაზღვრონ, მისცემენ თუ არა აპლიკაციას თვალყურის დევნების საშუალებას. ახლა კი მეტას ცვლილება ამ ყველაფერს კომპლექსურობის კიდევ ერთ ფენას მატებს.
ხოლო იმის გამო, რომ ლანდშაფტი სწრაფად იცვლება, მოგვიწოდებენ ჩვენი მარკეტინგული სტრატეგიები რეგულაციებს შევუსაბამოთ და ამასთან, არც კრეატიულობა დავივიწყოთ.
კონფიდენციალურობის საკითხები — მომხმარებელთა კონტროლის საფუძველი
მეტას გადაწყვეტილება ესადაგება ტრენდს მომხმარებელთა თანხმობის მოპოვებასა და კონფიდენციალურობაზე. ზოგადად, ისინი თავს იკავებენ პერსონალური ინფორმაციების ონლაინ გაზიარებისგან, რეპუტაციულ პლატფორმებზეც კი, თანაც ჰაკერობისა და თაღლითობების შემთხვევებიც მზარდი გახდა… ხოლო ევროკავშირის მომხმარებელთა თანხმობის მოპოვება მათ აძლევს ძალაუფლებას, თავადვე აკონტროლონ თავიანთი ონლაინ გამოცდილება თუ პერსონალური მონაცემები.
რის ფასად დაგვიჯდება კონფიდენციალურობა?
გასულ წელს მეტას შემოსავლების 97% სწორედ რეკლამირების დამსახურება იყო… ისიც მართალია, რომ ამ გადაწყვეტილებით კომპანია მომხმარებლების უსაფრთხოებისკენ დგამს ერთ ნაბიჯს, მაგრამ შეიძლება ამან მის შემოსავლებზე იმოქმედოს. თუნდაც იმიტომ, რომ ევროკავშირის ბაზარზე პერსონალიზებული რეკლამის მოდელი ფინანსური გამოწვევების წინაშე დგას…
ეს ცვლილება იმასაც გულისხმობს, რომ მომხმარებლებს მეტი კონტროლი ექნებათ თავიანთ მონაცემებსა და კონფიდენციალურობაზე, აქ კი რეკლამის განმთავსებლებმა ეს ახალი გარემოება ფრთხილად უნდა განიხილონ და მომხმარებლებზე ორიენტირებულ მიდგომასაც მიმართონ. დიახ, ეს გადაწყვეტილება ხაზს უსვამს მომხმარებლებთან ავთენტური ურთიერთობების ჩამოყალიბებას, პირველი მხარის მონაცემებით სარგებლობას და განვითარებადი კონფიდენციალურობის რეგულირების საკითხების მიღებას.
ამგვარად, თუ სარეკლამო სამყარო ვითარდება, ბიზნესებსაც მოუწევთ ადაპტირება, რათა იპოვონ ახალი შემოსავლები ზრდისა თუ წარმატებისთვის…
