Meta Twitter-ის ალტერნატივის გამოშვებას რომ გეგმავდა, ამაზე რამდენიმე კვირის წინ მოგიყევით, ახლა კი უკვე ოფიციალურად აცხადებენ, რომ Twitter-ის მეტოქე ახალი აპლიკაცია ხუთშაბათს ჩაეშვება — Threads წინასწარი შეკვეთით Apple-ის App Store-ში იქნება ხელმისაწვდომი, რომლის დაკავშირებას ინსტაგრამთანაც შეძლებთ.
გავრცელებული ვიზუალური მასალით მარტივად მიხვდებით, რომ იგი ტვიტერის მსგავსად გამოიყურება, აღწერაც თითქმის იგივეა — „ტექსტებზე დაფუძნებული სასაუბრო აპლიკაცია“. მარკ ცუკერბერგი და ილონ მასკი სერიოზულ კონკურენტებად იქცნენ ერთმანეთისთვის, იმდენადაც კი, რომ ეს ფიზიკურ ბრძოლაში გადაზარდეს და გასულ თვეს რინგზე ასვლაზე შეთანხმდნენ… მართალია, დაზუსტებით ვერ ვიტყვით, რამდენად სერიოზულად უდგებიან ამ საკითხს, მაგრამ ფაქტი ფაქტად რჩება.
მასკის ბოლოდროინდელი ცვლილებები, მათ შორის ტვიტების ნახვის რაოდენობის შეზღუდვაც, მომხმარებლებს სხვა პლატფორმებზე გადასვლისკენ უბიძგებს… აქ კი მეტას შეთავაზება საკმაოდ დროულიც შეიძლება აღმოჩნდეს. თანაც, როგორც ჩანს, Threads-ის აპლიკაცია უფასო უნდა იყოს, ზედმეტი შეზღუდვების გარეშე პოსტების ნახვასთან დაკავშირებით.
„აპლიკაცია იქნება ადგილი, სადაც ადამიანები ერთად განიხილავენ ყველაფერს დაწყებული იმ თემებიდან, რომლებიც ადარდებთ და დამთავრებული იმ საკითხებით, რომლებიც ტრენდულია“, — აცხადებენ App Store-ში.
საინტერესოა ისიც, რომ Threads თქვენი ტელეფონიდან მონაცემებს აითვისებს — მდებარეობის, შესყიდვებისა თუ ისტორიის ჩათვლით, რამაც, წესით, მეტად პერსონალიზებულ კონტენტამდე უნდა მიგვიყვანოს.
მართალია, Twitter-ს ჯეკ დორსის BlueSky-ს სახით უკვე ჰყავს სხვა კონკურენტიც, მაგრამ Threads-ის გამოჩენა უკვე რეალური საფრთხეა პლატფორმისთვის. აქ არ დაგავიწყდეთ, რომ მარკ ცუკერბერგი კარგად არის ცნობილი სხვა კომპანიების იდეების ათვისებითა და მათი საუკეთესოდ წარმოჩენით — მეტას Reels TikTok-ის ასლია, Stories კი Snapchat-ის ანალოგს გვთავაზობს…
