თითქოს Meta-ს სხვა პრობლემები არ ჰქონდეს, მათ ახლა ლოგოს გამო ედავებიან. შვეიცარიულმა ბლოკჩეინის კომპანიამ, სახელწოდებით Dfinity, Meta-ს წინააღმდეგ სასამართლოში სარჩელი შეიტანა. მიზეზი მათი უსასრულობის სიმბოლოთი გამოხატული ლოგოების მსგავსებაა. Dfinity-ს კი სურს, რომ Meta-მ კონკრეტული ნიშანი აღარ გამოიყენოს, რადგან ეს მათ რეპუტაციას სასწორზე დებს…
„თუ მომხმარებლები Dfinity-ს Meta-ს ცუდ ონლაინ კონფიდენციალურობის სისტემასთან დააკავშირებენ, კომპანია კომპიუტერების შემუშავებისა და მომხმარებლების მოზიდვის კუთხით სერიოზულად დაზარალდება“, — ვკითხულობთ განცხადებაში.
მაგრამ რამდენად რეალურია Meta-ს ლოგოს ცვლილება? იურისტების აზრით, ეს ჩვეულებრივ შეიძლება მოხდეს, თუმცა ნაკლებად სავარაუდოა. აქ ყველაფერი მომხმარებლების აღქმაზეა დამოკიდებული, იმაზე თუ რამდენად დამაბნეველია ეს ორი ლოგო მათთვის… ამასთან, უსასრულობის სიმბოლო საკმაოდ გავრცელებულია. ლოგოები, შესაძლოა, დიზაინითა და ფორმით განსხვავდებოდეს, მაგრამ ისინი მაინც ყოველდღიური სიმბოლოს ვერსიებს წარმოადგენს. ეს კი ასუსტებს იმ მტკიცებულებას, რომ ამ სიმბოლოს კონკრეტულ კომპანიასთან დააკავშირებენ.
“სახელი Dfinity, სავარაუდოდ, რეგისტრირებული სასაქონლო ნიშნის ყველაზე გამორჩეული ნაწილია და Meta-ს რომ მსგავსი სახელი გამოეყენებინა, მაგალითად, კომპანიისთვის Sfinity დაერქვა, ეს სერიოზული დავის საფუძველი უფრო მეტად იქნებოდა“, — განმარტავს ჯონ ლი, პროფესორი.
იმის მიუხედავად Dfinity მოახერხებს თუ არა ამ დავის მოგებას, დიდი ალბათობით, Meta-ს სასაქონლო ნიშნის დაცვის საკითხი მაინც კითხვით ნიშნის ქვეშ დადგება.
„შესაძლოა, აშშ-ს საპატენტო და სავაჭრო ნიშნების ოფისმა აღმოაჩინოს, რომ Meta-ს ლოგო არ არის გამორჩეული და მეტ მტკიცებულებას მოითხოვს, რათა მომხმარებლებმა სიმბოლო კომპანიასთან უფრო მეტად დააკავშირონ“, — აცხადებს ლი.
