მაქსიმალურად ბევრმა მატერიალიზმმა სამყაროში მინიმალიზმისადმი მოთხოვნილება გააჩინა, რადგან ბუნებრივი რესურსების ამოწურვა და გარემოს დაბინძურება მწვავე პრობლემად იქცა. მინიმალისტური ცხოვრების სტილი მხოლოდ აუცილებელზე კონცენტრირებას გულისხმობს და ერთ-ერთი პრაქტიკული გზაა ეკოლოგიური პრობლემების დაძლევისთვის.
„ნაკლები ნარჩენი“ – მეტი ეკოლოგიური ცნობიერება
რაც უფრო ნაკლებ ნარჩენს ვქმნით, მით უფრო ვიცავთ ბუნებას ზედმეტი ნაგვის წარმოშობისგან. ჩვენს რუბრიკაში არაერთხელ გვისაუბრია ნარჩენების შემცირებაზე და იმაზე, თუ როგორ შეიძლება ეკომეგობრული პროდუქტების შეძენა, ხელახალი გამოყენება და ჩანაცვლება.
ყველა პროდუქტს, რომელსაც ჩვენ ვყიდულობთ, აქვს გარემოსდაცვითი ღირებულება. რესურსების მოპოვებიდან და წარმოებიდან დაწყებული, შეფუთვითა და ტრანსპორტირებით დამთავრებული, ერთი ნივთის გადაადგილება ტოვებს ნახშირბადის კვალს, მოიხმარს ენერგიას და ხშირად წარმოქმნის ნარჩენებს.
ამიტომ, როდესაც ხშირად ისეთ ნივთებს ვყიდულობთ, რომლებიც დიდად არ გვჭირდება, ან მსგავსი უკვე გვაქვს სახლში და შეგვიძლია, ხელახლა გამოვიყენოთ, უნდა ვიცოდეთ, რომ ჩვენი, თუნდაც, ერთი ადამიანის მიღებული გადაწყვეტილება, ერთიანი ჯაჭვის ნაწილია – ნაკლები მოთხოვნა ნედლეულზე, ქარხნებიდან სამრეწველო გამონაბოლქვის შემცირება, შეფუთვის ნარჩენების, განსაკუთრებით პლასტმასის ნარჩენების შემცირება, ტრანსპორტირებასთან დაკავშირებული გამონაბოლქვის შემცირება.
მოკლედ რომ ვთქვათ, ნაკლების ყიდვა ნიშნავს პლანეტის შეზღუდულ რესურსებზე ნაკლები ზეწოლის მოხდენას. ამისთვის კი ცოდნა და სწორი ეკოლოგიური ცნობიერებაა საჭირო.
ნარჩენების შემცირება
თანამედროვე ცხოვრებამ შექმნა „ერთჯერადი ნარჩენების კულტურა“, სადაც ნივთები ხშირად იყრება. ეს იწვევს ნაგავსაყრელების გადავსებას, მიკროპლასტიკურ დაბინძურებას და ნარჩენების გადამუშავებით გამოწვეული სათბურის გაზების გამოყოფის ზრდას.
მინიმალიზმი კი ხელს უწყობს უკვე არსებულის შენახვის, ხელახლა გამოყენებისა და შეკეთების იდეას.
მინიმალიზმი ყოველდღიურ ცხოვრებაში
სამზარეულოთი დაწყებული გარდერობით დამთავრებული, მინიმალიზმი შეიძლება ჩვენი ცხოვრების ყველა ასპექტში იყოს ინტეგრირებული. მარტივი პრაქტიკები, როგორიცაა საკვების ნარჩენების შემცირება ან კაფსულური გარდერობის შექმნა, შესანიშნავი მაგალითებია.
ავირჩიოთ ხარისხი და არა რაოდენობა
მინიმალისტები ხშირად ირჩევენ მაღალი ხარისხის, გამძლე ნივთებს, რომლებიც უფრო დიდხანს მიჰყვებათ, იაფი პროდუქტების ნაცვლად, რომლებიც ადვილად ფუჭდება და ხშირად შეცვლას საჭიროებს. ეს მიდგომა ამცირებს განმეორებითი წარმოებისა და განადგურების საჭიროებას, რაც თავის მხრივ ამცირებს გარემოზე ზემოქმედებას.
მაგალითად, ერთი კარგად შეკერილი ქურთუკის 10 წლის განმავლობაში ფლობა უფრო მდგრადი გადაწყვეტილებაა, ვიდრე ყოველ ზამთარს ახალი, იაფფასიანი ქურთუკის ყიდვა.
კითხვები, რომლებიც უნდა დავსვათ
მინიმალიზმის ერთ-ერთი მთავარი ფილოსოფია განზრახვაა. შეძენამდე უნდა დავსვათ შემდეგი კითხვები:
- ნამდვილად მჭირდება ეს?
- როგორ დამზადდა?
- რა მასალები იქნა გამოყენებული?
- გამოვიყენებ თუ არა მას ხანგრძლივად?
თუ ყველა ამ მიდგომით ვიცხოვრებთ, მივიღებთ უკეთეს სამყაროს, რომელიც მომავალ თაობებსაც ჯანსაღ გარემოს შესთავაზებს.
სივრცე ბუნებისთვის
პარადოქსულად ჟღერს, მაგრამ ბუნებას დედამიწაზე სივრცე უკვე თითქმის აღარ რჩება. მინიმალიზმი მხოლოდ მატერიალურ ნივთებს არ ეხება. ის ხშირად ვრცელდება ჩვენს სახლებზე, ქალაქებზე და მიწის გამოყენებაზეც კი. პატარა სახლები, მჭიდრო განაშენიანება, მეტი მწვანე ზონა თითოეულ შენობასთან, ურბანული გავრცელების შემცირება – ეს ყველაფერი დაეხმარება ბუნებას, იარსებოს და გაიხაროს ჩვენ გარშემო.
მინიმალიზმი ესთეტიკაზე ან ტენდენციაზე მეტია. ის ძლიერი, პრაქტიკული პასუხია იმ გარემოსდაცვით გამოწვევებზე, რომელთა წინაშეც დღეს ვდგავართ. სიმარტივისა და მიზანმიმართული ცხოვრების წესის მიღებით, ჩვენ ვაუმჯობესებთ არა მხოლოდ პირად, არამედ პლანეტის კეთილდღეობასაც. ისინი, ვინც უკვე თავის თავზე გამოცადა მინიმალისტური ცხოვრების წესი, გვეუბნებიან, რომ „ნაკლები, სინამდვილეში, მეტს ნიშნავს”. მდგრადი ჩვევების დანერგვა ჩვენს ყოველდღიურობაში და არასაჭირო ნივთების ნაკლებად გამოყენება მწვანე სამყაროს შექმნის საუკეთესო გზაა.
რუბრიკას გარემოზე ზრუნვაზე წარმოგიდგენთ Wasteless.
