რუბრიკა ავტოისტორიამ ბევრი საინტერესო ბრენდი, ავტომობილის მოდელი თუ ადამიანი გაგვაცნო. რამდენი საავტომობილო ბრენდიც არსებობს, თითოეულ მათგანს მინიმუმ 10 ადამიანი მაინც უდგას უკან, რომლებმაც ამ ბრენდის შექმნაში დიდი მონაწილეობა მიიღეს.
დღევანდელი სტატიაც ასეთ სახელებს გვსურს, მივუძღვნათ. ამჯერად, MINI-ს რამდენიმე შემქმნელს გაგაცნობთ.
სერ ალეკ ისიგონისი
სერ ალეკ ისიგონისი ცნობილია თავისი ინოვაციური მიდგომით საავტომობილო ინჟინერიაში, განსაკუთრებით, მისი როლით MINI-ს დიზაინსა და განვითარებაში, ავტომობილის, რომელიც გახდა ბრიტანული საავტომობილო დიზაინის სიმბოლო.
ისიგონისმა კარიერა Morris Motors-ში 1930-იან წლებში დაიწყო. მუშაობდა სხვადასხვა პროექტზე, მათ შორის Morris Minor-ზე, რომელიც გახდა ერთ-ერთი ყველაზე პოპულარული და გამძლე მოდელი.
1956 წელს სუეცის კრიზისის საპასუხოდ, რამაც საწვავის დეფიციტი გამოიწვია, ბრიტანეთის მოტორ კორპორაციამ ისიგონისს დაავალა შეექმნა პატარა ავტომობილი, რომელიც საწვავს ეფექტურად მოიხმარდა. შედეგად, 1959 წელს გამოვიდა MINI, Austin Seven-ისა და Morris Mini-Minor-ის სახელებით. მისი ინოვაციური დიზაინი გამოირჩეოდა განივი ძრავით და წინა წამყვანი თვლებით, რაც ახალ სტანდარტებს ადგენდა მცირე ზომის ავტომობილების დიზაინში.
ჯონ კუპერი
ჯონ კუპერმა, ავტომობილების ცნობილმა დიზაინერმა და ინჟინერმა, გადამწყვეტი როლი ითამაშა Mini Cooper-ის განვითარებაში, რამაც მნიშვნელოვანი გავლენა მოახდინა MINI-ს ბრენდის მემკვიდრეობაზე.
თავდაპირველად კუპერი სარბოლო ავტომობილების ინჟინერიაში იყო ჩართული, სადაც საკმაოდ წარმატებულადაც საქმიანობდა, თუმცა მას ჰქონდა ხედვა – შეექმნა კომპაქტური ავტომობილები.
სწორედ ამ პერიოდში მან გაიცნო სერ ალეკ ისიგონისის მიერ შექმნილი მოდელი, რომელიც უზრუნველყოფდა შესანიშნავ მართვასა და სტაბილურობას, ამიტომ კუპერმა ისიგონისს პარტნიორობა შესთავაზა, რათა ერთად შეემუშავებინათ MINI-ს მაღალი ხარისხის ვერსიის შექმნის იდეა. მიუხედავად იმისა, რომ ისიგონისი დასაწყისში სკეპტიკურად იყო განწყობილი, მათმა თანამშრომლობამ წინ წაიწია და მათ დაიწყეს MINI Cooper-ის მოდიფიკაციაზე მუშაობა.
პირველი, რაც ამ კოლაბორაციით წინა მოდელში გაუმჯობესდა, ძრავა იყო. კუპერის მოდიფიკაციები მოიცავდა ძრავის რეგულირებას მეტი სიმძლავრის გამომუშავებისთვის. თავდაპირველი 848cc ძრავა განახლდა 997cc ძრავით, რაც ზრდიდა სიმძლავრის გამომუშავებას.
გაზრდილი სიმძლავრის შესავსებად, კუპერმა ასევე განაახლა მუხრუჭები და საკისარი. ცვლილებები, ასევე, დიზაინის ფორმირებაშიც მოხდა. საკულტო იერსახის შენარჩუნებასთან ერთად, კუპერის ვერსია მოიცავდა დიზაინის დახვეწილ ცვლილებებს, რამაც გააძლიერა მისი სპორტული მიმზიდველობა.
ლეონარდ ლორდი
კიდევ ერთი მნიშვნელოვანი ფიგურაა ლეონარდ ლორდი. მან, ასევე, გადამწყვეტი როლი ითამაშა ორიგინალური MINI-ს შექმნასა და წარმოებაში. მისი გადაწყვეტილებები საკმაოდ ეფექტური იყო ბრენდის გამოცოცხლებაში.
ლეონარდ ლორდი იყო ცნობილი ბრიტანელი ინდუსტრიალისტი, რომელსაც ეკავა საკვანძო პოზიციები საავტომობილო ინდუსტრიაში. 1950-იანი წლების ბოლოს, როდესაც ბრიტანეთში ეკონომიური ავტომობილების შემოდინება დაიწყო ევროპის სხვა ქვეყნებიდან, ლორდი ბრიტანულიც პატარა ავტომობილის საჭიროებაზე დაფიქრდა.
1956 წელს მან წამოიწყო პროექტი მასებისთვის მცირე, ხელმისაწვდომი და ეფექტური ავტომობილის შესაქმნელად. სწორედ მისი დაწერილი ბრიფი გადაეცა ალეკ ისიგონისს, რომელმაც შემდეგ პროექტი განახორციელა. ბრიფი მოითხოვდა, რომ ავტომობილს შესძლებოდა ოთხი მგზავრის გადაყვანა, ყოფილიყო ეკონომიური არა მარტო საწვავის მოხმარების, არამედ საწარმოო ხარჯების თვალსაზრისითაც. შედეგად ისიგონისმა შექმნა ის MINI, რომელიც უკვე ვიხილეთ.
ფრენკ სტივენსონი
MINI-ს ბრენდის აღორძინებისა და თანამედროვე იერსახის მიცემაში ფრენკ სტივენსონს დიდი როლი აქვს ნათამაშები, როდესაც ის BMW-მ ხელახლა დანერგა 2000-იანი წლების დასაწყისში. ფრენკ სტივენსონი ცნობილი დიზაინერია, რომელსაც საკმაო გამოცდილება აქვს საავტომობილო ინდუსტრიაში. ის არაერთ ბრენდთან თანამშრომლობდა, მათ შორის, BMW-სთან. მისი სტილი ცნობილია ბრენდის ისტორიული მემკვიდრეობისა და ინოვაციის შერწყმით.
BMW-ს ახალი MINI პროექტის მთავარ დიზაინერად ფრენკ სტივენსონი 1990-იანი წლების ბოლოს დაინიშნა. მისი ამოცანა იყო კლასიკური MINI-ს ახლებურად წარდგენა, რომელიც უკვე 21-ე საუკუნის შესაფერისი იქნებოდა. აუცილებელი იყო თანამედროვე დიზაინისა და ტექნოლოგიების დაბალანსება ორიგინალის საკულტო ელემენტებთან, რასაც სტივენსონმა თავი შესანიშნავად გაართვა. ახალი MINI აერთიანებდა თანამედროვე საავტომობილო ტექნოლოგიასა და რეტრო ესთეტიკას.
გერტ ჰილდებრენდი
გერტ ჰილდებრენდი არის ავტომობილების დიზაინერი გერმანიიდან, რომელიც ცნობილია სხვადასხვა მწარმოებელთან მუშაობით. ის MINI Design-ის ხელმძღვანელი 2001 წელს გახდა და 2010 წლამდე ამ პოზიციაზე მუშაობდა.
როგორც MINI-ს მთავარი დიზაინერი, ჰილდებრენდი პასუხისმგებელი იყო MINI-ს ახალი მოდელების დიზაინსა და განვითარებაზე. თანაც, მისი მოღვაწეობა დაემთხვა ბრენდის მნიშვნელოვანი გაფართოების პერიოდს.
ჰილდებრენდმა ზედამხედველობა გაუწია MINI-ს რამდენიმე ახალი მოდელის შემუშავებასა და დანერგვას, რითაც გააფართოვა ბრენდი. ამ მოდელებში შედის: MINI Clubman, MINI Convertible, MINI Countryman და სხვადასხვა სპეციალური გამოშვება.
რუბრიკა ავტოისტორიას წარმოგიდგენთ GT Motors.
