ნდობა და ლოიალობა ბიზნესში ყოველთვის მთავარი იყო, მაგრამ არა იმდენად ღირებული, როგორც დღეს. თანაც ამისთვის აღარც დიდი სარეკლამო ბიუჯეტია საკმარისი… Edelman Trust Barometer-ის მიხედვით კი, მომხმარებელთა 67% წყვეტს პროდუქტის ყიდვას, თუ ის არ ენდობა კომპანიას. ეს მონაცემები Bain & Co-ს კვლევასთანაც შეგვიძლია გავაერთიანოთ, რომელიც გვაჩვენებს, რომ მომხმარებელთა შენარჩუნების მაჩვენებლების 5%-ით ზრდა სარგებლის 25%-ით გაუმჯობესებას უზრუნველყოფს, ზოგიერთ შემთხვევაში კი 95%-ითაც!
და რა უნდა გააკეთონ ბრენდებმა იმისათვის, რომ მომხმარებლები შეინარჩუნონ? ერთი პასუხი კუთვნილების გრძნობაა, ანუ საზოგადოების შექმნა, რაც სწორედ ის არის, რასაც მარკეტერები, განსაკუთრებით B2B ბიზნესში, გამოსადეგად თვლიან იმისათვის, რომ მომხმარებელთა სიყვარული მოიპოვონ და მათთან მჭიდრო კავშირებიც დაამყარონ.
ბრენდის საზოგადოების ძალა
მომხმარებელთა ჩართულობის გაძლიერება ცალკე გამოწვევას წარმოადგენს მარკეტერებისთვის… ბრენდის საზოგადოებები კი გვთავაზობს სივრცეს, სადაც მათ ინტერაქცია, გამოცდილებების გაზიარება და ერთმანეთისგან სწავლა შეუძლიათ. აქ კომპანიები მომხმარებლებს ბრენდისა და მისი პროდუქტების განვითარებაში საკუთარი წვლილი შეტანის საშუალებასაც კი აძლევენ. ამგვარად, სიახლოვის განცდაც იბადება და შეგრძნება, რომ მოსმენა ცვლილებების საწინდარი გახდება.
თქვენი საზოგადოება ძლიერ წყაროდ მოქმედებს საუკეთესო მომხმარებლების დასადგენად, რომელთან მუშაობაც ადვოკატირების პროგრამის ნაწილად შეგიძლიათ აქციოთ. ეს ენთუზიაზმი კი ამ საზოგადოების მიღმაც დამატებით გავლენასა და სარგებელს გთავაზობთ — მომხმარებელთა ადვოკატირება ეხმარება ბიზნესებს, შეამცირონ მათი შეძენის ღირებულება 7-ჯერ უფრო ეფექტურად…
აუდიტორია თუ საზოგადოება — ორმხრივი მარკეტინგი
ყველაფერთან ერთად, ადამიანების ონლაინ ქცევაც იცვლება. ჩვენ ინტერნეტის ადრეული დღეებიდან, როცა საზოგადოებები პატარა იყო და ფორუმებზე ფოკუსირდებოდა, მასობრივი საზოგადოებისკენ გადავინაცვლეთ. ყველაფერი დიდი გახდა, თუმცა იმის გამო, რომ ამ სივრცეებში ხმაურმაც მოიმატა, ადამიანები უბრუნდებიან უფრო პატარა სივრცეებს, სადაც მშვიდი კუთხე ხვდებათ. სწორედ ამან გამოიწვია Discord-ისა და Telegram-ის პოპულარობა, როცა Facebook-სა და LinkedIn-ზე ნიშ ჯგუფები მზარდი პოპულარობით სარგებლობს.
ამ ცვლილებას კი მომხმარებელთა მარკეტინგი ცალმხრივი კომუნიკაციიდან ორმხრივ დიალოგზე გადაჰყავს, რომელიც უფრო მნიშვნელოვან კავშირებსა და ღირებულ სივრცეს უზრუნველყოფს მომხმარებლებისთვის. ამიტომ, ნამდვილად გამოგადგებათ იმის გაგება, თქვენი მომხმარებლებიდან რომლები არიან აქტიურნი და რომელ არხებზე, ამასთან, ვის სჭირდება დახმარება. ამგვარად კი, მათთან პერსონალიზებული გზით ჩართვას შეძლებთ და შექმნით ჰაბს, სადაც მათ გამოცდილებებისა და ინსაითების გაზიარება შეეძლებათ. ხოლო იმისათვის, რომ შესანიშნავი საზოგადოება შექმნათ, ორი რამ გჭირდებათ — ავთენტურობა და მომხმარებელზე ორიენტირებულობა… დაბოლოს:
როგორ შევქმნათ საზოგადოება?
ძლიერი საზოგადოება თავისით ნამდვილად ვერ განვითარდება, ამას მიზანი სჭირდება, აქტიურობის საფუძველი და ჩართული მონაწილეები, კონტენტი, რომელიც საუბრების წამოწყებას უწყობს ხელს და ინტერესი, რომელიც ზრდას უზრუნველყოფს.
როგორც Distillery-ის ხელმძღვანელი სტივ ვინი ამბობს, „დაადგინეთ თქვენი საზოგადოება, იპოვეთ ადგილი მის ასაგებად, შექმენით კონტენტი, რომელიც დამუხტავს მას, გააქტიურეთ და ჩაერთეთ, მოუსმინეთ უკუკავშირს, თუ როგორ შეგიძლიათ გააუმჯობესოთ ეს საზოგადოება“.
ამგვარად, საზოგადოების შექმნა დიდ ძალისხმევას, მოსმენის უნარსა და სტრატეგიას მოითხოვს, მაგრამ შედეგი ამად ნამდვილად ღირს…
