ბიზნესის მხარდაჭერის მიზნით, თიბისი, VISA-სთან პარტნიორობით, პროექტ ბიზნეს დაჯილდოების ფარგლებში, შეხვედრების სერიას იწყებს, რომლის მიზანიც მცირე და საშუალო ბიზნესის განვითარების ხელშეწყობაა. პირველი პანელური დისკუსია კი იმ თემის ირგვლივ ჩატარდა, რომელიც თანაბრად ეხება ყველა ტიპის თუ მასშტაბის კომპანიას — „მომხმარებლის საუკეთესო გამოცდილება“.
აღნიშნულ პანელურ დისკუსიაზე სპიკერებმა არაერთი ბრენდის თუ კომპანიის შესახებ ისაუბრეს, რომლებიც მომხმარებლის გამოცდილების საუკეთესო და ცუდ ვერსიებს უკავშირდებოდა. ამავდროულად, მათ განიხილეს, რა როლს ასრულებს ამ ასპექტზე ზრუნვა ორგანიზაციისა და მისი კულტურის განვითარებაში. თანაც, თითოეული სპიკერი საქმიანობის სხვადასხვა სფეროდან შეირჩა, რაც დამსწრეებს იმის საშუალებას აძლევდა, რომ საკითხი განსხვავებული პერსპექტივებით დაენახათ: დავით ჯაფარიძე, თიბისის მომხმარებლის გამოცდილების მართვის ლიდერი; აკო ახალაია, მარკეტერის დამფუძნებელი და სილქროუდ ჯგუფის მარკეტინგის დირექტორი; არჩილ ფირიაშვილი, VELI.store-ის აღმასრულებელი დირექტორი და გიორგი ასათიანი, „ოკტოპუს ფიტნეს კლუბის“ დირექტორი.
„მომხმარებელი ბიზნესის ამომავალი წერტილია, ამით საზრდოობს ყველა კომპანია — კარგი გამოცდილების შექმნა იმის წინაპირობაა, რომ გაიზარდო და განვითარდე. ვისურვებდი საქართველოში ისეთი გამოცდილება იყოს მომხმარებლებისთვის, რომელიც სამაგალითო იქნება არა მხოლოდ ადგილობრივად, არამედ გლობალურადაც“, — აღნიშნავს დავით ჯაფარიძე, თიბისის მომხმარებლის გამოცდილების მართვის ლიდერი. სწორედ ეს სიტყვები აღწერს „მომხმარებლის საუკეთესო გამოცდილების“ ზუსტ მნიშვნელობას, თუ რა როლს ასრულებს ნებისმიერ კომპანიაში ამ მიმართულების განვითარება.
ობიექტურად თუ შევაფასებთ, კომპანიასა და მომხმარებელს შორის არსებული კომუნიკაცია ის არის, რაც ბიზნესის წარმატებას თუ წარუმატებლობას უზრუნველყოფს. ეს არის გადაკვეთის მთავარი წერტილი, როდესაც რეალურ გარემოში წყდება, რამდენად მისასალმებელი, დახვეწილი თუ დასახვეწია ამა თუ იმ ორგანიზაციას საქმიანობა.
„ძალიან მიხარია, რომ პანელური დისკუსიების სერია სწორედ ამ თემის განხილვით დაიწყო, რადგან ვფიქრობ, მომხმარებლის საუკეთესო გამოცდილება ის საწყისი წერტილია, რის გარშემოც კომპანიის განვითარება მიმდინარეობს. ოკტოპუსის მაგალითზეც რომ ვთქვა, გახსნამდე 4 თვის განმავლობაში ვაწარმოებდით ბაზრის კვლევას, რათა ზუსტად გვცოდნოდა, რა გამოცდილება ჰქონდათ ადამიანებს და ამჯერად როგორი იყო მათი მოლოდინები, რას ისურვებდნენ. მხოლოდ ამის შემდეგ დავიწყეთ ბიზნეს სტრატეგიის შემუშავება“, — განმარტავს გიორგი ასათიანი, „ოკტოპუს ფიტნეს კლუბის“ დირექტორი.
მართალია, მომხმარებლის საუკეთესო გამოცდილების რამდენიმე სიტყვით ახსნა რთულია და ძალიან ბევრ ფენას მოიცავს, მაგრამ გიორგი ასათიანის თქმით, კრიტიკულად მნიშვნელოვანი მაინც მუდმივი კომუნიკაციაა. უფრო კონკრეტულად, მომხმარებელმა არ უნდა იგრძნოს, თითქოს, მისი ხმა არავის ესმის… „პირიქით, უნდა გრძნობდეს, რომ მის უკუკავშირს, სურვილებს ითვალისწინებენ. თუნდაც ვერ მოხდეს რაიმეს დაკმაყოფილება, კომუნიკაციის გზით მაინც უნდა აუხსნან მიზეზი. მარტივად რომ შევაჯამოთ, კავშირი, სისწრაფე და ამ ორი პუნქტის რეალურ ქმედებებში გადმოტანა მომხმარებლის საუკეთესო გამოცდილების ფუნდამენტია“.
ვინაიდან, თიბისის მიზანია, ბიზნესს ხელი შეუწყოს განვითარებაში და მომხმარებელთან კომუნიკაციის საუკეთესო გზების ძიებაში, მთელ შეხვედრას მაგალითებზე დაფუძნებული, ინფორმაციული ხასიათი გასდევდა. „ვფიქრობ, ეს შეხვედრა ძალიან მნიშვნელოვანია, რადგან მცირე და საშუალო ბიზნესის წარმომადგენლებს საშუალება ეძლევათ, რეალურ პრაქტიკულ მაგალითებზე დაყრდნობით მიიღონ რჩევები. ზოგადად, ამ თემის ირგვლივ საუბარი ცნობადობას ამაღლებს, რა ეფექტს იძლევა მომხმარებლის გამოცდილებაზე ზრუნვა და მისი განვითარება“, — ამბობს არჩილ ფირიაშვილი, VELI.store-ის აღმასრულებელი დირექტორი.
როგორც დასაწყისში აღვნიშნეთ, მომხმარებლის გამოცდილებაზე ზრუნვა ნებისმიერი ტიპისა და მასშტაბის კომპანიას ეხება — შესაბამისად, დამსწრეთა შორის ისეთი ორგანიზაციების წარმომდგენლები იყვნენ, რომლებიც აქტიურად ზრუნავენ ამ მიმართულების განვითარებაზე ან ახლა იწყებენ დანერგვას.
თანაც, რადგანაც სპიკერების დისკუსიას კითხვა-პასუხის რეჟიმი მოჰყვა, ყველს ჰქონდა შესაძლებლობა, ისეთ საკითხებს ჩასძიებოდნენ, რომლებიც უშუალოდ მათ პრობლემებზე იყო მორგებული. კომენტარის აღებისას ერთ-ერთი მცირე ბიზნესის მფლობელმა ისიც გვითხრა, რომ მომხმარებლებთან არასწორი კომუნიკაცია ის მიზეზი აღმოჩნდა, რის გამოც უკვე 2 წელია, საქმიანობა საგრძნობლად შეუფერხდა — პანელურ დისკუსიაზე მიღებულ საჭირო ცოდნას კი სათავისოდ გამოიყენებს.
პანელური დისკუსიების შესახებ:
თიბისის ბიზნეს ნაკრების მომხმარებლებისთვის, 5 თვის განმავლობაში 5 შეხვედრა გაიმართება, რომლებსაც ბიზნეს დაჯილდოების სხვადასხვა ნომინაციის გამარჯვებულები, ფინალისტები, ჟიურის წევრები და თემის ექსპერტები გაუძღვებიან.
დისკუსიაზე სპიკერები განიხილავენ დაჯილდოების ნომინაციებს, რომლებიც ბიზნესის წარმატებისთვის საჭირო ღირებულებებს ქმნიან, ესენია: მომხმარებლის საუკეთესო გამოცდილება, სოციალური პასუხისმგებლობა, რეგიონების განვითარება და სხვა. თიბისის მიზანია, ბიზნესისთვის და მომხმარებლისთვის მნიშვნელოვანი თემების აქტუალიზაცია მოხდეს და სულ უფრო მეტმა ბიზნესმა დანერგოს საუკეთესო პრაქტიკა თავის საქმიანობაში.
