ბოლო წლებში საერთაშორისო ბაზარზე ღვინის ტრადიციულ მარკეტინგთან მიმართებით მნიშვნელოვნად შეიცვალა აღქმა. ამის ერთ-ერთი მაგალითია ძმებ ჩარლისა და ტომ ბრედლების მიერ 2021 წელს დაარსებული კომპანია Nouveau, რომელიც სამხრეთ აფრიკელ მეღვინეებთან მუშაობს, რათა დიდ ბრიტანეთში დაბალი ინტერვენციის ღვინოები შეიტანონ.
ამ ყველაფერში კი ერთ-ერთ საკვანძო როლს გრაფიკულ დიზაინთან ერთად, ღვინის სახელწოდებაც ასრულებს: New Theory. ეს უკანასკნელი რაღაც განსხვავებულის, აქამდე უცნობის დანერგვას მიემართება სიმბოლურად. ამავდროულად, „ძველი სკოლის“ ბრენდების ვიზუალური ენიდან სესხების ნაცვლად, თანამედროვე იდენტობა ცხოვრების წესით და კულტურული ძვრებითაა შთაგონებული — შედეგად, თითოეული ღვინის ბოთლზე დატანილია მინიმალისტური გამოსახულებები, რომელთაც თან ერთვის სახალისო და შესაბამისი წარწერები. „New Theory-ის თითოეული ბოთლი შექმნილია იმისთვის, რომ საკუთარი უნიკალური იდენტობა ჰქონდეს“, — აღნიშნავენ ჩარლი და ტომი.
