სკოლის ასაკიდან სხვადასხვა პროექტებში ვიყავი ჩართული და გაცნობიერებული მქონდა, რომ ციფრული სერვისებისა და ფინტექისკენ მინდოდა წასვლა, მიუხედავად იმისა, რომ ეს სფერო მაშინ განვითარებული არ იყო. 2013 წელი იყო, როდესაც „კონსტანტა“ ბანკში დავიწყე მუშაობა. ბიზნესის ადმინისტრირებაზე ვსწავლობდი და პირველ კურსს ვამთავრებდი. „კონსტანტაში“ ჩემი მეგობარი მუშაობდა. ხშირად მივდიოდი ხოლმე დასახმარებლად. შემდეგ, თავად მითხრა, კიდევ ერთ თანამშრომელს ეძებენო. გასაუბრებაზე ჩემი მეგობრის რეკომენდაციით მოვხვდი. 2-3 ეტაპის შემდეგ, ჩამაბარეს პლანშეტი და შევუდექი საქმეს. ეს იყო პირველი სამსახური, სადაც შტატში ვიყავი და ანაზღაურება მქონდა.
იმ პერიოდში, პირველი ელექტრონული ყულაბა „ინბოქსი“ გააკეთეს და ამ პროექტში ჩავერთე. ეს იყო ჩემთვის პირველი სამუშაო გამოცდილებაც და პირველი შეხებაც ციფრულ პროდუქტთან. „ინბოქსის“ მობილური ჯგუფის ოპერატორი ვიყავი. ჩემი ძირითადი ფუნქცია იყო ბანკის ტერიტორიის გარეთ ადამიანების დარწმუნება, გაეხსნათ ელექტრონული ყულაბა. სხვადასხვა მისამართზე დავდიოდით თბილისსა და რეგიონებში, ერთი ამოცანით – რაც შეიძლება მეტი ადამიანისთვის გაგვეხსნა ელექტრონული ყულაბა. საკმაოდ რთული იყო, რადგან სეგმენტს, რომელთანაც გვქონდა შეხება, საკმაოდ ეშინოდა ბანკების და გვიძნელდებოდა მათთვის ახსნა. თუმცა მიმაჩნდა, რომ ძალიან მნიშვნელოვან და ღირებულ საქმეს ვაკეთებდი.
პირველი სირთულე იყო ის, რომ ერთი მხრივ, რთულად სამუშაო სეგმენტი იყო და ბანკის გაგონება არ უნდოდათ, მეორე მხრივ, მაშინ ციფრული პროდუქტები არ იყო გავრცელებული და გვიძნელდებოდა აგვეხსნა, ზუსტად რას ნიშნავდა და როგორ უნდა გამოეყენებინათ, რადგან ხელშესახები ფიზიკური პროდუქტი არ იყო. წარმოიდგინეთ, როგორი იყო მომხმარებლის დარწმუნება, რომ ექნებოდა ვირტუალური ყულაბა, სადაც ფულის დაგროვება შეეძლებოდა. მთავარი დაბრკოლება, ალბათ, მაინც ჩემი პატარა ასაკი იყო, რის გამოც კიდევ უფრო რთულად მიმდინარეობდა კომუნიკაცია. თუმცა იმდენად მჯეროდა, რასაც ვაკეთებდი და იმდენად გულით ვაკეთებდი ჩემს საქმეს, ისეთი სიყვარულით ვეკიდებოდი, ვახერხებდი, რომ გუნდში გაყიდვებით მოწინავე ადგილზე ვიყავი.
საბოლოო ჯამში, პირველმა სამსახურმა გადამწყვეტი როლი ითამაშა ჩემს კარიერულ ზრდაში. ეს იყო ერთადერთი ადგილი, სადაც აბსოლუტურად სხვა კუთხით ვხედავდი მომხმარებლებს, მათ საჭიროებებს. ახლა, როდესაც ვსაუბრობთ ხოლმე UX როგორ გავაუმჯობესოთ, ვგრძნობ ეს მომხმარებლები სად არიან, რას აკეთებენ, როგორ იყენებენ ციფრულ პროდუქტებს. ამ საქმემ სულ სხვა კუთხით, ახლო რაკურსით დამანახა მომხმარებელი. ეს წამადგა მომდევნო სამსახურშიც, სადაც გაყიდვების ჯგუფი მებარა – ზუსტად ვიცოდი, გარე გაყიდვების თანამშრომლებს რა პრობლემა და საჭიროებები შეიძლება ჰქონოდათ, რადგან გამოვლილი მქონდა მათი მდგომარეობა. დამეხმარა პროდუქტის აღქმაშიც – როდესაც პროდუქტის განვითარებაზე მიფიქრია, სხვადასხვა სამსახურში, ის გამოცდილება გამხსენებია, რაც „კონსტანტაში“ გამოვიარე მომხმარებლებთან ურთიერთობისას. „კონსტანტაში“, დაახლოებით, 6 თვის განმავლობაში ვიმუშავე და სხვა სამსახურში გადავედი, კვლავ ციფრული პროდუქტების მიმართულებით.
ნიკა ჩილინდრიშვილი – TNET-ის პროდუქტების განვითარების ხელმძღვანელი
