Nikon-მა მიკროსკოპის ქვეშ გადაღებული საუკეთესო ფოტოები გამოაქვეყნა

ამბავი ასეთია — 2024 წლის Nikon Small World Competition-ის საუკეთესო ჯილდო თაგვის ტვინის სიმსივნური უჯრედების ინოვაციურმა სურათებმა მოიპოვა. ერთი შეხედვით, სურათები სამეცნიერო-ფანტასტიკური ჟანრის გეგონებათ, თუმცა სინამდვილეში უჯრედების აქტინს, მიკროტუბულებსა და ბირთვებს ასახავს. 

„ეს სურათი ამჟღავნებს, თუ როგორ მივყავართ უჯრედის ციტოჩონჩხის სტრუქტურის დარღვევას (სტრუქტურულ ჩარჩოსა და მიკროტუბულების სახელით ცნობილ „მაგისტრალებს“) ისეთ დაავადებებამდე, როგორებიცაა ალცჰაიმერი და ამიოტროფული გვერდითი სკლეროზი (ALS)“, — ვკითხულობთ პრესრელიზში. 

სურათების ავტორი დოქტორი ბრუნო სისტერნა გახლავთ, რომელსაც ამ პროცესში ერიკ ვიტრიოლი ეხმარებოდა. აღსანიშნავია, რომ Augusta University-ის მეცნიერებისგან ამ სურათების გადაღება უდიდეს მოთმინებას საჭიროებდა: 

„დაახლოებით სამი თვე გავატარე პროცესის სრულყოფაზე, რათა უჯრედების მკაფიო ხილვადობა გვქონოდა. მას შემდეგ, რაც უჯრედებს დიფერენცირებისთვის 5 დღე მივეცი, სწორი რაკურსი უნდა მეპოვა, სადაც დიფერენცირებული და არადიფერენცირებული უჯრედები ურთიერთქმედებდა. ამას მიკროსკოპის ქვეშ დაახლოებით 3 საათი დასჭირდა,  მოიცავდა ბევრ ცდასა და მუშაობის უამრავ საათს, რათა ყველაფერი წესრიგში ყოფილიყო“.

აღსანიშნავია, რომ წელს Nikon Small World Competition 50 წლის ხდება, კონკურსში კი 80 ქვეყნიდან 2100 ნამუშევარი იყო წარდგენილი. თუ ღონისძიების ორგანიზატორებს დავეყრდნობით: „ეს წამყვანი ფორუმია ფოტომიკროგრაფიაში ჩართული ხელოვნების, ცოდნისა და ფოტოგრაფიული ბრწყინვალების წარმოსაჩენად“. 

დანარჩენი თავად ნახეთ: