5 აგვისტოს Black Sea Arena Front Stage – კამპანია Starring Georgia-ს ფარგლებში ამერიკელ მუსიკოსსა და პროდუსერს Nile Rodgers-სა და მის ბენდს Chic-ს უმასპინძლებს.
4 გრემის მფლობელი Nile Rodgers დისკო მოძრაობის პიონერი და ერთ-ერთი ყველაზე გავლენიანი მუსიკალური პროდუსერია, რომელმაც პოპ-მუსიკის ტრაექტორია სამუდამოდ შეცვალა. 70-იან წლებში დაფუძნებულ ბენდ Chic-თან ერთად მან ისეთი საკულტო კომპოზიციები შექმნა, როგორებიცაა Le Freak, I Want Your Love, Good Times და სხვა, რომელთაც ფაქტობრივად საფუძველი ჩაუყარეს დისკო კულტურის აღორძინებას.
ცალკე აღნიშვნას იმსახურებს ნაილ როჯერსის, როგორც პროდუსერისა და მენტორის მოღვაწეობა, რისი შედეგიცაა Diana Ross-ის Upside Down, David Bowie-ის Let’s Dance, Madonna-ს Like a Virgin და Daft Punk-ის Get Lucky. ეს სია უსასრულოდ გრძელდება და სხვადასხვა დეკადას თუ კონტინენტს კვეთს, რაც კიდევ ერთხელ აჩვენებს ამერიკელი მუსიკოსის უნარს შექმნას ყველა თაობისთვის ღირებული მუსიკა.
ბილეთების ყიდვა უკვე შეგიძლიათ Black Sea Arena-ს ოფიციალურ ვებგვერდზე – BSA.ge. ბილეთის ფასი 100 ლარია, თუმცა FKJ-ის ღონისძიების ბილეთთან ერთად, ორივეს 150 ლარად შეიძენთ. ფრანგი მულტიინსტრუმენტალისტი FKJ, Black Sea Arena-ს Front Stage-ს Nile Rodgers & Chic-ის კონცერტის მეორე დღეს 6 აგვისტოს დაიკავებს.
Starring Georgia საქართველოს პრემიერ-მინისტრის, ირაკლი ღარიბაშვილის ინიცირებული კამპანიაა, რომელიც Black Sea Arena-ს გუნდთან ერთად ხორციელდება. ორწლიანი კამპანიის ფარგლებში, საქართველო მთელი „თანავარსკვლავედის“ მასპინძელი გახდება. ჩვენს ქვეყანას თანამედროვეობის ყველაზე აქტუალური არტისტები ეწვევიან, რომელთა მოსმენის საშუალება ქართველ მელომანებს აქამდე საკუთარ ქვეყანაში არ ჰქონიათ. მათ შორისაა: Imagine Dragons, The Killers, Nile Rodgers & Chic, FKJ, Damian Lazarus და All Day I Dream. ახალი კამპანიის ფარგლებში, Black Sea Arena-ს სცენის გარდა, კონცერტები შეკვეთილში, თბილისსა და სხვა ლოკაციებზე ჩატარდება.
დაგეგმილი კონცერტების ბილეთები ეტაპობრივად, ვებგვერდზე – BSA.ge – გაიყიდება.
[პარტნიორის კონტენტი]
