ეს ამბავი, კვირების განმავლობაში, არაოფიციალურად განიხილებოდა სხვადასხვა წრეში, თუმცა, გუშინ Nvidia-მ დაადასტურა, რომ SoftBank-ისგან ჩიპების მიმართულებით მომუშავე კომპანია ARM-ს ყიდულობს, გარიგების ფასი კი 40 მილიარდი დოლარია. აღნიშნული გარიგება ტექოლოგიურ კომპანია Nvidia-ს უფრო მეტ ძალაუფლებას სძენს, მაშინ, როცა სმარტფონებში, პერსონალურ კომპიუტერებსა თუ თვითმართვად მანქანებში ხელოვნური ინტელექტის ინტეგრირებას ეხება საქმე. მით უფრო ცხადია ეს ამბიცია, როცა გარიგების ფარგლებში, Nvidia აპირებს, ARM-ის მიერ დამზადებული CPU კემბრიჯში, AI სუპერკომპიუტერისა და შესაბამისად, დიდი პოტენციალის მქონე კვლევითი ცენტრის შესაქმნელად გამოიყენოს.
„ხელოვნური ინტელექტი ჩვენი დროის ყველაზე ძლიერი ტექნოლოგიაა, რომლის დახმარებითაც გამოთვლითი ტექნოლოგიის ახალ ტალღა დაიწყო. რამდენიმე წელიწადში, ტრილიონობით კომპიუტერი, რომელშიც ხელოვნური ინტელექტი იქნება ინტეგრირებული, შეძლებს ახალი ნივთების ინტერნეტის (IOT) შექმნას, რაც ათასჯერ დიდი იქნება, ვიდრე დღევანდელი ადამიანების ინტერნეტი. ჩვენი კომბინაცია შექმნის კომპანიას, რომელიც შესანიშნავად მოერგება ხელოვნური ინტელექტის ეპოქას“, – ამბობს ჯენსენ ჰუანგი, Nvidia-ს CEO, კომპანიის მიერ გამოქვეყნებულ რელიზში.
2016 წელს, Softbank-მა ARM 31 მილიარდ დოლარად იყიდა. მას შემდეგ, კომპანიამ უამრავ წარმატებას მიაღწია. მისი დახმარებით შეიქმნა მობილურ მოწყობილობებზე მორგებული პროცესორები, მაგალითად, Apple-ის, Samsung-ისა და Qualcomm-ის შემთხვევაში. მოგვიანებით კი, ARM-ზე დაფუძნებული ლეპტოპები გამოჩნდა, როგორიცაა Microsoft-ის Surface, Apple კი, მომავლის მაკების ARM-ზე დაფუძნებული პროცესორებით აღჭურვას გეგმავს.
შეიძლება იფიქროთ, რომ როგორც ბევრი გარიგების შემდეგ ხდება, ARM-ის მუშაობის სტილი ან კლიენტებთან ურთიერთობის შესაძლებლობა, გარკვეულწილად მაინც შეიზღუდოს. თუმცა, კომპანიები თანხმდებიან, რომ ARM მიმდინარე საქმიანობას და მოქმედ პარტნიორებთან ურთიერთობას ჩვეულ რეჟიმში გააგრძელებს. სხვა მხრივ კი, ARM დიზაინერებს ეხსნებათ გზა გამოიყენონ Nvidia-ს ტექნოლოგია, განსაკუთრებით, გრაფიკული პროცესორების მიმართულებით.
გარიგების შემდეგ, Arm ისევ კემბრიჯიდან იმართება, ხოლო Nvidia აქპირებს ინვესტირებას, იმისათვის, რომ ადგილზე ხელოვნური ინტელექტის კვლევითი ცენტრი შეიქმნას. აღსანიშნავია, რომ Nvidia ამ გარიგებას სწორედ ხელოვნური ინტელექტის კუთხით, ახალი საფეხურის გაჩენის შესაძლებლობად მიიჩნევს. ორივე კომპანია – Nvidia და Arm ხედავენ შესაძლებლობას, AI მოწყობილობების შექმნის კუთხით. მოწყობილობების, პატარა სმარტფონებიდან დიდი კომპიუტერების ჩათვლით, რომლებიც Arm ჩიპებზე იმუშავებენ.
ორივე მხარემ – NVIDIA-მ და ARM-მა გარიგების პირობები უკვე დაადასტურა, ტრანზაქციის დასრულება კი 18 თვეშია მოსალოდნელი. გარდა ამისა, პროცედურის დასრულება დამოკიდებულია ევროკავშირის, აშშ-ს, გაერთიანებული სამეფოსა და ჩინეთის მარეგულირებელი ორგანიზაციების ნებართვებზეც.
