Old Spice ის ბრენდია, რომელიც თავისი ვირუსული კამპანიებით, სურნელითა და რეკლამებით გახდა ცნობილი. ერთ დროს ის განსაკუთრებულად პოპულარული იყო აშში, თუმცა დღესდღეობით ამ პროდუქტს მთელ მსოფლიოში იცნობენ. მიუხედავად იმისა, რომ იგი პროდუქციას აწარმოებს ქალებისთვისაც, თავისი კამპანიებიდან გამომდინარე, ყოველთვის კაცის ბრენდად უფრო ასოცირდებოდა.
ამ სტატიაში გავეცნობით Old Spice-ის ისტორიას, მოკლედ მიმოვიხილავთ მას დაარსებიდან დღემდე.
მეოცე საუკუნის დასაწყისი
პირველი Old Spice პროდუქტი, სუნამო სახელწოდებით Early American Old Spice ქალებისთვის, 1937 წელს გამოვიდა. თუმცა ახალშექმნილმა ბრენდმა კაცებსაც არ დასწყვიტა გული და მეორე წელსვე მოაყოლა Old Spice მამაკაცებისთვის. ოფიციალური მწარმოებელი კომპანია იყო Shulton, რომელიც დაარსდა 1934 წელს უილიამ ლაითფუტ შულცის მიერ. ადრეული პროდუქტებიდან ყველაზე ცნობილი და მოთხოვნადი საპარსი საპონი და გაპარსვის შემდგომი ლოსიონი გახდა.
აღსანიშნავია, რომ კაცის პროდუქციის ხაზი უფრო პოპულარული გახდა და გაყიდვებითაც გადააჭარბა ქალის ხაზს. ამ მოცემულობამ მისი პოზიცია გაამყარა, როგორც კაცის თავის მოვლის ბრენდი და წლების განმავლობაში ის უფრო მეტად სწორედ მამაკაცების პროდუქტად ჩამოყალიბდა.
ბრენდის გაფართოება
მე-20 საუკუნის შუა ხანებში Old Spice-მა გააფართოვა თავისი პროდუქციის ხაზი და განაგრძო პოპულარობის ზრდა. ბრენდმა წარმოადგინა სხვადასხვა პროდუქტი, მათ შორის საპარსი კრემები, ტანის დასაბანი საშუალებები, დეოდორანტები და სხვა. Old Spice-ის სურნელი, ციტრუსის, ყვავილებისა და ვანილინის გამორჩეული ნაზავი, გახდა მამაკაცის მოვლის საშუალება მთელ ამერიკაში და შემდეგ უკვე მთელ მსოფლიოშიც.
დიდი ბრენდის, დიდი ბრენდის მიერ შეძენა
1990 წელს სამომხმარებლო საქონლის გიგანტმა Procter & Gamble (P&G) შეიძინა Old Spice. ამით ბრენდის ზრდისა და ინოვაციების ახალი ერა დაიწყო. P&G ფოკუსირებული იყო Old Spice-ის გლობალური წვდომის გაფართოებაზე და მისი იმიჯის მოდერნიზებაზე ახალგაზრდა დემოგრაფიის თვალსაზრისით.
რებრენდინგი
2000-იანი წლების ბოლოს Old Spice-მა მნიშვნელოვანი რებრენდინგის კამპანია ჩაატარა. ბრენდი მიზნად ისახავდა, შეეცვალა თავისი მიმართულება და მეტი აქცენტი გაეკეთებინა ახალ თაობაზე.
ამისთვის მან მოიფიქრა ვირუსული მარკეტინგული კამპანიების სერია, რომლებიც გაჯერებული იყო იუმორით და საკმაოდ დიდ ხმაურს იწვევდა მაყურებელში.
ყველაზე თვალსაჩინო კამპანია იყო “The Man Your Man Could Smell Like” – 2010 წელს. რეკლამებმა, რომლებიც ამ კამპანიის ფარგლებში გამოვიდა, დიდი პოპულარობა მოიპოვა, იქცა კულტურულ ფენომენად და მნიშვნელოვნად გაზარდა Old Spice-ის გაყიდვები.
წარმატებული რებრენდინგის შემდეგ წლების განმავლობაში Old Spice აგრძელებდა ინოვაციებისა და გაფართოების სერიას. ბრენდი ახლა გთავაზობთ სხვადასხვა სურნელს და მოვლის საშუალებებს, მათ შორის ტანის სარეცხი საშუალებების, დეოდორანტების, ანტიპერსპირანტების, საპარსი კრემებისა და ტანის სპრეის ჩათვლით.
ის დღემდე აგრძელებს იუმორის გამოყენებას თავის რეკლამაში, ქმნის დასამახსოვრებელ კამპანიებს, რომლებიც რეზონანსს უწევს მათ სამიზნე აუდიტორიას. ბრენდის მარკეტინგული სტრატეგია რჩება მისივე წარმატების გასაღებად.
ბიზნესისტორიებს წარმოგიდგენთ „ალიანს ჯგუფი”.
#დაძარი
ავტორი: მარიამ გოჩიაშვილი
