თბილისში მტკვარზე წყალქვეშა ნავის, მარტორქის ”აღმოჩენა” და ამ ვიდეოების ვირუსულად გავრცელება ჯოკრების გამოჩენით დასრულდა. JB.Ge – ( Joker bros) – აზარტული თამაშების პორტალის კამპანიის კულმინაციაა, როგორი მოლოდინიც მასზე იყო, იმ სახით არ შედგა.
ოთო შამუგია ( FENOM-ის აღმასრულებელი დირექტორი და Digital Avenue-ს მმართველი პარტნიორი):
კამპანიის დაგეგმვაში ორი კომპანია მონაწილეობდა. ერთი – FENOM Creative Agency, რომელიც უშუალოდ ”პროდაქშენზე” მუშაობდა: კლიპების გადაღება, სცენარების შემუშავება, გრაფიკა და ანიმაცია, დიზაინი.
მეორე – Digital Avenue, რომელმაც კამპანიას ვირუსული მარკეტინგის მხარდაჭერა უზრუნველყო, ანუ რომელი მედია საშუალებები გამოგვეყენებინა, როგორი ”ტარგეტინგი” მომხდარიყო, რა თანმიმდევრობით უნდა გასულიყო ესა თუ ის კლიპი. ასევე, გარკვეული წვლილი შეიტანა სცენარების დამუშავებაში.
Web-ის ნაწილი უშუალოდ კლიენტმა აიღო საკუთარ თავზე, ამ შემთხვევაში JB.Ge-ს დეველოპმენტი და სხვა პროგრამული ნაწილი. აღსანიშნავია პროდაქშენში ჩართული ორი პიროვნება, რომლებსაც ასე მოვიხსენიებთ: Halfpace – გენიალური ანიმატორი და David LA, ქართველი რეჟისორი ჰოლივუდიდან.
უშუალოდ კამპანიაზე რომ ვისაუბროთ, რატომ განვითარდა მოვლენები ასეთი სცენარით?
ვებ-გვერდი დაახლოებით 1.5 წელია რაც არსებობს. მცირე რესურსებით მასშტაბებზე მუშაობდნენ იმ გათვლით, რომ სამომავლოდ ყველა მაჩვენებელს გაზრდიდნენ. ეს ”მომავალი” სექტემბერში დადგა. კლიენტს სურდა – გაგვეკეთებინა განსხვავებული კამპანია, რომელიც განაპირობებდა ვებ-გვერდზე ტრაფიკის ზრდას. ბრენდი კი დაიმკვიდრებდა თავის ადგილს სათამაშო ბიზნესით გაჯერებულ ბაზარზე.
კამპანიის მიზანი მათთვის ცნობადობის და ტრაფიკის ზრდა იყო. ჩვენი თავდაპირველი შეთავაზება გარკვეულწილად არსებულისგან განსხვავდებოდა, მთელი რიგი ელემენტების ამოღება მოგვიწია შეზღუდული რესურსების გამო. მაგრამ, ჩვენ ძალიან მოხარულები ვართ, რომ კლიენტი ასეთ სარისკო კამპანიაზე გამოგვყვა.
რაც შეეხება ვირუსული ვიდეოების კონცეფციას და სათამაშო ბიზნესთან მათ იდეურად დაკავშირებას. . .
აქ არის ასეთი ფილოსოფია: ჯოკრები (Jester) ისტორიულად, დაახლოებით, 14 საუკუნიდან იღებენ სათავეს. ისინი საკმაოდ ძლიერი რეპუტაციით სარგებლობდნენ სამეფო კარზე და არ იყვნენ უბრალოდ ჯამბაზები.
შემდეგ ჯოკრების კულტურა დავიწყებას მიეცა. ჩვენმა ძმებმა ვირტუალურ სივრცეში მოიპოვეს ადგილი და საზოგადოების გახალისება სხვადასხვა თამაშობებით.
მაგრამ აღმოჩნდა, რომ ეს არ იყო საკმარისი, შემდეგ ძმების საბჭოზე გადაწყდა მათი რეალურ სამყაროსთან ინტეგრაცია. სწორედ ამიტომ არის მთლიანი კამპანია რეალურის და ვირტუალურის ჰიბრიდი.
წყალქვეშა ნავი და მარტორქა საზოგადოების ყურადღების მიქცევის და მათი გართობის მცდელობა იყო. სპირალები კი უბრალოდ სიმბოლოა, რომელიც ჩვენ მოკვდავებმა პირობითად შეგვიძლია პორტალის სახით წარმოვიდგინოთ.
თქვით, რომ იყო ერთგავარად სარისკო კამპანია. რა რისკებს მოიცავდა და რამდენად გამართლდა თქვენი მოლოდინი?
თავიდანვე რამდენიმე ფაქტორი იყო: 1. (ყველაზე ნაკლებ რისკიანი) ქართული აუდიტორია ვერ მიიღებდა მსგავს კომუნიკაციას და ვიდეოები არ აღმოჩნდებოდა ვირუსული 2. კამპანიის სპეციფიკა ”პროდაქშენის” მხრივ და ქვეყანაში არსებული ტექნიკური აღჭურვილობა თანხვედრაში ვერ მოვიდოდა ერთმანეთთან. ამ შემთხვევაში მეორე რისკი რეალურ პრობლემად იქცა.
კამპანიის დაგეგმვისას გათვლა ძირითადად Opinion Leader-ებზე გავაკეთეთ. შესაბამისად, რამდენიმე ეტაპი უნდა გაგვევლო მანამდე: უნდა მიგვეღო მაქსიმალური PTA, შემდეგ გაგვეფილტრა და რამდენიმე მედიის საშუალებით ჩვენთვის მნიშვნელოვან მიზნობრივ აუდიტორიაზე გავსულიყავით, ბოლო ეტაპზე კი სეგმენტის მასშტაბი Opinion Maker-ების საშუალებით უნდა გაზრდილიყო ეს შედეგები მიღწეულია ნაწილობრივ.
რისი მიღწევა არ მოხერხდა კამპანიით?
კამპანიით მივიღეთ ძალიან დიდი Reach, რამაც ყველა მოლოდინს გადააჭარბა. თუმცა, კულმინაციურ ნაწილში გაიპარა რამდენიმე ხარვეზი და ამან ბუნებრივია შედეგზეც იმოქმედა.
კულმინაცია ყველასათვის მოულოდნელი აღმოჩდა. კამპანიამ დასაწყისში ყურადღება მიიპყრო, თიზინგის დასასრულს დიდი მოლოდინი იყო. თუმცა, დათქმულ დროს ვებ-გვერდი არ გაიხსნა.
”პროდაქშენში” რამდენიმე ნაკლებად ათვისებული ტექნოლოგია გამოვიყენეთ. მაგალითად, Motion Capture, რომელიც ჯოკრების ბოლო კლიპზე დაინერგა. მარტივად რომ ვთქვათ, რეალური მსახიობების თამაშზე დადებული ანიმაცია. მაგრამ ერთი პერსონაჟის აღჭურვილობა გვქონდა, ისიც მხოლოდ ტანის მოძრაობების დასაფიქსირებლად. მიმიკები ხელით გავაკეთეთ, ფაქტობრივად, 0-დან. ამის გარდა, საქართველოში არ არის დიდი არჩევანი რენდერული გადაწყვეტილებების.
ერთ-ერთმა კომპანიამ ბოლო მომენტში გვითხრა უარი, რის გამოც მოგვიწია პროექტის გერმანიაში გადაგზავნა. ყველაფერმა ერთად საბოლოო პროდუქტის დროულად გაშვებაზე იმოქმედა. იმედგაცრუებაც იყო, როგორც ჩვენი, ასევე აუდიტორიის მხრიდან, რაც საკმაოდ დიდი დარტყმა აღმოჩნდა კამპანიისთვის, მაგრამ ჩვენ ეს გაკვეთილად მივიღეთ.
ტექნიკამ ვერ აუბა მხარი ჩვენს ამბიციებს, ამით ჭკუა ვისწავლეთ, მაგრამ ეს იმას არ ნიშნავს, რომ სამომავლოდ ამბიციებს შევამცირებთ, პირიქით. მიუხედავად იმისა, რომ კამპანია დასრულდა, კიდევ არსებობს გამოწვევა, რომ ტრაფიკი რეალურ ტრანზაქციებში დაკონვერტირდეს. ამაზე მუშაობას კვლავ ვაგრძელებთ.
ბოლო რგოლში არის საუბარი, რომ იცით რითი იწყება და არ იცით, საით მიდის ეს ყველაფერი. ანუ გაგრძელდება კამპანია? რა იქნება შემდეგი?
კამპანიის გაგრძელების გეგმა არსებობს. კლიენტთან მოლაპარაკებებს ვაწარმოებთ ამასთან დაკავშირებით.
რაც შეეხება კამპანიის ღირებულებას?
კამპანია (Production, Viral Marketing) 20,000 ლარი დაჯდა, რაც შედეგებს რომ დავუპირისპიროთ, უაზროდ მაღალ თანაფარდობას მივიღებთ. ბოლო დროის სარეკლამო შედევრები ამ ფინანსურ ფარგლებს რამდენჯერმე აღემატება.
