in

პირველი ქართველი, რომელიც ოქსფორდის კრიმინოლოგიისა და სისხლის სამართლის მეცნიერების კურსდამთავრებულია

უჩა ბახტაძე, სულხან-საბა ორბელიანის უნივერსიტეტის პროფესორი, იურიდიული ფირმა JG Counselors-ის დამფუძნებელი პარტნიორი, ოქსფორდის უნივერსიტეტის კრიმინოლოგიისა და სისხლის სამართლის მართლმსაჯულების მეცნიერების მაგისტრია. უჩა ოქსფორდის კოლეჯ Exeter-ის ერთადერთი ქართველი კურსდამთავრებულია. Exeter 1314 წელს დაარსდა და ოქსფორდის უნივერსიტეტში კოლეჯებს შორის სიძველით მეოთხეა.

დრამა დეტექტივის მოყვარულებისთვის სერიალის “ინსპექტორი მორსი” საიდუმლოებებით მოცული სცენები სწორედ ამ კოლეჯშია გადაღებული, თუმცა „დოქტორ სტრეინჯიდანაც“ შეგიძლიათ უნივერსიტეტის კედლების ამოცნობა.

რატომ ექსეტერის კოლეჯი და რა გამოცდილებით დაბრუნდა საქართველოში უჩა ბახტაძე? –  ამ საკითხებთან დაკავშირებით თავად უჩა საუბრობს.

საქართველოში მაგისტრატურის სისხლის სამართლის სპეციალიზაციის დასრულების შემდეგ მივხვდი, რომ ჩემთვის ყველაზე საინტერესო და მნიშვნელოვანი კრიმინოლოგიის შესწავლა იყო. შესაბამისად, დავიწყე ინფორმაციის შეგროვება სტიპენდიაზე და „ჩივნინგის“ სტიპენდიის მოსაპოვებლად შევიტანე განაცხადი. დაფინანსების მოპოვებისა და საჭირო პროცედურების გავლის შემდეგ სამმა უნივერსიტეტმა მიმიღო, აქედან ერთ-ერთი იყო ოქსფორდი და ორი ლონდონის უნივერსიტეტი (LSE და UCL).

საბოლოო არჩევანი კი მაინც ოქსფორდზე შევაჩერე და კოლეჯ ექსეტერში, კრიმინოლოგიის დეპარტამენტში, გავიარე კრიმინოლოგიისა და სისხლის სამართლის მართლმსაჯულების მეცნიერების სამაგისტრო პროგრამა.

ოქსფორდული ცხოვრება და სწავლის პერიოდი…

 ოქსფორდში სწავლება  ინტენსიური და შრომატევადია. ერთი წლის განმავლობაში  მიღებულმა ცოდნამ და გამოცდილებამ სრულიად შეცვალა ჩემი ცხოვრება და წარმოდგენები რიგ საკითხებზე. კერძოდ, დანაშაულისა და სასჯელის შესახებ აღქმა აბსოლუტურად განსხვებული კუთხით შემექნა. შესაბამისად, თითქმის ყველა ის საკითხი, რაც   მქონდა შესწავლილი გადაფასებას დაექვემდებარა. ოქსფორდიდან დაბრუნებული არა უბრალოდ სისხლის სამართლის სპეციალისტი ვიყავი, არამედ კრიმინოლოგიც, რომლის გარეშეც სისხლის სამართალი ერთ ადგილზე მდგომი მეცნიერებაა და არავითარი სამომავლო პერსპექტივა არ გააჩნია. შესაბამისად, ყველა ვინც სისხლის სამართლითაა დაინტერესებული, აუცილებელია, რომ კრიმინოლოგიას რაღაც დონეზე მაინც იცნობდეს.

განსაკუთრებულად და სასიამოვნოდ ლექტორების დამოკიდებულება მახსენდება სტუდენტების მიმართ. სტუდენტებს დარგის წამყვან სპეციალისტებთან თანასწორი და მეგობრული ურთიერთობები გვქონდა. სწავლის პერიოდში გარდა იმისა, რომ ძალიან ბევრი მასალის კითხვა გიწევს, პარალელურად უამრავი სოციალური აქტივობაა შემოთავაზებული, რაც სწავლის პროცესს სახალისოს და მეტად საინტერესოს ქმნის. ეს ყველაფერი ცხადია სტუდენტს მრავალი კუთხით დაფიქრებისა და განვითარების შესაძლებლობას აძლევს. სწორედ დიდი დოზით დაფიქრების პროცესია ის მთავარი კომპონენტი, რაც კონკრეტული საკითხის შესწავლის საწინდარია.

ამჟამინდელი საქმიანობა და სამომავლო გეგმები…

 საქართველოში დაბრუნების შემდეგ მივხვდი, რომ ჩემი ცოდნის გამოყენება არა მხოლოდ ჩემი საქმიანობისთვის მჭირდებოდა, არამედ მინდოდა ცოდნისა და გამოცდილების სხვისთვის გაზიარება. სწორედ, ამ ფაქტითაა განპირობებული ის, რომ 2015 წლიდან სულხან-საბა ორბელიანის უნივერსტიტეში ლექტორი ვარ და ვკითხულობ ლექციებს კრიმინოლოგიისა და სისხლის სამართლის მართლმსაჯულების მიმართულებით. ვცდილობ, რომ სტუდენტებს გავუზიარო ღირებული ცოდნა, რომელიც მათ დაეხმარებათ მომავალი საქმიანობის სწორად წარმართვაში.
დღეს სტუდენტები საკმაოდ განვითარებულნი არიან და ნებისმიერ საკითხზე თავიანთი წარმოდგენა აქვთ შექმნილი. გარდა იმისა, რომ მათთან ინტერაქციისას უამრავი ახალი მიმართულებით იხსნება კარი კონკრეტულ საკითხზე მსჯელობისას, ძალიან სასიამოვნოა ის პროცესი, როდესაც მათ უკვე შექმნილი წარმოდგენების შესახებ კითხვები უჩნდებათ და სემესტრის განმავლობაში მათ გადაფასებას იწყებენ. ეს არის ცოდნის ორმხრივი გაზიარების პროცესი, რომელიც მე, როგორც ლექტორს, ძალიან მავითარებს, ხოლო მათ როგორც სტუდენტებს აფიქრებს იმ შესაძლებლობებზე, რაც მანამდე მათთვის შეიძლება უცხო ან თუნდაც მიუღებელიც ყოფილიყო.

რჩევა სტუდენტებს…

სამართალი მუდმივად განვითარებადი მეცნიერებაა და მუდმივად ემატება ახალი მიმართულებები. მაგალითად, მედიასამართალი (დანაშაული და მედია), სოციალური მედიის სამართალი, ხელოვნური ინტელექტის სამართალი და ა.შ. შესაბამისად, უმჯობესია, არა ზოგადად რომელიმე სამართლის გლობალური მიმართულების სპეციალისტები იყოთ (სისხლი, სამოქალაქო), არამედ სამართლის ვიწრო დარგის, რომელიც ბაზარზე თავის დამკვიდრების გაცილებით მეტ შესაძლებლობას მოგცემთ, ვიდრე ტრადიციული გზის გაყოლა.

[პარტნიორის კონტენტი]

ნოტრ-დამი კლიმატური ცვლილებების მიმართ მდგრადი გახდება

„ბასკინ რობინსი“ – უკვე ქსელურ სუპერმარკეტებში!