კომპანიები ყოველდღიურად გვაძლევენ სხვადასხვა მიმზიდველ დანაპირებებს. ბევრი მათგანი ისეთი მიმზიდველია, რომ ჩვენ ვღებულობთ გადაწყვეტილებას მივენდოთ მათ. გვპირდებიან ხარისხიან მომსახურებას, მაღალ სოციალურ სტატუსს, კომფორტს და ა.შ.
შედეგად ამ დანაპირებებს მივყავართ კომპანიებამდე, მაგრამ რამდენად სრულდება ეს დანაპირებები როდესაც ჩვენ მათთან მივდივართ?
დღევანდელი ქართული რეალობა გვიჩვენებს, რომ კომპანიების უმრავლესობის მთავარი ამოცანაა მომხმარებლის პირველადი მოზიდვა და არა მისი შემდგომი შენარჩუნება.
ასეთი კომპანიების ლოგიკა შემდეგია: მთავარია მოვიდეს და მერე უკვე მნიშვნელობა აღარ აქვს… ისინი დანაპირებს იყენებენ როგორც სატყუარას, რათა მოიზიდონ მომხმარებლები.
აი, სწორედ ამ დიდ ტყუილს ვერ პატიობს მომხმარებელი კომპანიას და იგი წყვეტს ურთიერთობას მასთან. მეტიც, ირიბად თუ პირდაპირ, მომხმარებელი სხვებსაც მოუწოდებს იგივე გააკეთონ – რის შედეგადაც კომპანიის იმიჯი და რეპუტაცია სერიოზული საფრთხის ქვეშაა. ბუნებრივიცაა, მომხმარებელი თავს გრძნობს მოტყუებულად და იმედგაცრუებულად, რასაც იგი ხშირად აგრესიამდე მიყავს. მომხმარებლები ელოდებიან ჩვენგან, რომ ჩვენ პატიოსნად შევასრულებთ იმ დანაპირებს, რითაც ისინი მოვიზიდეთ. როდესაც ამას არ ვაკეთებთ, ჩვენ ყოველდღიურად ვკარგავთ მომხმარებლებს და ვაქვეითებთ კომპანიის რეპუტაციას. ამ ყველაფერს ზურგს უმაგრებს ის ცნობილი ფაქტიც, რომ მომსახურებაში არსებული 5 განზომილებიდან, კომპანიის ნდობა მომხმარებლისთვის N1 პრიორიტეტია.
იმისათვის, რომ თქვენი კომპანია იყოს წარმატებული და ეს წარმატება ფინანსურადაც იყოს ასახული, უბრალოდ შეასრულეთ ის რასაც დაპირდით მომხმარებელს.
გაითვალისწინეთ შემდეგი:
პირველი – იზრუნეთ იმაზე, რომ გქონდეთ დანაპირები
მეორე – იზრუნეთ იმაზე, რომ დასაწყისშივე მოარგოთ საკუთარი შესაძლებლობები და ძალები (ფინანსური, ტექნიკური თუ ინტელექტუალური რესურსი) თქვენს დანაპირებს;
მესამე – იზრუნეთ დანაპირების ხორცშესხმაზე;
მეოთხე – იზრუნეთ, რომ თქვენი დანაპირები მომხმარებლისთვის იყოს რეალურად ხელშესახები.
პრაქტიკული რეალობა გვიჩვენებს შემდეგს: როდესაც რეალობა არ შეესაბამება დანაპირებს, მომხმარებელი რჩება უკმაყოფილო, თავს გრძნობს მოტყუებულად და კარგავს თქვენდამი ნდობას.
ავტორი: საბა ჩიხლაძე
