სიმონ როშასა და adidas Originals-ის პირველი სრული კოლექცია უკვე გლობალურად გამოვიდა და თავიდანვე იმ კონტრასტზე თამაშობს, რომელმაც დიზაინერის სტილი წლების განმავლობაში გამორჩეული გახადა: სინაზე და სიმკაცრე, რომანტიკული დეტალები და სპორტული ელემენტები, მარგალიტები, მაქმანი და adidas-ის ცნობილი სამი ზოლი.
კოლექცია პირველად თებერვალში, ლონდონის მოდის კვირეულის ფარგლებში, Alexandra Palace-ში წარადგინეს. ერთი შეხედვით, adidas-ის სპორტული მემკვიდრეობა და როშას გამოკვეთილად ქალური სამყარო ერთმანეთისგან საკმაოდ შორს დგას, თუმცა თავად დიზაინერისთვის ეს კომბინაცია ახალი სულაც არ არის.
როშა იხსენებს, რომ ირლანდიაში სკოლაში adidas-ის ტანსაცმელს სკოლის ქვედაბოლოსთან ერთად ატარებდა. მოგვიანებით, კოლეჯის წლებში, ვინტაჟურ ქვედაბოლოებს სამი ზოლით გაფორმებულ საფეხბურთო შორტებს უხამებდა. მისთვის სპორტული ტანსაცმელი ყოველთვის ერთგვარი საპირწონე იყო იმ ქალურობისთვის, რომელიც მის ჩაცმულობაში ბუნებრივად ჩნდებოდა.
ეს კონტრასტი ახალ კოლექციაშიც იგრძნობა. adidas-ის ნაცნობი მოდელები როშას სამყაროში გადადის: Firebird და Beckenbauer-ის სპორტული კოსტიუმები ახალი სილუეტებით ჩნდება, Superstar განსხვავებული დეტალებით მუშავდება, საფეხბურთო წინდები მარგალიტის მსგავსი დეკორით იფარება, ხოლო კლასიკური Airline ჩანთა ნაქარგი ქსოვილით არის გადაკეთებული. მაქმანის ორნამენტებში კი adidas-ის პატარა სამფოთოლა სიმბოლოებიც არის ჩამალული.
როშა ამ მიდგომას საკუთარი „პლანეტის“ შექმნას ადარებს. adidas-ის უზარმაზარი არქივიდან ის არჩევს იმას, რაც მის ვიზუალურ ენასთან ყველაზე ბუნებრივად ერთიანდება და სპორტულ ნივთებს სრულიად ახალ გარემოში ათავსებს.
ამ სამყაროს გაგრძელებაა კამპანიაც, რომელიც ამერიკელმა ფოტოგრაფმა ჯასტინ კურლანდმა გადაიღო. როშა წლებია კურლანდის ნამუშევრების, განსაკუთრებით მისი ცნობილი ფოტოსერიის Girl Pictures-ის გავლენაზე საუბრობს. ამიტომ კამპანიაში 11 ახალგაზრდა ქალი ჩნდება, რომელთა ნაწილი სიმონ როშას სამყაროდან უკვე ნაცნობია, ნაწილი კი სპეციალურად ქუჩის შერჩევით იპოვეს.
კადრებში ისინი მწვანე, თითქმის ზღაპრულ გარემოში არიან მოქცეული. სივრცე ერთდროულად რბილი და ოდნავ უცნაურია. ჯგუფური ფოტოები ახალგაზრდობისა და ერთმანეთთან სიახლოვის განცდას ქმნის, ვიდეო კი ცალკეული გმირების პორტრეტებსა და საერთო ხედებს შორის მოძრაობს.
როშასთვის მნიშვნელოვანი იყო, რომ კამპანიას ზედმეტად პრიალა და იდეალიზებული სპორტული რეკლამის იერი არ ჰქონოდა. კურლანდის ფოტოგრაფიაში არსებული მსუბუქი დისკომფორტი და უცნაურობა აქაც შეგნებულად დარჩა. შედეგად, კადრები თითქოს ნაცნობ სამყაროშია გადაღებული, მაგრამ მასში რაღაც მაინც ოდნავ უცხოდ და არარეალურად გამოიყურება.
ეს განწყობა თავად კოლექციის სხვა წყაროებსაც უკავშირდება. როშას 2026 წლის შემოდგომა-ზამთრის ჩვენების ერთ-ერთი მთავარი შთაგონება ირლანდიური მითი ტირ ნა ნოგი იყო, რომელიც ახალგაზრდობასა და მარადიულობას უკავშირდება. დიზაინერი ასევე ეყრდნობოდა პერი ოგდენის 1999 წლის ფოტოებს, სადაც დუბლინის საცხოვრებელ უბნებში ახალგაზრდა ადამიანები ცხენებთან ერთად, სპორტულ და საცხენოსნო ტანსაცმელში არიან გადაღებული.
ამიტომ, კოლექციაში ერთმანეთის გვერდით ბუნებრივად ჩნდება ახალგაზრდული კულტურა, ირლანდიური ფოლკლორი, ქუჩის მოდა და adidas-ის სპორტული კოდები.
როშასთვის ქალურობა არასდროს ყოფილა მხოლოდ რბილი და დეკორატიული. მისი „რადიკალური ქალურობა“ სწორედ წინააღმდეგობებზე დგას: მარგალიტი შეიძლება სპორტულ წინდაზე აღმოჩნდეს, მაქმანი სპორტულ კოსტიუმთან, ხოლო ყველაზე რომანტიკული დეტალი სრულიად პრაქტიკულ ნივთში გამოჩნდეს.
ამ თანამშრომლობის საინტერესო მხარეც სწორედ ესაა. adidas-ის ვიზუალური ენა უბრალოდ უფრო ქალური არ გამხდარა. როშა მის ყველაზე ცნობად სიმბოლოებს იღებს და საკუთარ სამყაროში ისე ათავსებს, რომ ორივე მხარის ხასიათი შენარჩუნებულია.
ეს მხოლოდ პირველი ეტაპია. adidas Originals-მაც და სიმონ როშამაც უკვე დაადასტურეს, რომ თანამშრომლობა გაგრძელდება. დიზაინერი კი adidas-ის არქივში დარჩენილ სპორტულ და ტექნიკურ მიმართულებებსაც უკვე სწავლობს.
