დღესდღეობით მარკეტინგი აჩქარებული ტემპით მუშაობს. ამ სფეროში მონაცემებზე ორიენტირებული სტრატეგიები და ანალიტიკა იმდენად დომინირებს, რომ ზოგჯერ ავიწყდებათ, ROI-ის მაქსიმალურად გაზრდის, ხელსაწყოების ოპტიმიზაციისა და სამიზნე აუდიტორიის განსაზღვრის გარდა სხვა ცხოვრებაც რომ არსებობს. კერძოდ, მარკეტერებს ხშირად ავიწყდებათ, რომ მომხმარებლები არ არიან უბრალო სამიზნეები, ისინი ინდივიდები არიან სხვადასხვა საჭიროებით, ემოციებითა და მისწრაფებებით.
იმის მიუხედავად, რომ მარკეტინგისთვის სამიზნე აუდიტორიის განსაზღვრა უაღრესად მნიშვნელოვანია, ზედმეტი აპელირება ამ თემაზე შეიძლება საზიანოც იყოს, რადგან მომხმარებელს ხანდახან სჭირდება, რომ პერსონალური მიდგომა იგრძნოს ბრენდისგან.
ამ თემაზე უფრო საინტერესოდ გვესაუბრა მარკეტერი და ამ მიმართულების ლექტორი, ქეთი მეფარიძე.
„მარკეტერებს გვიყვარს ისეთი ტერმინების გამოყენება, როგორებიცაა: „სამიზნე აუდიტორია“, „მთავარი სეგმენტი“, „მომხმარებელი“ და ა.შ. ეს ტერმინები გვეხმარება ბრენდის საკომუნიკაციო სტრატეგიის შემუშავებაში ან, თუნდაც, მომხმარებლების ინტერესების მიხედვით, სხვადასხვა აქტივობის მოფიქრებაში.
თუმცა, რომელ ბრენდზეც არ უნდა ვსაუბრობდეთ, ნებისმიერი კომუნიკაციის, კამპანიისა თუ აქტივობის ერთ-ერთი მთავარი მიზანი, მარტივად რომ ვთქვათ, ადამიანის ყურადღების მიპყრობაა. ადამიანების ყურადღების მისაპყრობად კი აუცილებელია ეს კომუნიკაცია საინტერესო და რელევანტური იყოს მათთვის, ვისთვისაც შეიქმნა ესა თუ ის პროდუქტი თუ მომსახურება.
განსაკუთრებით მნიშვნელოვანია, გვახსოვდეს, რომ ამ ტერმინების მიღმა, ჩვენ ველაპარაკებით ადამიანებს – ჩვენს ნაცნობებს, თანამშრომლებს, მეზობლებს, რომლებიც დადიან სამსახურში, ნახულობენ მეგობრებს, უსმენენ მუსიკას და დღის განმავლობაში, ზღვა ინფორმაციას იღებენ.
ამ ყურადღების მიპყრობის ერაში, თუ არ ვიფიქრებთ ადამიანების სურვილებზე, ინტერესებსა და ქცევებზე და ჩვენს აქტივობებს „საშუალო სტატისტიკური“ მომხმარებლებისთვის გავთვლით, ეს კომუნიკაცია ბრენდს ვერ დაახლოებს ადამიანებთან და ვერ გააჩენს ემოციურ კავშირს”.
M: ქეთი, როგორ უნდა გამიჯნონ მარკეტერებმა ერთმანეთისგან სამიზნე აუდიტორიისთვის შექმნილი სტრატეგია და პერსონალური მარკეტინგი?
ტექნოლოგია ძალიან გვეხმარება ადამიანების ინტერესებისა და სახასიათო ქცევების გაგებაში. შეგვიძლია დავაკვირდეთ, რომელ ტექსტსა თუ ვიზუალზე აქვს სპეციფიკურ აუდიტორიას მეტი ჩართულობა და ვეცადოთ, მაქსიმალურად პერსონალიზებულად მივაწოდოთ ჩვენთვის მნიშვნელოვანი ინფორმაცია კონკრეტული ინტერესების მქონე ადამიანებს. ვფიქრობ, წარმოუდგენელია იმუშაო ბრენდის სტრატეგიაზე, ადამიანების ქცევებზე დაკვირვებისა და სახასიათო თვისებების გამოაშკარავების გარეშე.
M: რა დროს შეიძლება სამიზნე აუდიტორიაში ამოვარჩიოთ კონკრეტული მომხმარებელი?
რთულია მხოლოდ ერთ ადამიანზე გავთვალოთ ამა თუ იმ ბრენდის კომუნიკაცია, თუმცა ადამიანებს ბევრი რამ გვაქვს საერთო; მნიშვნელოვანია, ვიპოვოთ ბრენდის მსგავსი ღირებულებებისა და ინტერესების მქონე ადამიანები და ვესაუბროთ მათ იმ თემებზე, რაც ღირებულია.
ვფიქრობ, თუ მოვახერხეთ და სწორად დაგეგმილი, თანმიმდევრული კომუნიკაციით მივწვდით ამ ადამიანებს, ჩვენ, როგორც ბრენდს, გაგვიჩნდება ერთგვარი თანამზრახველები, ვისთვისაც სულერთი არ იქნება ჩვენი პროდუქტი თუ მომსახურება.
M: და ბოლოს, რა არის თქვენთვის, როგორც მარკეტერისთვის მნიშვნელოვანი პერსონალური მიდგომის შემუშავებისას?
ჩემთვის, როგორც მარკეტერისთვის, განსაკუთრებით საინტერესოა ადამიანებთან ემოციური კავშირების შექმნა. ნებისმიერი ბრენდი, რომელიც ჩვენი ყოველდღიურობის ნაწილია და გამორჩეულად გვიყვარს, სწორედ ამ კავშირებს ეძებს ადამიანებთან და ცდილობს მუდმივად რელევანტური იყოს მომხმარებლებისთვის. პერსონალური მიდგომების გარეშე კი შეუძლებელია ემოციური ბმა გაჩნდეს.
ავტორი: მარიამ გოჩიაშვილი
