„მსოფლიოში პირველი გამჭირვალე კომპიუტერის მონიტორად წოდებული“ Phantom უნდა გაგაცნოთ, რომელიც Vision Instruments-მა შემოგვთავაზა. მართალია, წარსულში ბევრს ჰქონია მსგავსი მცდელობა, მაგრამ ასეთი შთამბეჭდავი ნაკლებად თუ იყო… როგორც კომპანიაში აცხადებენ: „მონიტორს თქვენი კონტენტი რეალურ სივრცეში გადააქვს, აერთიანებს ციფრულ და ფიზიკურ სამყაროებს“.
პროდუქტი HUD-ის ტექნოლოგიის მსგავსი მოდელით არის შექმნილი, რომელიც უმეტესად ავიაციასა და მანქანებში გამოიყენება. მისი გამჭვირვალობის ხარისხი კი ეფექტურია, მაგრამ Phantom-ს ამაზე მეტად გამჭვირვალობის მორგების უნარი გამოარჩევს სხვებისგან — პარამეტრებში სწრაფი ცვლილებით იგი გამჭვირვალე ეკრანს ტრადიციულ მონიტორად გადააქცევს, არჩევანი კი 3 ვარიანტს შორის უნდა გააკეთოთ.
საინტერესოა, რომ დღეს ექიმები ადამიანებს, რომლებიც დიდ დროს ატარებენ ეკრანებთან, თვალის გამოფიტვის თავიდან არიდების მიზნით ურჩევენ, სხვა რაღაცებისკენ გაიხედონ ხოლმე… Phantom-ის შემთხვევაში კი ამის საჭიროება აღარ არსებობს, რადგან „ციფრულ და ფიზიკურ სამყაროებს აერთიანებს“.
რაც შეეხება ტექნიკურ მახასიათებლებს, მონიტორს USB Type-C და HDMI პორტი ახლავს, რაც ნებისმიერ კომპიუტერთან მუშაობის შესაძლებლობას იძლევა ან თუნდაც სათამაშო სისტემასთან და ტელეფონთან. ამასთან, როგორც ზემოთ აღვნიშნეთ, 24-დიუმიანი 4K მონიტორი სხვა გამჭვირვალე ვარიანტებისგან რეგულირების შესაძლებლობით გამოირჩევა. 16:9 ასპექტის თანაფარდობას გვთავაზობს, 5000 ნიტამდე სიკაშკაშესა და sRGB-ის 100-პროცენტიან დაფარვას.
Vision Instruments-ს უკვე დაწყებული აქვს წინასწარი შეკვეთების მიღება, თუმცა რაოდენობა შეზღუდულია და მსოფლიოს მასშტაბით ჯერ მხოლოდ 10 ერთეულის გამოშვებას აპირებენ. ოღონდ ფასზე ჯერ ერთი სიტყვაც არ უთქვამთ…
