მკვლევრები გვარწმუნებენ, რომ არსებული კვანტური გამოთვლითი მეთოდებით პლანეტების ზომის მასიური ტელესკოპების აშენებას შევძლებთ. თანაც, ეს თეორიული ობსერვატორიები კოსმოსის სიღრმისეულად შესწავლის შესაძლებლობას მოგვცემს, შორეული სამიზნეების დანახვას კი უფრო მაღალი ხარისხით შევძლებთ. ხოლო თუ მეცნიერ ზიქსინ ჰუანს დავუჯერებთ, დიდი ალბათობით, ეს „ასტრონომიულ გამოსახულებებში რევოლუციას მოახდენს“.
უფრო კონკრეტულად, ისინი ინტერფერომეტრს გვთავაზობენ. ასტრონომიაში ეს ინდივიდუალური ტელესკოპების ერთობას ნიშნავს, რომელიც ერთ ტელესკოპს უფრო დიდი დიაფრაგმით ქმნის. კვანტური კომუნიკაციის ტექნიკის გამოყენებით კი იგი ფიზიკურ შეზღუდვებს დაძლევს.
პლანეტის ზომის ტელესკოპის კონცეფციაში ყოველი ფოტონი, რომელიც ტელესკოპებამდე მიაღწევს, დამუშავდება და სპეციალურ მეხსიერების შესანახ მოწყობილობაში ჩაიწერება. აქ კი უკვე საქმე კვანტურ გადაჯაჭვულობასთან გვაქვს — ფენომენი, რომელიც ორ ან მეტ ნაწილაკს ერთმანეთთან დაკავშირების საშუალებას აძლევს. მიუხედავად იმისა, რომ ისინი ერთმანეთისგან შორს არიან, საერთო კვანტურ მდგომარეობასაც იზიარებენ. ეს კი იმას ნიშნავს, რომ ცალკეულ ტელესკოპებს შორის ინფორმაციის გაცვლა მარტივად შეიძლება.
ხოლო თუ ხარვეზები წარმოიშობა, მეცნიერები ამის მოგვარებას კვანტური კომპიუტერის თვითშესწორებას მიანდობენ. წინა კვლევების მიხედვით, მას კლასიკური კომპიუტერისგან განსხვავებით, თეორიულად, საკუთარი შეცდომების გასწორება შეუძლია.
„ეს კარგი პირველი ნაბიჯია, მაგრამ პლანეტის ზომის ტელესკოპების შესაქმნელად კიდევ ბევრი გამოწვევაა დასაძლევი“, — ამბობს ჰუანი.
