დღევანდელი ტექნოლოგიური კომპანიების ბევრი ტოპ-აღმასრულებელი და გენერალური დირექტორი კარიერის დასაწყისში პროდუქტის მენეჯერი იყო. ეს ლოგიკურია. პროდუქტის მენეჯერების უმეტესობას ევალება კროს-ფუნქციური გუნდების ხელმძღვანელობა, რაც უზრუნველყოფს მაღალ ხილვადობას და კომპანიის მასშტაბით გავლენის მოპოვების შესაძლებლობას. წარმატებულთათვის ეს შეიძლება იყოს ფასდაუდებელი ნაბიჯი კორპორატიულ კიბეზე ასასვლელად. მაგრამ რას აკეთებს რეალურად პროდუქტის მენეჯერი და არის თუ არა ეს თქვენთვის შესაფერისი როლი?
რა არის პროდუქტის მენეჯმენტი?
თავისი არსით, პროდუქტის მენეჯმენტი არის პრობლემების გადაჭრა ბიზნესის, ტექნოლოგიებისა და მომხმარებლის გამოცდილების გადაკვეთაზე. პროდუქტის მენეჯერი (PM) არის პირი, რომელიც მართავს პროდუქტის განვითარებასა და სასიცოცხლო ციკლს, მოქმედებს როგორც დამაკავშირებელი რგოლი სხვადასხვა გუნდებს შორის, რათა უზრუნველყოს, რომ პროდუქტი აკმაყოფილებდეს როგორც მომხმარებლების სურვილებს, ასევე ბიზნესის მიზნებს. ისინი პასუხისმგებელნი არიან პროდუქტის გზამკვლევის შექმნაზე, ანუ სამოქმედო გეგმაზე, რომელიც აღწერს პროდუქტის ხედვას, მიმართულებას და მოსალოდნელ პროგრესს დროთა განმავლობაში. მიუხედავად იმისა, რომ როლის რეალური პასუხისმგებლობები განსხვავდება პროდუქტის ტიპის მიხედვით, ზოგადად, PM-ები მართავენ სხვადასხვა დავალებებს, რომლებიც საჭიროა პროდუქტის ფინიშამდე მისაყვანად.
რა უნარები სჭირდებათ პროდუქტის მენეჯერებს?
კომუნიკაცია
უნდა იყოთ ძლიერი და ნათელი კომუნიკატორი. საწყის ეტაპზე სავარაუდოდ, დაგჭირდებათ უფრო გამოცდილი PM-ების დახმარება, ყოველკვირეული შეხვედრების გამართვა კროს-ფუნქციური გუნდების შესათანხმებლად, პროექტის მოლოდინების მართვა და იმის უზრუნველყოფა, რომ თანამშრომლები ინფორმირებულნი იყვნენ ძირითადი გადაწყვეტილებებისა და კომპრომისების შესახებ.
როდესაც PM-ს აქვს სუსტი საკომუნიკაციო უნარები, პროექტი შეიძლება ვერც შედგეს. შეუთანხმებლობამ სხვადასხვა გუნდს შორის შეიძლება გამოიწვიოს გაორმაგებული სამუშაო ან ვადების გადაცილება. მეორე მხრივ, კარგი კომუნიკაცია მეტს აკეთებს, ვიდრე უბრალოდ პროექტის შეფერხებების პრევენციაა.
კონფლიქტების მოგვარება
ეს კიდევ ერთი კრიტიკული უნარია. პროექტის მიმდინარეობისას, ერთად მომუშავე სხვადასხვა გუნდებს შეიძლება ჰქონდეთ განსხვავებული მოსაზრებები იმის შესახებ, რა იმუშავებს ან არ იმუშავებს, ან რომელი დავალებები უნდა იყოს პრიორიტეტული. როგორც PM, თქვენ აღმოჩნდებით გუნდის წევრებს ან სხვადასხვა ფუნქციებს შორის უთანხმოებების მოგვარების ან შუამავლის როლში. ეს მოითხოვს დიპლომატიასა და ტაქტს.
შესრულების უნარები
შესრულება არის პროცესი, რომელიც უზრუნველყოფს საქმეების მოგვარებას. პროდუქტის მენეჯმენტში ეს ნიშნავს სტრატეგიის მოქმედებად გარდაქმნას და იმის უზრუნველყოფას, რომ თითოეული დავალება შესრულდეს ვადის დადგომამდე. კარგი შესრულების უნარები მოიცავს გუნდის წევრების კოორდინაციის, ვადების მართვის და პრობლემების გადაჭრის უნარს მათი წარმოქმნისთანავე, თუნდაც არასრული ინფორმაციით. ნებისმიერმა ხარვეზმა დავალების შესრულებაში, იქნება ეს დაგვიანება, დროის ან ხარჯების ცუდი შეფასება, თუ სუსტი კოორდინაცია, შეიძლება გამოიწვიოს ჯაჭვური რეაქცია თქვენს გუნდში.
თანამშრომლობა და გავლენა
პროდუქტის განვითარების გუნდები შედგება ინჟინრებისგან, დიზაინერებისგან, მარკეტინგის, იურიდიული და სხვა სპეციალისტებისგან – თვით პროდუქტის სპეციფიკის მიხედვით. თითოეულ გუნდს აქვს საკუთარი ექსპერტიზა და პრიორიტეტები. PM პასუხისმგებელია ყველას გაერთიანებაზე და იმის უზრუნველყოფაზე, რომ ყველამ შეძლოს საბოლოო მიზნისკენ შეუფერხებლად სვლა. ამისათვის თქვენ უნდა გქონდეთ სხვებზე დარწმუნებისა და გავლენის მოხდენის უნარი.
პროდუქტის გრძნობა
როგორც PM-ს, თქვენ უნდა გესმოდეთ მომხმარებლის საჭიროებები, შენიშნოთ ბაზრის შესაძლებლობები და შექმნათ პროდუქტები, რომლებიც რეალურ პრობლემებს წყვეტს. ძლიერი პროდუქტის გრძნობა საშუალებას აძლევს PM-ებს გამოავლინონ მომხმარებლის არსებული პრობლემური წერტილები და ინტუიციურად იგრძნონ, რა პრობლემები შეიძლება წარმოიქმნას მომავალში.
სტრატეგიული აზროვნება
უნდა შეგეძლოთ თქვენი პროდუქტის ან ინდუსტრიისთვის რელევანტური საბაზრო ტენდენციების წინასწარ განჭვრეტა, სწრაფი მოგებების მიღწევის დაბალანსება გრძელვადიან ორგანიზაციულ მიზნებთან და იმის გაგება, თუ როგორ უწყობს ხელს თქვენი პროდუქტის მუშაობა ბიზნესს.
წყარო: HBR
