როგორ შეუძლია ბრენდს კონკურენციის გაწევა? ბევრი ბრენდის ძალისხმევა მიმართულია საკუთარი ძლიერი მხარეების მარკეტინგულად წარმოჩენისკენ და არა კონკურენტების შესწავლისკენ. როდესაც ისინი კონკურენციაზე საჯაროდ საუბრობენ, როგორც წესი, სხვებს აკრიტიკებენ. წარმოიდგინეთ, Mac VS PC ტიპის რეკლამა, სადაც PC-ის მომხმარებელს, რომელსაც კოსტიუმი აცვია, მოჰყავს Mac-ის მომხმარებელი, რომელიც ახალგაზრდაა და ჰუდშია გამოწყობილი. ან Pepsi-სა და Cola-ს შორის გაჩაღებული ხანგრძლივი ომი, ან, ლუდის ბრენდების დაპირისპირება… ეს მიდგომა გასაგებია, თუმცა სხვა გზაც არსებობს. მაგალითად, PlayStation-მა და Xbox-მა ღიად მიულოცეს Nintendo-ს გეიმინგ სისტემა Switch-ის გაშვება. Oreo-მ – Twitter-ზე KitKats შეაქო, ხოლო New York Times-მა მთელი გვერდი მიუძღვნა მომხმარებლებისთვის სხვა სანდო წყაროების გაზიარებას. სამყაროში, სადაც მომხმარებლები ძალიან დაიღალნენ დაყოფით, ერთმანეთის კრიტიკით, უფრო დასაფასებელია მეგობრული ტონი კონკურენტების მიმართ. აქ უკვე ჩნდება კითხვა: ხომ არ დაგვაზიანებს კონკურენტის ქება?
ამ საკითხის შესასწავლად, 11 ექსპერიმენტის ფარგლებში, 4000 მომხმარებელი შეისწავლეს. მათ შეამჩნიეს – როდესაც ბრენდი კონკურენტს აქებს, მომხმარებლებს მის მიმართ უფრო დადებითი განწყობა უჩნდებათ და მეტად ლოიალურები ხდებიან.
ერთ-ერთი კვლევის მონაწილეებს გააცნეს KitKat-ის ტვიტი, სადაც ის Twix-ს დაბადების დღეს ულოცავდა და აღნიშნავდა, რომ Twix ძალიან გემრიელია. მონაწილეთა მეორე ნაწილს ასევე აჩვენეს ტვიტი, სადაც KitKat საკუთარ პროდუქტს აქებდა. 11 დღის შემდეგ, იგივე ადამიანები გამოკითხეს და აღმოჩნდა, რომ პირველი ჯგუფის მონაწილეები 34%-ით ხშირად ყიდულობდნენ KitKat-ს, ვიდრე მეორე ჯგუფი. აღსანიშნავია, რომ მომხმარებლები იმავე სიხშირით ყიდულობდნენ Twix-ს, როგორც მანამდე. ამდენად, კონკურენტის ქებას Twix-ის გაყიდვების ზრდაზე არ უმოქმედია. შემდეგ, იგივე კვლევა სხვადასხვა ინდუსტრიისთვის ჩაატარეს და ეფექტი მსგავსი იყო. აღმოჩნდა, რომ მიზეზი მომხმარებლების აღქმაში იყო – როდესაც ბრენდი კონკურენტს აქებდა, მომხმარებლებისთვის უფრო მეტად ახლობელი, დაფიქრებული, კეთილი, სანდო და თბილი ხდებოდა. შედეგად, ისინი უფრო მეტად ცდილობდნენ ბრენდის წახალისებას სოციალურ ქსელებში, ხშირად ნახულობდნენ მათ რეკლამას, ტოვებდნენ დადებით უკუკავშირს და მეტად ყიდულობდნენ მათ პროდუქტს.
ცხადია, ბრენდებისთვის ამ სტრატეგიას განსხვავებული ეფექტი აქვს. როგორც აღმოჩნდა, კომერციული ბრენდები მეტად იგებენ ამ მიდგომით, რაც მათი სიცივით იყო განპირობებული, რის ფონზეც კონკურენტის შექება მოულოდნელი აღმოჩნდა. ამას გარდა, მკვლევრებმა შენიშნეს, რომ ეს მიდგომა უშუალოდ კონკურენტ ბრენდზე მუშაობდა და არა ისეთ კომპანიაზე, რომლებიც მათთან კავშირში არ იყვნენ.
კვლევის ფარგლებში, ასევე, შენიშნეს, რომ ის მომხმარებლები, ვინც უფრო სკეპტიკურად ეკიდებოდნენ რეკლამას, უფრო მეტად დადებითად აფასებდნენ ბრენდის მიერ კონკურენტის მხარდაჭერას. საბოლოო ჯამში, არ არსებობს უნივერსალური გადაწყვეტა. ყოველმა ორგანიზაციამ ინდივიდუალურად უნდა განსაზღვროს მიდგომა, რომელიც უფრო მეტად ეფექტური და ავთენტური იქნება მისთვის. ზემოხსენებული კვლევა მხოლოდ იმის დასტურია, რომ კონკურენტების ქებას დიდი სარგებელის მოტანა შეუძლია თქვენთვის და თქვენი კომპანიის გაყიდვებისთვის. ამას გარდა, სამყაროში, რომელიც სულ უფრო ცინიკური და კონფლიქტურია, ბრენდებს სულაც არ აწყენთ ცოტაოდენი პოზიტივი.
წყარო: HBR
