„არავის მოსწონს, როცა ატყუებენ“, – ეს ფრაზა უტყუარი ჭეშმარიტებაა და არც არავინ შეეცდება საპირისპიროს დამტკიცებას.
არსებობს ფრაზა-ჭეშმარიტებები, რომელსაც ადამიანის არაცნობიერი გაპროტესტების გარეშე იღებს, რადგან ეს არის მოცემულობა, რომელიც ეჭვს არ იწვევს. ასეთი ფრაზები მტკიცებულებითი ხასიათისაა და ძირითადად ძალიან ბანალურად ჟღერს. მაგალითად: „ყველა დედას უყვარს თავისი შვილი“, „ჩვენ ყველანი ვუშვებთ შეცდომებს“, „ადამიანები იცვლებიან“ და ა.შ.
საყოველთაოდ ცნობილ ჭეშმარიტებას ეწოდება ტრუიზმი და ძალიან ფართოდ გამოიყენება რეკლამაში. ერთი შეხედვით განსაკუთრებული არაფერია. თუმცა გეტყვით, რომ ერთ-ერთი კარგი ტექნიკაა ადამიანის ტრანსულ მდგომარეობაში შესაყვანად. ამგვარი ფრაზები ამაღლებს მოსაუბრის ნდობას თქვენი გამონათქვამებისადმი და ეს პროცესი მიმდინარეობს არაცნობიერის დონეზე. უტყუარ ჭეშმარიტებას არ სჭირდება დაფიქრება, ამიტომ ყოველგვარი ფილტრაციის გარეშე ხვდება თქვენს არაცნობიერში. ტრუიზმის გამოყენებით შეგიძლიათ შეადგინოთ წინადადებები და ამით მოახდინოთ მსმენელის ფოკუსის არევა, უტყუარ ჭეშმატირებასთან ერთად მის არაცნობიერში დალექოთ თქვენთვის საჭირო ინფორმაცია.
ამ ტიპის მანიპულაციებს ხშირად იყენებენ ბიზნეს მოლაპარაკებების დროს. მაგალითად: უკვე 20 წუთია განვიხილავთ ამ საკითხს, დროა მივაღწიოთ შეთანხმებას. უტყუარ ჭეშმარიტებას (20 წუთია განვიხილავთ ამ საკითხს) მიება ბრძანება (დროა მივაღწიოთ შეთანხმებას). შეთანხმება კი დადებითი მოვლენაა. ამ დროს მოსაუბრეს გაუჭირდება იფიქროს ან გააჟღეროს ნეგატიური პოზიცია.
ტრუიზმის კონსტრუირებისას გამოიყენება – ზოგჯერ, ზოგიერთი/ზოგი, ყველა, ასეც ხდება, შესაძლოა, შეუძლია, აქვს უფლება და სხვ.
ამ ტიპის NLP ტექნიკებით გაჯერებულია რეკლამები. მათ შორის აღმოვაჩინე ქართული სარეკლამო მაგალითიც. ალბათ ყველას გახსოვთ სარეკლამო კამპანია „ყაზბეგისგან“– „ჩემპიონები სვამენ ცივ ჩაის“. ეს არის ტრუიზმის მაგალითი. ჩვენ ყველას გვინდა ვიყოთ ჩემპიონები ჩვენს საქმეში. ალბათ ერთხელ მაინც გვაქვს შედგენილი ის ტექსტი, რომელსაც წარმოვთქვამდით „ოსკარის“ მიღებისას ამ ფრაზის მოსმენისას არაცნობიერისთვის განკუთვნილი მეტა-შეტყობინება ხდება უტყუარი ჭეშმარიტება – თუკი ჩვენ ვართ „ჩემპიონები“ შესაბამისად, მივირთმევთ ცივ ჩაის. შედეგად ასოცირება ხდება „ყაზბეგის“ პროდუქციასთან.
საინტერესოა, რომ ამ ტიპის კონსტრუქციებს, მიუხედავად იმისა, გვსმენია ტრუიზმის შესახებ თუ არა, დაუფიქრებლად ვიყენებთ ყოველდღიურ ცხოვრებაში. უბრალოდ ამას არ აქვს სტრუქტურირებული და მიზანმიმართული ფორმა. ზოგ ადამიანს ჰიპნოტური სასაუბრო ტექნიკები ბუნებრივად აქვს გამჯდარი გონებაში, ზოგისთვის კი ეს უცხო ხილია. შესაბამისად, ადამიანები იყოფიან კატეგორიებად „კარგი“ და „ცუდი“ კომუნიკატორები. „კარგი“ კომუნიკატორები აღწევენ წარმატებებს, აიღეთ მაგალითი მათგან!
იგივე კონსტრუქცია არის გამოყენებული სარეცხი ფხვნილის რეკლამაში. „კარგი დიასახლისები ირჩევენ ტაიდს“. რატომ მაინცდამაინც „ტაიდი“ და რა კავშირშია ეს კარგ დიასახლისობასთან?
არ არსებობს NLP ტექნიკა, რომელიც არ აქვს გამოყენებული „მაკდონალდს“. 1998-2003 წლებში იაპონიაში “მაკდონალდსის“ სლოგანი იყო Everyone loves McDonald’s.
თუმცა, „მაკდონალდსამდე“ ბევრად ადრე, 1985 წელს ეს ფრაზა საკმაოდ საინტერესოდ გამოიყენა მისმა კონკურენტმა KFC.
https://www.youtube.com/watch?v=PRJqSkT4HsQ
კიდევ ერთი ქართული მაგალითი: Windfor’s-ის მიერ გადაღებულ რეკლამაში მოისმენთ ფრაზას: „ყველა საუბრობს ახალ წელს და უმეტესობა ამას ჯეოსელის მეშვეობით აკეთებს. ჩვენ ყველაზე მეტნი ვართ“. ყველა საუბრობს ახალ წელს – ტრუიზმი, რასაც მოჰყვება მეტა-შეტყობინებები.
საინტერესოა, რომ Windfor’s-ის მიერ შექმნილ რეკლამებში მრავლად არის გამოყენებული NLP ტექნიკები, რასაც აუცილებლად მივუძღვნი ცალკე სტატიას.
ავტორი : ირინა ჭოჭუა
