თუ გაინტერესებთ, რა შუაშია სარეცხი მანქანის სურათი ამ თემასთან, გეტყვით, რომ ეს არის ის, რაც ბრენდინგზე საუბრისთვის კარგ კონტექსტს გვთავაზობს. ალბათ, თქვენ ან თქვენ ირგვლივ მყოფთ გქონიათ შემთხვევა, როცა სარეცხი მანქანა გაფუჭდა, შეკეთებას აღარ ექვემდებარებოდა და ამის გამო ახლის შეძენა მოგიწიათ… და რა შუაშია ეს ბრენდინგთან? როცა მაღაზიაში ახალი სარეცხის მანქანის საყიდლად შეხვალთ, შემოგთავაზებენ ბრენდებს დაწყებული Maytag-დან Samsung-მდე. იმის გამო, რომ ეს ცნობადი ბრენდებია თქვენში დადებით შთაბეჭდილებას აღძრავს, მაგრამ მაინც ვერ იპოვით იმას, რაც უპირობოდ შეგიძლიათ აირჩიოთ, მაგალითად, ისე, როგორც Apple გვიმარტივებს საქმეს არჩევანის გაკეთებისას.
დიახ, მსგავსი ე. წ. shortcut ბრენდები პროდუქტების შედარების თავიდან არიდების ფუფუნებას გაძლევთ. ბრენდის სახელი კი თავისთავად ძლიერ თვისებებზე დაფუძნებულ ასოციაციებს იწვევს ისევე, როგორც ძლიერ ემოციურ კავშირს. ხოლო, როცა ბრენდის სახელი არ გეხმარებათ არჩევანის გაკეთებაში, თქვენ მახასიათებლების შედარებას იწყებთ და იმედოვნებთ, რომ თქვენი არჩევანი თქვენივე საჭიროებებს დააკმაყოფილებს.
თუმცა shortcut ბრენდების რაოდენობა დღეს არც ისე დიდია, განსაკუთრებით კი საყოფაცხოვრებო ტექნიკაში. ფაქტია, რომ პროდუქტებისა და სერვისების ფართო სპექტრის დიფერენციაცია წლების განმავლობაში მცირდება. ეს კი გადაწყვეტილების მიღების პროცესს მეტად ართულებს — თქვენ ადარებთ ბრენდებს, მოდელებს, ზომას, ფასს და ა. შ. ან ვის რეკომენდაციას უნდა დაუჯეროთ? მეგობრების თუ კონსულტანტების? რომელიც არ უნდა აირჩიოთ, ამას დრო სჭირდება, თუმცა ყველა შემთხვევაში მყიდველებს სურთ, 100 ვარიანტი კი არა, ტოპ 3 შესთავაზონ…
ადამიანებს სურთ სიმარტივე, მოხერხებულობა, სიამოვნების მიღება… ისინი ამას წარმატებით ახერხებენ კიდეც, რადგან ბოლო დროს კითხვა „რა?“ „როგორ?“-ით შეიცვალა და დღევანდელი წარმატებული ბიზნესების უკან მდგომი მამოძრავებელი ძალაც გახდა. ჭკვიანი მოაზროვნეები და ინოვატორები ყოველდღიურ გამოცდილებას გარდაქმნიან და ჩვენს ქმედებებს აანალიზებენ. ისინი გვიბიძგებენ ჩვენივე ძველი ჩვევები თუ ქმედებები ახალი, უკეთესი გზებით ჩავანაცვლოთ. ხოლო იმის გამო, რომ გამოცდილების დიფერენციაცია პროდუქტის დიფერენციაციაზე უფრო რთულია, ეს ჯგუფი კონკურენტულ უპირატესობას იძენს.
გამოდის, წარმატებას აღწევს ის, ვინც სვამს კითხვას „როგორ?“, ვინც მომხმარებელთა პრობლემებს რაიმე ახლის შექმნით კი არ აგვარებს, არამედ იმ გამოცდილების შეცვლით, რასაც ადამიანები ყოველდღიურად იღებენ. ისინი იაზრებენ, რომ მსგავსად, კონკურენტული უპირატესობისა და ლოიალური მომხმარებლების მოპოვებაც შესაძლებელია.
