X-ის ყოფილი ინჟინრების მიერ შექმნილი AI-სტარტაპი Particle ახალ მიმართულებაზე გადაერთო. კომპანია პოდკასტებში არსებული საუბრების ინდექსირებასა და მათ საძიებლად ხელმისაწვდომად ქცევაზე მუშაობს.
ახალ პროდუქტს ჰქვია Radar. ეს არის პოდკასტების საძიებო სისტემა, რომელიც აუდიოს მხოლოდ ტრანსკრიფციად არ გარდაქმნის. სისტემა შინაარსსაც აანალიზებს, რის შედეგადაც მომხმარებელს შეუძლია კონკრეტული თემების, ადამიანების, კომპანიების, ბრენდებისა და პროდუქტების შესახებ პოდკასტებში გაკეთებული ჩანაწერების მოძიება, ასევე, მნიშვნელოვანი ციტატებისა და ფრაგმენტების აღმოჩენა.
Radar-ის შექმნის იდეა Particle-ის საინფორმაციო აპლიკაციის ერთ-ერთი პოპულარული ფუნქციიდან გაჩნდა. აპლიკაცია პოდკასტებიდან საინტერესო ფრაგმენტებს ავტომატურად პოულობდა და შესაბამისი ახალი ამბების გვერდით აჩვენებდა. მოგვიანებით კომპანიამ დაინახა, რომ ამ ტექნოლოგიის გამოყენება მხოლოდ საინფორმაციო აპლიკაციით არ უნდა შემოიფარგლებოდეს და პოდკასტების მონაცემებზე წვდომა სხვა ბიზნესებისთვისაც შეიძლება ღირებული აღმოჩნდეს.
Radar ამჟამად 130 000-ზე მეტ პოდკასტს უკეთებს ტრანსკრიფციას. ის მოიცავს Apple-ის Top 200 პოდკასტს მისი 135 კატეგორიიდან, ხოლო ყოველდღიურად ინდექსს დაახლოებით 20 000 ახალი ეპიზოდი ემატება.
ტრანსკრიფციებთან ერთად სისტემა მოსაუბრეებსაც ამოიცნობს და დამატებით მეტამონაცემებს აგროვებს. Radar-ს შეუძლია განსაზღვროს, რომელი ადამიანები, კომპანიები, ბრენდები, პროდუქტები და თემები განიხილება კონკრეტულ ეპიზოდში.
სისტემა ასევე აკვირდება კონკრეტული ობიექტებისა და ადამიანების ხსენებას სხვადასხვა პოდკასტში და მომხმარებელს შეტყობინებას უგზავნის მაშინ, როდესაც სასურველი თემა ან სახელი რომელიმე ეპიზოდში გამოჩნდება. შეტყობინებების მიღება შესაძლებელია ელექტრონული ფოსტით, Slack-ის ან webhook-ის საშუალებით.
მომხმარებელს შეუძლია შეტყობინებების ფილტრაციაც. მაგალითად, Radar შეიძლება დაყენდეს ისე, რომ შეტყობინება მხოლოდ მაშინ გაიგზავნოს, როდესაც კონკრეტული სტუმარი კონკრეტულ თემაზე საუბრობს. ძიება შესაძლებელია ასევე პოდკასტების რეიტინგის ან პოპულარობის მიხედვით.
Radar პოდკასტების სრულად მოსმენის საჭიროებასაც ამცირებს. სისტემა წინასწარ არჩევს მნიშვნელოვან ფრაგმენტებს, რაც მომხმარებელს საშუალებას აძლევს, ეპიზოდის ძირითადი შინაარსი რამდენიმე მონაკვეთის მოსმენით გაიგოს.
Radar მხოლოდ საუბრების ანალიზით არ შემოიფარგლება. პლატფორმას შეუძლია პოდკასტებში განხილული თემების, სტუმრების, რეკლამების, მსმენელთა შეფასებებისა და მიმოხილვების მონიტორინგიც.
განსაკუთრებით საინტერესოა პოდკასტების რეკლამების საძიებო სისტემა, რომლის საშუალებითაც შესაძლებელია კონკრეტული კომპანიის მიერ განთავსებული რეკლამების მოძიება სხვადასხვა ეპიზოდში.
Radar ფასიანი აპლიკაციაა და მისი ინდივიდუალური გეგმა თვეში 29 დოლარი ღირს.
Particle-ის გრძელვადიანი გეგმა პოდკასტების ფარგლებსაც სცდება. კომპანია მომავალში Radar-ის შესაძლებლობების სხვა ტიპის აუდიოკონტენტზე გავრცელებას გეგმავს, მათ შორის YouTube-ის ვიდეოებსა და საინფორმაციო კლიპებზე.
