რა მოხდება, თუ გეტყვით, რომ იყო დრო, როდესაც Nike სპორტული ფეხსაცმლის ბაზარზე არ ლიდერობდა? თანამედროვე გამოსახედიდან, ეს ძნელი დასაჯერებელია, თუმცა 1980-იან წლებში არც Nike და არც adidas არ აკონტროლებდნენ ამერიკული ბაზრის დიდ წილს. ამ პერიოდში სპორტულ ინდუსტრიაში აღზევებული ბრენდი იყო Reebok.
Reebok-ის სახელი ამჟამად სპორტული მიღწევებისა და ფიტნესკულტურის სინონიმია,მას კი საუკუნეზე მეტი ხნის, საკმაოდ მდიდარი და დინამიკური ისტორია აქვს. პატარა ინგლისურ ქალაქში დაარსებიდან დაწყებული, სპორტული ტანსაცმლის ინდუსტრიაში გლობალური ძალის მოპოვებამდე – Reebok-ის მოგზაურობა ასახავს ინოვაციას, ადაპტაციას და მთელი მსოფლიოს მასშტაბით, სპორტსმენებისა და ფიტნესმოყვარულების გაძლიერებისადმი ერთგულებას.
ადრეული წლები
Reebok-ის ფესვები 1895 წლით თარიღდება. ინგლისის ქალაქ ბოლტონში ფეხსაცმლის მწარმოებელმა, სახელად ჯოზეფ უილიამ ფოსტერმა, რომელიც მხოლოდ 14 წლის იყო, მამამისის ტკბილეულის მაღაზიის ზემოთ მდებარე საძინებელში დაიწყო სარბენი ფეხსაცმლის დამზადება წვეტიანი ცხვირებით. მისმა ინოვაციურმა დიზაინმა მას საშუალება მისცა დაეარსებინა J.W. Foster and Sons, კომპანია, რომელმაც სწრაფად მოიპოვა აღიარება და 1924 წლის ოლიმპიურ თამაშებზე სპორტსმენებსაც კი ამზადებდა. მოგვიანებით მან შვილებთან ერთად გახსნა პატარა ქარხანა.
კომპანიამ დაიწყო თავისი ფეხსაცმლის დისტრიბუცია მთელ გაერთიანებულ სამეფოში და მის წარმოებულ ფეხსაცმელს ბრიტანელი სპორტსმენები იცვამდნენ. პროდუქტი განსაკუთრებით ცნობილი გახდა, როცა 1924 წლის ზაფხულის ოლიმპიურ თამაშებზე ჰაროლდ აბრაჰამსმა ჩაიცვა და იასპარეზა.
1958 წელს ფოსტერის ორმა შვილიშვილმა, ჯო და ჯეფ ფოსტერებმა, დააარსეს ახალი კომპანია სახელწოდებით Reebok – სახელი შთაგონებული იყო აფრიკული რებოკით, ანტილოპას სახეობით სამხრეთ აფრიკული ლექსიკონიდან.
აშშ-ის ბაზარზე შეღწევა
დიდი ბრიტანეთის გარეთ შედარებით უცნობ კომპანიად რჩებოდა 1979 წლამდე, სანამ ამერიკელმა ბიზნესმენმა პოლ ფაირმენმა ბრენდი საერთაშორისო სავაჭრო გამოფენაზე აღმოაჩინა. მისი პოტენციალის გაცნობიერებით, ფაირმენმა მოიპოვა Reebok-ის შეერთებულ შტატებში დისტრიბუციის უფლება.
დიდი გარღვევა მოხდა 1982 წელს, Reebok Freestyle-ის გამოსვლით – პირველი სპორტული ფეხსაცმელი, რომელიც სპეციალურად ქალებისთვის და აერობიკისთვის იყო შექმნილი. ეს იმ პერიოდში მოხდა, როცა ფიტნესი ნელ-ნელა პოპულარული აქტივობა ხდებოდა.
Reebok-ის ელეგანტურმა, მსუბუქმა ფეხსაცმელმა და მზარდ ფიტნესმოძრაობაში ჩართულობამ 1980-იანი წლების შუა პერიოდისთვის ბრენდმა Nike-საც გაუწია კონკურენცია. 1987 წელს კი გაუსწრო კიდეც პოპულარობით.
Pump-ის ერა და ინოვაცია
1989 წელს Reebok-მა გამოუშვა თავისი ერთ-ერთი ყველაზე ემბლემატური ინოვაცია: Reebok Pump. ამ მაღალტექნოლოგიურ კალათბურთის ფეხსაცმელს ჰქონდა შიდა გაბერვის მექანიზმი, რომელიც ზომის მორგებას უწყობდა ხელს. ის ცნობილი გახდა NBA-ს ვარსკვლავის, დი ბრაუნის წყალობით. Pump კულტურულ ფენომენად იქცა და Reebok-ს დაეხმარა კონკურენტუნარიანობის შენარჩუნებაში მაღალი ხარისხის ფეხსაცმლის ბაზარზე.
Reebok-მა განაგრძო დივერსიფიკაცია 1990-იან წლებში, სპორტის სხვადასხვა სახეობაში სპორტსმენების მხარდაჭერით, NFL-ისა და NBA-ს სპონსორობით და ყოველდღიური სპორტული ფეხსაცმლის წარმოებაც დაიწყო.
კორპორაციული ცვლილებები და განახლებული ფოკუსი
2000-იანი წლების დასაწყისში, Nike-ისა და Adidas-ის მხრიდან გაზრდილი კონკურენციის წინაშე, Reebok-მა ცხოვრების სტილის ბრენდინგსა და ცნობილ ადამიანებთან თანამშრომლობაზე გადავიდა. მათ შორის იყვნენ Jay-Z და 50 Cent. მიუხედავად იმისა, რომ Reebok-ის მიმზიდველობამ წარმატებას მიაღწია, მისი იმიჯი დაეცა.
2005 წელს Adidas-მა Reebok 3.8 მილიარდ დოლარად შეიძინა, რათა ძლიერი მხარეების გაერთიანებით Nike-ისთვის უკეთესი კონკურენცია გაეწია. ამ შენაძენმა სტრატეგიული ცვლილებები გამოიწვია, მათ შორის ფიტნესსა და CrossFit-ზე უფრო მეტი ფოკუსირება. Reebok CrossFit Games-ის ოფიციალური სპონსორი გახდა და ფუნქციური ფიტნესის მოძრაობას შეუერთდა.
ფესვებთან დაბრუნება
2020-იან წლებში Reebok-მა ყურადღება გაამახვილა თავის წარმატებულ მემკვიდრეობაზე და ახალი თაობებისთვის ხელახლა წარადგინა კლასიკური მოდელები, როგორიცაა Club C, Classic Leather და Workout Plus. ბრენდმა ასევე მიაღწია წარმატებას მდგრადი განვითარებისა და ინკლუზიური ფიტნესის მიმართულებით.
2021 წელს Adidas-მა Reebok დაახლოებით 2.5 მილიარდ დოლარად მიჰყიდა Authentic Brands Group-ს (ABG). ABG-ის ფარგლებში Reebok პოზიციონირებს, როგორც მემკვიდრეობითი ბრენდი ძლიერი რეტრო მიმზიდველობით, ამავდროულად ინარჩუნებს აქტუალობას ფიტნესისა და ქუჩის სტილის კულტურაში.
მე-19 საუკუნის ინგლისში დამზადებული წვეტიანი სარბენი ფეხსაცმლით დაწყებული ისტორია დღესაც ახალ თავებს წერს. მის გზაზე იყო აღმასვლაც და დაღმასვლაც, თუმცა მემკვიდრეობა, რომელიც ამ ბრენდმა შექმნა, შეუდარებელია.
ბიზნესისტორიებს წარმოგიდგენთ „ალიანს ჯგუფი”.
