თუკი თვლით, რომ დროა, დაასრულოთ ოფისურ გარემოში მუშაობა და ისეთი დისტანციური სამსახური იპოვოთ, რომელიც მართლა გსურთ, ამ პლატფორმებს უნდა გაეცნოთ. სამწუხაროდ, 21-ე საუკუნის სამსახურს მე-20 საუკუნის მეთოდებით ვერ იპოვით. თუ ჯერ კიდევ ტრადიციულ, „ყველაფერი ერთად“ ტიპის საიტებს სქროლავთ და ერთ ვაკანსიაზე გაგზავნილ 5000 რეზიუმეს შორის იკარგებით, სტრატეგია უნდა შეცვალოთ. არსებობს სპეციალიზებული პლატფორმები, რომლებიც ძიების პროცესს რადიკალურად ცვლის.
გაეცანით პლატფორმას We Work Remotely, რომელსაც დისტანციური სამყაროს „ვეტერანად“ მოიხსენიებენ. ის 2011 წლიდან არსებობს, რაც ინტერნეტის საზომით თითქმის ქვის ხანას უტოლდება, თუმცა ის დღემდე ინარჩუნებს ძლიერ პოზიციას. მისი მთავარი ხიბლი სიმარტივეშია – არანაირი ზედმეტი დეტალი, მხოლოდ კატეგორიების მკაფიო ჩამონათვალი და რეალური დისტანციური ვაკანსიები. ვინაიდან კომპანიები აქ განცხადების განთავსებისთვის თანხას იხდიან, პრაქტიკულად გამორიცხულია გადააწყდეთ სპამს ან უშინაარსო განცხადებებს, რაც ასე ხშირია უფასო დაფებზე.
თუ უსაფრთხოება და ხარისხი თქვენთვის პრიორიტეტულია, FlexJobs საუკეთესო არჩევანია. მართალია, ეს გამოწერაზე დაფუძნებული სერვისია და შესაძლოა, სამსახურის მაძიებლისთვის ფულის გადახდა ცოტა პარადოქსულად ჟღერდეს, მაგრამ ამას თავისი მიზეზი აქვს: პლატფორმას ჰყავს თანამშრომლების გუნდი, რომლებიც თითოეულ განცხადებას ხელით ამოწმებენ და ფილტრავენ. თუ დაიღალეთ „სახლიდან მუშაობის“ ისეთი შეთავაზებებით, რომლებიც საბოლოოდ პირამიდულ სქემად ან საეჭვო გაყიდვების სქემად აღმოჩნდება ხოლმე, FlexJobs დაგაინტერესებთ.
მათთვის კი, ვინც ტექნოლოგიურ სიახლეებს ეძებს, Remote OK იდეალური ვარიანტია. თუ We Work Remotely ინდუსტრიის უფროსი წარმომადგენელია, ეს პლატფორმა მის თანამედროვე, ტექნოლოგიურად განვითარებულ ვერსიად შეგვიძლია მოვიაზროთ. საიტი შექმნილია მათთვის, ვისაც ლეპტოპით მუშაობა ნებისმიერი ადგილიდან სურს, იქნება ეს მისაღები ოთახი თუ კაფე მსოფლიოს ნებისმიერ წერტილში. მისი მთავარი უპირატესობა ეფექტური ფილტრებია: თქვენ შეგიძლიათ დაალაგოთ ვაკანსიები ხელფასის დიაპაზონის (დიახ, რეალური რიცხვებით), ტექნოლოგიური ბაზისა და ისეთი ბენეფიტების მიხედვითაც კი, როგორიცაა ჯანმრთელობის დაზღვევა ან 4-დღიანი სამუშაო კვირა.
კიდევ ერთი საინტერესო რესურსია Remote.co, რომელიც FlexJobs-ის შემქმნელთა გუნდმა დააარსა. თუმცა, მისი ფასიანი „ძმისგან“ განსხვავებით, ეს უფასო, მაღალი ხარისხის რესურსია, რომელიც მხოლოდ ვაკანსიების ჩამონათვალს არ გვთავაზობს. პლატფორმის ერთ-ერთი საუკეთესო ფუნქცია კომპანიების შიდა სამზარეულოს გაცნობაა – აქ შეგიძლიათ წაიკითხოთ ინტერვიუები 100-ზე მეტ დისტანციურ კომპანიასთან და გაიგოთ, როგორ უმკლავდებიან ისინი კომუნიკაციასა თუ დროის სარტყლების ცვლილებას. ეს შესანიშნავი გზაა, გაიგოთ კომპანიის კულტურა მანამ, სანამ „გაგზავნის“ ღილაკს დააწვებით.
თუ თქვენი ოცნებაა, დისტანციურ მუშაობაში აქცენტი სიტყვა „დისტანციურზე“ და ლოკაციის თავისუფლებაზე გააკეთოთ, მაშინ Working Nomads დაათვალიერეთ. ეს საიტი სპეციალურად ციფრული მომთაბარეებისთვის (Digital Nomads) აქვეყნებს ვაკანსიებს, რაც იმას ნიშნავს, რომ დამსაქმებლების უმეტესობისთვის სულერთია, მსოფლიოს რომელი წერტილიდან იმუშავებთ. საიტს აქვს ეფექტური კატეგორიზაცია და ფერებით კოდირებული სისტემა სხვადასხვა ინდუსტრიისთვის, რაც ძიებას ამარტივებს. გარდა ამისა, ყოველდღიური შეტყობინებები საშუალებას გაძლევთ, მუდმივად საქმის კურსში იყოთ ისე, რომ საიტის გამუდმებით შემოწმება არ დაგჭირდეთ.
წყარო: Fastcompany
