10
Feb
2020

„ძალაუფლების სურვილი აქვს ყველას, მთავარია მისი რეალიზაციის სურვილი“ – რევაზ კოპალაძე

10 Feb 2020

„ძალაუფლების სურვილი აქვს ყველას, მთავარია მისი რეალიზაციის სურვილი. ყველაზე სასურველი გზა ძალაუფლების მოპოვების, მისი შენარჩუნების და შემდეგ რეალიზაციის არის სხვა ადამიანებზე, გარემოზე გავლენის მოხდენა, მათი გაუმჯობესების თვალსაზრისით“ , – ძალაუფლების მნიშვნელობასა და მისადმი სწრაფვაზე Marketer.ge-ის კონტრიბუტორმა და „კავკასუს ონლაინის“ გენერალურმა დირექტორმა რევაზ კოპალაძემ „მარკეტერის“ პოდკასტში ისაუბრა.

რევაზ კოპალაძე ამბობს, რომ ძალაუფლებას არ შეიძლება ჰქონდეს იმაზე დიდი და კარგი ამოცანა, ვიდრე სხვა ადამიანებსა და გარემოზე დადებით გავლენის მოხდენაა.

„მე-18 საუკუნეში, კემბრიჯის უნივერსიტეტის სტუდენტი იყო ტომას კლარკსონი. [ამ დროს] პლანეტის მოსახლეობის 2/3 იყო მონა და ეკონომიკის კიდევ ერთი ამდენი [წილი] მოდიოდა ამ ადამიანებით ვაჭრობაზე. [კლარკსონმა] სადიპლომო ნამუშევარში აღწერა მონების ყოფა და იმუშავა [იმდროინდელ] ეკონომიკურ სტრუქტურებზე. ეს იმდენად კარგად გამოუვიდა, ძალიან ბევრი ადამიანი და ჯგუფი დაინტერესდა. შემდეგ მას მოატარეს მთელი ინგლისი, ჩააწერინეს ამ ადამიანების [მონების] ყოფა და შემდეგ გამოაქვეყნეს. ისტორიკოსები სწორედ ტომას კლარკსონის სახელს უკავშირებენ ინგლისში, 1807 წელს მონობის გაუქმებას. წარმოიდგინეთ, გარეგნული ნიშნების თვალსაზრისით, ტომას კლარკსონს ძალაუფლების არანაირი ნიშანი არ ჰქონდა: არც ფული, არც მიწების მფლობელი იყო. რამ განაპირობა მისი წარმატება? იმან, რომ იყო გულწრფელი და ყოველგვარი მერკანტილური ინტერესის გარეშე. [იგივე მაგალითი] კორპორაციულ სივრცეში რომ ავიღოთ, მოპოვებულის შენარჩუნება ძალიან რთულია. ძალაუფლების შენარჩუნების სირთულე სწორედ იმაში მდგომარეობს, რომ ეს ძალაუფლება არასწორად რეალიზდება. ის არის არა სხვაზე ორიენტირებული, ემპათიური და სხვაზე თანაგრძნობით განმსჭვალული, არამედ ძალმომრეობაზე და საკუთარ თავზე კონცენტრირებული, მაგრამ ესეც ადამიანური ფაქტორია“.

რევაზ კოპალაძემ, პოდკასტში, იმაზეც ისაუბრა, როგორ უნდა ადაპტირდნენ, მუდმივად ცვალებად გარემოში მენეჯერები და როგორ შეუნარჩუნონ მოტივაცია საკუთარ გუნდს? ასევე – იმუნიტეტზე, რომელიც ნებისმიერ ადამიანს სჭირდება, რომ მზად იყოს მოვლენების ყველაზე მოულოდნელი განვითარებისთვისაც კი.

 

პოდკასტების სერია Marketer.ge-ზე გასულ წელს დაიწყო. ეს კიდევ ერთი საშუალებაა მენეჯერებს, მეწარმეებს, მარკეტერებს, ზოგადად, ბიზნესის წარმომადგენლებს ახალი გზით წარვუდგინოთ საინტერესო ადამიანები, მოვასმენინოთ მათი ბიზნეს ისტორიები. პროექტის წარმდგენია „საქართველოს ბანკი“.

 

განხილვა