„დაგსიზმრებიათ, თუ არა გენიალური პროექტი, რომელსაც სანამ არ განახორციელებთ, მანამდე არც მადა გაქვთ, თათებიც გექავებათ და ერთი სული გაქვთ, როდის ნახავთ თქვენ მიერ ხორცშესხმულ იდეას? აი, სწორედ ასე იყო ჩემთანაც, როდესაც განდის ფრაზამ შთამაგონა ყველაფერი – „ცვლილებები შენგან უნდა იწყებოდეს“. ძაღლების ფეკალიებით გატენილ ქუჩებს რომ ვუყურებ, გული მიწუხდება, ამას უკვე 11 წელია განვიცდი. მაგრამ რა ვქნათ ჩვენ, ძაღლებმა, რომ ეს პატრონების მოსაგვარებელია და ფეკალიების აწმენდა ფიზიკურად არ შეგვიძლია“, – ასე იწყებს თბილისელი, მოგზაურობისა და სისუფთავის მოყვარული ძაღლი რინგო საკუთარ ვიდეობლოგს, რომლითაც ეკო-მეგობრული პროდუქტის – ძაღლის ფეკალიებისთვის განკუთვნილი ქისა „რინგოს“ შექმნის ისტორიასა და საჭიროებას გვიყვება.
„პრობლემა, რომელიც ჩვენს ქალაქში, რაც თავი მახსოვს, სულ მძვინვარებდა, არის ფეკალიებისგან დაბინძურებული ქუჩები და ცალსახად, არ იმსახურებს თბილისი ამდენ ჭუჭყსა და ნაგავს. სწორედ, ამ პრობლემის გადასაჭრელად მე ჩავდექი ჩვენი ქალაქის სამსახურში და შევქმენით ჩვენს გარემოსა და ბუნებაზე მზრუნველი ქისა, რომელიც დამზადებულია ქართული ტყავისგან (სურვილისამებრ დერმატინისგანაც), თქვენი ერთგული მეგობრების ქამარზე ჩამოსაკიდად. შიგნით კი, მოთავსებულია 20 ცალი ბიოდეგრადირებადი ერთჯერადი პარკი, რათა კომფორტულად შეძლოთ პატრონებმა ძაღლების ფეკალიების ქუჩიდან აწმენდვა“, – აღნიშნავს რინგო.
ზემოაღნიშნული იდეა რინგოს მოგზაურობისას გაუჩნდა. სწორედ ისე, როგორც მოგზაურს, რომელიც ცვლილებებზე ფიქრს სამშობლოდან შორს ყოფნის დროს იწყებს. „საკმაოდ ბევრ ქვეყანაში ვიმოგზაურე და ვნახე არაერთი ლამაზი და კოხტა ქალაქი და ჩემი საბოლოო პროექტის შთაგონების წყაროც სწორედ თბილისზე მოვლილი, სუფთა და წკრიალა ქალაქები იყო“, – ამბობს ის ერთ-ერთ ვიდეოდღიურში.
