როგორც ჩანს, საბავშვო ვიდეო თამაშს Roblox სერიოზული პრობლემები შეექმნა სექსუალური ხასიათის შინაარსთან და რასიზმთან დაკავშირებით. BBC-ის ცნობით, თამაშში ნახევრად შიშველი ავატარები სხვა მომხმარებლებისთვის შიშვლები ცეკვავენ. ერთ-ერთ ავატარს ნაცისტური ფორმაც კი ეცვა.
მოხსენების თანახმად, გეიმერები ვირტუალურ “ბინებში” ხვდებიან, რათა ინტიმურ საკითხებზე ისაუბრონ და სექსით დაკავდნენ. რა თქმა უნდა, ეს დიდი პრობლემაა, რადგან მოთამაშეთა უმეტესობა ბავშვია და ტექნიკურად, 13 წლამდე ბავშვებსაც კი აქვთ თამაშის უფლება. მსგავსი ტიპის შემთხვევები ერთ საათზე ნაკლებს გრძელდება, ვიდრე წაიშლება, როგორც მოდერატორების, ისე ავტომატური სისტემების მიერ… თუმცა ეს სულაც არ ამსუბუქებს სიტუაციას.
“Roblox-ზე ატვირთული თითოეულ სურათზე, ვიდეოსა და აუდიო ფაილზე ვატარებთ უსაფრთხოების შემოწმებას, ადამიანისა და მანქანების ამოცნობის კომბინაციით”, — ამბობს თამაშის დეველოპერი. კომპანიამ “მშობელთა კონტროლის” მექანიზმიც შეიმუშავა, რომლის მეშვეობითაც, გარკვეული შეზღუდვების დაწესებაა შესაძლებელი.
“მრავალფეროვანი საზოგადოების ზრდასთან ერთად, გაიზარდა პლატფორმის ფუნქციონირება და რესურსები, რომლებიც საზოგადოების დაცვისა და გაძლიერებისთვის შევქმენით. წარვადგინეთ ახალი საიმედო სისტემები და გავაუმჯობესეთ არსებული — უფასო ინსტრუმენტების დიდი ნაკრები შევთავაზეთ ყველას, ვისაც Roblox-ის განვითარება სურს”, — აცხადებს კომპანია.
ამასთან, კომპანია ადასტურებს, რომ ის მსგავსი ფაქტების შესახებ დაუყოვნებლივ აცნობებს შესაბამის ორგანოებსა და ორგანიზაციებს.
ამავდროულად, პრობლემები შეექმნა Meta-ს — ზოგიერთი მომხმარებლის თანახმად, Horizon Worlds ვირტუალური რეალობის პლატფორმაზე მომხმარებლები სექსუალურად ავიწროებენ ქალებს. სპეციალისტების თქმით, ასეთი შემთხვევები სულაც არ არის გასაკვირი… “თქვენ გაქვთ ანონიმურობა და ეს პლატფორმა წარმოადგენს სივრცეს, სადაც შეგიძლიათ ის გააკეთოთ, რაც გსურთ”, — აღნიშნავს ციფრული ფსიქოლოგი ლირაზ მარგალიტი.
