„დამატებით 20%-იანი ფასდაკლება!“
„ბოლო შანსი!“
გეცნოთ ეს შეთავაზებები? და სინამდვილეშიც ასეა საქმე, სხვაგვარად რომ ვთქვათ, მართლა ღირს და კარგ შეთავაზებას გვიზიარებენ? ამ კითხვებს Consumer Reports-ის წარმომადგენელი ბრაიან ვაინსი და ლინდსი უიკსი პასუხობენ, Brad’s Deals-დან, ვებგვერდიდან, რომელიც ონლაინ საცალო ვაჭრობის შეთავაზებებს კურირებს. ისინი ხშირად გამოყენებულ გავრცელებულ მარკეტინგულ ტექნიკებს გვიზიარებენ, რომლებსაც კომპანიები იმისთვის იყენებენ, რომ მეტი ფული დაახარჯინონ სამიზნე სეგმენტს. თუმცა, ამის პარალელურად, მომხმარებლებსაც უზიარებენ რჩევებს, თუ როგორ არ უნდა მოექცნენ მარკეტინგულ ხაფანგებში:
პირველი ტექნიკა: გადაუდებლობის შეგრძნების შექმნა
როცა შოპინგისას ისეთ სიტყვებს დაინახავთ, როგორებიცაა „იყიდე ახლა“ / „ბრწყინვალე შეთავაზება“, მეტი სიფრთხილე გამოიჩინეთ. საცალო მოვაჭრეები გადაუდებლობის შეგრძნებას აჩენენ, რათა მომხმარებლებს ყიდვის გადაწყვეტილების სწრაფად მიღებისკენ უბიძგონ. მათ სულაც არ სურთ, რომ ძალიან ბევრი იმსჯელოთ ამ შესყიდვის პროცესზე. ამ სტრატეგიით მყიდველში რაღაცის გამოტოვების შიში იბადება, ეს აფიქრებინებს ადამიანებს, რომ მართლა ახლა თუ არ შეიძენენ, მსგავს შეთავაზებას ვეღარ მიიღებენ.
თუმცა, შემდეგ ჯერზე, როცა ამგვარ შეთავაზებას წააწყდებით, შეჩერდით და გახსოვდეთ, რომ კომპანიები გამუდმებით აწარმოებენ პროდუქტებს და არაფერსაც გამოტოვებთ. შესაძლოა, ყიდვის შემდეგ ბევრჯერ მიმხვდარხართ, რომ გადაუდებლობის შეგრძნების გამო შეიძინეთ რაღაც ნივთი და არა, რეალური საჭიროების… იმაზე იფიქრეთ, რომ, შესაძლოა, უკეთესი შეთავაზებაც იპოვოთ მით უმეტეს, თუ რაიმეს ყიდვას სეზონის ბოლოსთვის გადადებთ.
მეორე ტექნიკა: თავდაპირველი ფასის წინ წამოწევა
როცა ხედავთ, რომ თავდაპირველი ფასი 200 ლარია, ამჟამინდელი კი 75, მარტივია, მიგიზიდოთ ამ შეთავაზებამ. დიდი კონტრასტი არსებობს და განცდას აჩენს, რომ საუკეთესოა. თუმცა ხშირ შემთხვევაში თავდაპირველი ფასი სულაც არ არის 200… ამიტომ, ნებისმიერ შემთხვევაში დაფიქრდით არა სხვაობაზე საწყის და ფასდაკლებულ ფასებს შორის, არამედ იმაზე, გიღირთ თუ არა 75 ლარად კონკრეტული პროდუქტის შეძენა.
მესამე ტექნიკა: საწყისი ფასის გაზრდა
ესეც ზემოთ ხსენებულ საკითხს ეხმიანება — კიდევ ერთი საფასო სტრატეგია, რომელსაც საცალო მოვაჭრეები იყენებენ, კონკრეტული ნივთის საწყისი ფასის გაზრდაა მანამ, სანამ გაყიდვების ცხელი სეზონი დაიწყება. აი, უკვე ამ დროს კი მნიშვნელოვანი ფასდაკლებით შესთავაზებენ მას მომხმარებლებს, მათ შორის 40 და 50-პროცენტიანი სხვაობით.
ამიტომ, კარგი იქნება, თუ ფასების შედარებებს გააკეთებთ, მაგალითად, ონლაინ შესყიდვისას. ამასთან, კარგი იქნება, თუ კონკრეტულ პროდუქტს სხვა კომპანიასთანაც ნახავთ ან სულაც მეორეული ნივთების მაღაზიებში. ეს განსაკუთრებით სასარგებლოა ტანსაცმელების შემთხვევაში — შესაძლოა, აუთლეტში ზუსტად ის ჯინსი იპოვოთ იარლიყით, რომელიც საიტზე ორმაგი ღირს.
ხოლო, თუ ფიზიკურ მაღაზიებში გადაწყვეტთ შოპინგს, მანამდე მაინც გადახედეთ ონლაინ სივრცეს და მოიძიეთ უკეთესი ფასებით სხვა მაღაზიაში ხომ არ დაგხვდებათ მსგავსი შეთავაზება. შეგიძლიათ, კონკრეტული ნივთი ონლაინ კალათაშიც დაამატოთ და რამდენიმე დღის მანძილზე დააკვირდეთ, შეეცვლება თუ არა ფასი.
მეოთხე ტექნიკა: ფანტაზიების შექმნა
მარკეტერები ფანტაზიებს ყიდიან… თუნდაც სურათებზე ასახული იდეალური საშობაო ვახშმით, სადაც არავინ ჩხუბობს ან საკუთარი თითქოს უფრო თავდაჯერებული ვერსიის წარმოდგენაში გეხმარებათ. შედეგად კი ისეთი ნივთებით ავსებთ თქვენს კალათს, რომლებიც თითქოს მსგავსი იდეალების მიღწევაში გეხმარებათ. ამიტომ, შემდეგ ჯერზე კარგად დაფიქრდით, სანამ თავადაც ამ ფანტაზიებს შეჰყვებით, სანამ საკუთარ თავსა თუ ოჯახის იდეალური ვერსიებზე ფიქრებში გადაეშვებით.
ეს სულაც არ ნიშნავს იმას, რომ არაფერი უნდა იყიდოთ ახალ წელს, მნიშვნელოვანია, პროცესში გახსოვდეთ, რომ რაღაცის ყიდვის ვალდებულება არ გაქვთ კონკრეტული სურათის მისაღებად… კარგი იქნება, თუ პროცესში შემოქმედებითობასაც გამოიჩენთ, მაგალითად, დააცხობთ ოჯახის წევრებისა თუ მეგობრების საყვარელ ორცხობილებს, დაგეგმავთ საერთო ვახშამს ან ოჯახთან ერთად გასეირნებას. შეგიძლიათ, მნიშვნელოვანი ნივთები მეორეულ მაღაზიებშიც ნახოთ, სულაც არ არის აუცილებელი ბევრი დახარჯოთ იმისათვის, რომ სხვა ადამიანებს ასიამოვნოთ.
