როგორ დავგეგმოთ შედეგიანი ამოცანები ტრანსფორმაციისთვის

ზემოდან ქვემოთ მიმართული, მიზანზე ორიენტირებული ტრანსფორმაციის პროგრამების უმეტესობა ვერ აღწევს გრძელვადიან შედეგებს. Bain-ის მიერ მსოფლიოს მასშტაბით 350-ზე მეტ კომპანიაზე ჩატარებულმა კვლევამ აჩვენა, რომ მხოლოდ 12-დან 1 მიზანზე ორიენტირებული ტრანსფორმაცია ახერხებს მდგრადი შედეგების მიღწევას. ხშირად ტრანსფორმაციები ისახავენ ამბიციურ მიზნებს, მაგრამ ვერ ახერხებენ მათ მიღწევას. უარესი ისაა, რომ ზოგიერთი ორგანიზაცია ქაღალდზე აღწევს მიზნებს, მაგრამ შემდეგ აღმოაჩენს, რომ გაუმჯობესებების მხოლოდ მცირე ნაწილი აისახება კომპანიის ფინანსურ ანგარიშგებაზე.

მიზნების ეფექტურად გამოყენება ტრანსფორმაციაში შესაძლებელია, მაგრამ ეს მოითხოვს განსხვავებულ მიდგომასა და აზროვნებას.

შეცვალეთ ხედვა მიზნების შესახებ

წარმატებული მიზნების დასახვა მოითხოვს, რომ ხელმძღვანელობამ განსხვავებულად იფიქროს მიზნებზე. იმის ნაცვლად, რომ მიზნები განიხილონ, როგორც ის, რასაც აუცილებლად უნდა მიაღწიონ, ხელმძღვანელებმა უნდა ჩათვალონ ისინი მინიმალურ ზღვრად, რომელსაც უნდა გადააჭარბონ. ეს ინარჩუნებს ტრადიციული მიზნების დასახვის უპირატესობებს და ამავდროულად ამცირებს მის ნაკლოვანებებს.

წარმატებული კომპანიები მიზნებს განიხილავენ, როგორც მინიმალურ შესრულების მოთხოვნებს და ხშირად ასეც მოიხსენიებენ მათ, რათა თავიდან აიცილონ სტიგმა, რომელიც ახლა უკვე დაკავშირებულია ტერმინთან „მიზნები“. ასეთ შემთხვევებში, ხელმძღვანელობა ნათლად განსაზღვრავს მინიმალურ ზღვარს, რომელსაც კომპანიამ უნდა გადააჭარბოს და ამავდროულად წაახალისებს ხელმძღვანელებს, რომ კიდევ უფრო მეტი შედეგი მოიტანონ, რაც ჩვეულებრივ გამყარებულია წამახალისებელი სისტემით. ეს ახალი აზროვნება აერთიანებს ორგანიზაციას და უბიძგებს ყველას, გამოავლინოს ახალი შესაძლებლობები უფრო მაღალი შედეგების მისაღწევად.

დასახეთ მიზნები აბსოლუტურ – და არა შედარებით – მაჩვენებლებში

ეფექტურობისთვის, მიზნები უნდა დაისახოს აბსოლუტურ მაჩვენებლებში. აბსოლუტური მიზნების დასახვა თავიდან აგვარიდებს ზედმეტ მანიპულაციებს და ზრდის ალბათობას, რომ მინიმალური შესრულების მოთხოვნა აისახება კომპანიის ფინანსურ ანგარიშგებაში.

შედარებითი მიზნები ხშირად ფლანგავს ძვირფას დროს თავად მიზნების ირგვლივ დისკუსიებში, ნაცვლად იმისა, რომ ხელმძღვანელობის დრო დაეთმოს შესრულების გასაუმჯობესებლად ახალი და უკეთესი ვარიანტების იდენტიფიცირებას.

აბსოლუტური, მინიმალური შესრულების მოთხოვნების დადგენა საშუალებას აძლევს ხელმძღვანელობას განსაზღვროს, უზრუნველყოფს თუ არა ტრანსფორმაცია შედეგებს. აბსოლუტური მიზნები ამცირებს გაუგებრობას საბაზისო მაჩვენებლის ირგვლივ და მენეჯერების ყურადღებას ამახვილებს კომპანიის ტრანსფორმაციისთვის საჭირო ქმედებებზე.

დასახეთ არა მხოლოდ ხარჯებზე დაფუძნებული მიზნები

ტრანსფორმაცია მოითხოვს მეტს, ვიდრე მხოლოდ ხარჯების შემცირებაა. აქციონერთა უკეთესი უკუგება საჭიროებს მდგრად და მოგებიან ზრდას, რაც მხოლოდ ხარჯების შემცირებით ვერ მიიღწევა. ამიტომ, ხელმძღვანელობამ უნდა დასახოს მიზნები მრავალი განზომილების მიხედვით, რათა თავიდან აიცილოს მენეჯერების მიერ მოკლევადიანი გადაწყვეტილებების მიღება ხარჯების შესახებ.

ახლო წარსულში Xerox-მა დაისახა აგრესიული მიზნები ხარჯების შემცირებაზე და მათ შეასრულეს კიდეც ეს მიზნები, თუმცა მათი კონკურენტუნარიანობა მაინც გაუარესდა და საბაზრო ღირებულება შემცირდა. ეს ჩვეულებრივ იმიტომ ხდება, რომ ხარჯებზე დაფუძნებული მიზნები ხშირად უბიძგებს კომპანიებს განახორციელონ ისეთი ქმედებები, რომლებიც მოკლევადიან დანაზოგს იძლევა, მაგრამ ძირს უთხრის კონკურენტუნარიანობას.

კონტრპროდუქტიული ქმედებების წახალისების გარდა, მხოლოდ ხარჯებზე დაფუძნებულმა მიზნებმა შეიძლება გამოიწვიოს ცინიზმი ტრანსფორმაციის მიმართ. როდესაც მენეჯერები და თანამშრომლები ისმენენ სიტყვას „ტრანსფორმაცია“, ისინი ბუნებრივად იწყებენ მის ასოცირებას შემცირებასთან, თანამშრომელთა რაოდენობის შემცირებასთან, ხარჯების შეკვეცასთან, სარგებლის დაკარგვასთან და ა.შ. დროთა განმავლობაში, ხარჯებზე დაფუძნებული მიზნები იწვევს უკმაყოფილებასა და წინააღმდეგობას. ენერგიისა და ენთუზიაზმის გენერირების ნაცვლად, „ტრანსფორმაცია“ ხდება უარყოფითი მნიშვნელობის მქონე სიტყვა.

წყარო: HBR