გინახავთ ვირუსული ვიდეოები სოციალურ მედიაში, სადაც ძაღლები იყენებენ ხმოვან ღილაკებს „სასაუბროდ“? ამ ღილაკებმა შინაური ცხოველების სამყარო სწრაფად მოიცვა, რასაც მოჰყვა შთამბეჭდავი რეაქცია, რომლებიც გაზიარდა TikTok-სა და Instagram-ზე. საინტერესოა, ნამდვილად კომუნიკაციას ახორციელებენ ეს ძაღლები, თუ უბრალოდ რეაგირებენ მათი პატრონების მინიშნებებზე?
კალიფორნიის სან-დიეგოს უნივერსიტეტის და სხვა ინსტიტუტების მკვლევრების მიერ ჩატარებული დაკვირვება აჩვენებს, რომ ძაღლებს, რომლებიც გაწვრთნილნი არიან ხმოვანი ღილაკების გამოყენებით, მართლაც შეუძლიათ გაიგონ კონკრეტული სიტყვები და აწარმოონ კონტექსტურად შესაბამისი პასუხები.
ეს არის პირველი ემპირიული კვლევა, რომელიც ჩატარდა ფედერიკო როსანოს ხელმძღვანელობით. ის ასოცირებული პროფესორია კოგნიტიური მეცნიერების დეპარტამენტში (სან-დიეგოში). ეს კვლევა ჩატარდა მასშტაბური გრძელვადიანი პროექტის ფარგლებში. როსანო, რომელიც ასევე გვხვდება Netflix-ის ახალ პოპულარულ დოკუმენტურ ფილმში „ძაღლის გონების შიგნით“, ხაზგასმით აღნიშნავს, რომ ეს კვლევა მხოლოდ ერთი ნაბიჯია მისი ლაბორატორიის მიმდინარე გამოკვლევაში სახეობათაშორისი კომუნიკაციის შესახებ.
ძირითადი მიგნებები
კვლევა აჩვენებს, რომ ძაღლები, რომლებიც გაწვრთნილნი არიან ხმოვანი დაფების გამოსაყენებლად, სათანადოდ რეაგირებდნენ ისეთ სიტყვებზე, როგორიცაა „თამაში“ და „გარეთ“, იმის მიუხედავად, სიტყვები პატრონმა წარმოთქვა თუ ღილაკზე დააჭირა თათი, ასევე იმის მიუხედავად, ღილაკს პატრონი აჭერდა თუ უცხო პირი. ეს მიუთითებს, რომ ძაღლები არ აღიქვამენ მხოლოდ მათი პატრონების სხეულის ენას ან ყოფნას, არამედ მართლაც ამუშავებენ სიტყვებს.
„ეს კვლევა ეხება საზოგადოების სკეპტიციზმს იმის შესახებ, ნამდვილად ესმით თუ არა ძაღლებს, რას ნიშნავს ღილაკები,” – თქვა როსანომ. „ჩვენი მიგნებები მნიშვნელოვანია, რადგან ისინი აჩვენებენ, რომ სიტყვები მნიშვნელოვანია ძაღლებისთვის და რომ ისინი რეაგირებენ თავად სიტყვებზე და არა მხოლოდ მათთან დაკავშირებულ მინიშნებებზე.“
კვლევა მოიცავდა ორ ურთიერთშემავსებელ ექსპერიმენტს. პირველი ჩატარდა პირადად, მკვლევრები სტუმრობდნენ 30 ძაღლის სახლს მთელი ქვეყნის მასშტაბით, რათა შეემოწმებინათ მათი რეაქციები ხმოვანი დაფის ღილაკებზე. მეორე ექსპერიმენტი იყენებდა სამოქალაქო ჩართულობას, სადაც 29 ძაღლის პატრონმა თავად ჩაატარა ცდები სახლში, დისტანციური ხელმძღვანელობის ქვეშ.
კვლევის მეთოდოლოგია მკაცრად იყო წინასწარ გაწერილი, რაც უზრუნველყოფს გამჭვირვალობას და გამეორებადობას. ეს წინასწარი ინფორმაცია, რომელიც საჯაროდ ხელმისაწვდომია ონლაინ, აღწერს კვლევის ჰიპოთეზებს, მონაცემთა შეგროვების მეთოდებს, ცვლადებს და ანალიზის გეგმებს ნებისმიერი მონაცემის შეგროვებამდე. პროცესი, როგორც როსანომ განმარტა, აძლიერებს ანგარიშვალდებულებას, ამცირებს შედეგების შერჩევითად გამოყენების რისკს და შეესაბამება მზარდ მოძრაობას კოგნიტიურ მეცნიერებასა და ფსიქოლოგიაში სამეცნიერო სიმკაცრის გაზრდისა და მიკერძოების ან თაღლითობის ალბათობის შემცირების მიზნით.
ეს კვლევა არის უფრო დიდი, მიმდინარე კვლევითი პროექტის ნაწილი, რომელშიც ჩართულია ათასობით მონაწილე მთელი მსოფლიოდან. მომავალი კვლევები უფრო ღრმად ჩაუღრმავდება იმას, თუ როგორ იყენებენ ძაღლები სპონტანურად ხმოვანი დაფის ღილაკებს, რაც კიდევ უფრო მეტ ნათელს მოჰფენს ძაღლის კოგნიციისა და კომუნიკაციის სირთულეებს.
წყარო: phys
