მიუხედავად იმისა, რომ ბევრისთვის უკრაინა შორეული ქვეყანაა და იქ მიმდინარე ომსაც შორიდან ადევნებს თვალს, ჩვენ მაინც ერთმანეთთან ვართ დაკავშირებულნი და ამის შეხსენება ბევრნაირადაა შესაძლებელი. ფოტოგრაფები, რომლებიც რეალურ დროში აღბეჭდავენ იმას, რაც ახლა უკრაინაში ხდება, ერთი მხრივ, დიდ საქმეს აკეთებენ ამბის გადმოსაცემად, მეორე მხრივ, კი რუსული დეზინფორმაციისთვის ხელის შესაშლელად.
წარმოგიდგენთ ფოტოგალერეას, რომელიც ნათლად ასახავს უკრაინის მდგომარეობას 24 თებერვლიდან, ანუ ომის დაწყების პირველი დღიდან. ამ კოლექციის დათვალიერებისას ადამიანს გააოცებს ის, რომ მთელი საზოგადოებაა ჩართული ომში ერთმანეთის დასახმარებლად. ქალი იქნება, ბავშვი თუ მოხუცი, ყველა ყველას ეხმარება, როცა საჭიროება დგება. მიუხედავად იმისა, რომ ბევრმა ადამიანმა დატოვა უკრაინა, უფრო მეტი ნაწილი სამშობლოში რჩება და ცდილობს, არ აყვეს პანიკას, როცა ბომბები ცვივა, როცა მაღაზიის თაროები დაცარიელებულია და როცა თავშესაფრებში უწევთ ღამეების თენება.
