Google Lens ტექნიკური გიგანტის ერთ-ერთი ყველაზე მძლავრი ინსტრუმენტია, თუმცა მის ფუნქციებს ნაკლებად იყენებენ მომხმარებლები. ალბათ, მათ შესახებ ბევრი თქვენგანიც არ ფლობს სრულფასოვან ინფორმაციას — ამიტომაც, სტატიაში სწორედ იმაზე გიამბობთ, როგორ შეგიძლიათ აღნიშნული პროგრამის სწორად გამოყენება.
ვიდრე უშუალოდ მახასიათებლებზე საუბარს დავიწყებთ, გეტყვით, რომ Google Lens ხელმისაწვდომია როგორც iOS, ისე ანდროიდ მომხმარებლებისთვის. ამისათვის საჭიროა, უბრალოდ გუგლის ვებგვერდზე შეხვიდეთ და შესაბამის ხატულას დააკლიკოთ. აქვე გაითვალისწინეთ, რომ დესკტოპ ვერსიას გარკვეული შეზღუდვები აქვს, მობილურ ვერსიასთან შედარებით.
გადაჭერით მათემატიკური პრობლემები
ეს ფუნქცია მათემატიკოსებს ნამდვილად არ ეხებათ, მაგრამ ხომ ვართ ამ დარგისთვის „უბრალო მოკვდავებად“ წოდებულებიც, რომელთაც რთული არითმეტიკული გამოთვლების გაკეთება ცოტათი მაინც გვიჭირს… უმარტივესი ამოცანებიდან რთულ დავალებებამდე, პროგრამას შეუძლია, მათ გადაჭრაში დაგეხმაროთ.
ამისათვის გახსენით გუგლის აპლიკაცია, დააჭირეთ Lens-ის აიკონს და გადადით Homework კატეგორიაზე. მას შემდეგ, რაც ამოცანას დაასკანერებთ, სისტემა ავტომატურად ამოგიხსნით და იმ გზებსაც გიჩვენებთ, რატომ მიიღო კონკრეტული პასუხი.
ფოტოდან ტექსტის ამოკოპირება
ალბათ, ეს ერთ-ერთი ყველაზე კომფორტული მახასიათებელია… აი, ფოტოზე დატანილი ფრაზა რომ მოგეწონებათ და უცბად ტექსტად გინდათ სადმე დაპოსტვა ან აპლიკაციის გამოყენებით, სხვაგან ჩასმა. ანდაც ნაშრომისთვის pdf წიგნიდან რომ გაქვთ რაღაც ნაწილი ამოსაღები და თქვენს ნაწერში ჩასასმელი.
ამ შემთხვევაში ფოტო Google Photos-ში გახსენით და დააკლიკეთ Lens ღილაკს.
მცენარეებისა და მწერების იდენტიფიცირება
აღნიშნული ფუნქცია მცენარეების მოყვარულებსაც დაეხმარებათ და მათაც, ვინც მწერებითაა გატაცებული — ან, უბრალოდ, ზაფხულობით ბუნებაში გასულებს განსაკუთრებული სიფრთხილის გამოჩენა ურჩევნიათ.
გახსენით გუგლის აპლიკაცია, დააკლიკეთ Lens-ის აიკონს და კამერა კონკრეტული მცენარის ან მწერისკენ მიმართეთ. შედეგები ერთგვარ ბარათის ფორმაზე გამოჩნდება, რომლის შენახვაც და დამატებითი ინფორმაციის მოთხოვნაც შეგეძლებათ.
ტექსტის ხმამაღლა წაკითხვა
თუ მხედველობის პრობლემები გაქვთ ან კითხვა გიჭირთ, ეს ფუნქცია საკმაოდ პრაქტიკულ როლს შეითავსებს. მისი მეშვეობით, შესაძლებელია ნებისმიერი ტექსტის სისტემის მიერ გახმოვანება. ამისათვის კვლავ გუგლის აპლიკაცია გახსენით, დააჭირეთ Lens-ის ხატულას, კამერა სასურველი ტექსტისკენ მიმართეთ და მონიშნეთ, კონკრეტულად ტექსტის რომელი ნაწილის მოსმენა გსურთ. შემდეგ კი Listen-ზე დაჭერით ყველაფერს მოისმენთ.
ფოტოს მეშვეობით ძიება
ზოგჯერ მხოლოდ ტექსტური მოთხოვნა არ არის საკმარისი სასურველი ფოტოს მოსაძიებლად და ამაში მსგავსი სურათების გამოყენება გვეხმარება ხოლმე. აღნიშნული ფუნქციის გამოსაყენებლად კი დესკტოპ ვერსია უნდა გახსნათ ვებგვერდზე და Lens-ის ნიშნულს დააჭიროთ — აქ შეგიძლიათ ან ფოტო ატვირთოთ, ან ფოტოს ბმული ჩააკოპიროთ.
ტექსტის ლაივ რეჟიმში თარგმნა
მიუხედავად იმისა, რომ ონლაინ ტექსტის თარგმნა საკმაოდ მარტივია, რეალურ სამყაროში ეს უფრო რთულია. გახსენით Google-ის აპლიკაცია და დააკლიკეთ Lens-ის ნიშანს. მიმართეთ კამერა ტექსტისკენ, რომლის თარგმნაც გსურთ და შეეხეთ ჩამკეტის ღილაკს.
აირჩიეთ ტექსტი, რომლის თარგმნაც გსურთ და შეეხეთ ღილაკს „Translate“. ენის არჩევას კი თარგმანის გვერდზე ჩვეულებრივ შეძლებთ.
პროდუქტების მოძებნა
არის ხოლმე შემთხვევები, სტუმრად ან სადმე უცხო გარემოში ყოფნისას რაიმე ისეთ პროდუქტს წავაწყდებით, რომელიც ძალიან მოგვწონს… ვერც კითხვას ვახერხებთ, სად იყიდა პატრონმა ის… ასეთ დროს Google Lens მარტივად დაგვაკვალიანებს, საიდან შეიძლება კონკრეტული ნივთის ყიდვა — როგორც ზემოხსენებულ შემთხვევებში, აქაც კამერა მიმართეთ ობიექტისკენ და სისტემა ავტომატურად შემოგთავაზებთ ყიდვის შესაძლებლობებს.
