„თიბისი ბიზნესისთვის“ პანელური დისკუსიების სერია გრძელდება — ე. წ. „ხუთშაბათის შეხვედრები“, რომლის ფარგლებშიც სხვადასხვა ინდუსტრიის წარმომადგენლები სფეროსთან დაკავშირებულ მწვავე საკითხებზე საუბრობენ. ამჯერად მრგვალი მაგიდის ირგვლივ შეიკრიბებიან გაყიდვების სფეროს წარმომადგენლები, რომლებიც ისაუბრებენ იმაზე, თუ როგორ გავყიდოთ მეტი.
25 იანვარს შეხვდებით: არჩილ ფირიაშვილს (VELI.STORE), ნათია გავარდაშვილსა (VISA) და თუთიკო მუჯირს (ZOOMMER). მოწვეული სტუმრები გაყიდვების სხვადასხვა კამპანიასა და მომხმარებლის დაინტერესების ამა თუ იმ ხერხზე ილაპარაკებენ, რაც კონკურენტულ გარემოში ბიზნესის მართვას ეხება.
მანამდე კი სტატიაში არჩილ ფირიაშვილის, VELI.STORE-ის დირექტორის აზრებს გაგიზიარებთ, რომლებიც პირდაპირ ელ.კომერციის მოცემულ ვითარებას და ერთგვარ წარმატების ფორმულას უკავშირდება.
M: დღევანდელ რეალობაში როგორ შეიცვალა თანამედროვე მომხმარებლების დამოკიდებულება ელ.კომერციის მიმართ? თუკი აქამდე ძირითადად შოპინგის „ტრადიციულ“ ფორმას ირჩევდნენ, დღეისათვის რამდენად დიდი მოთხოვნაა ელ.კომერციაში?
ელ.კომერციაში მოთხოვნა საკმაოდ დიდია, ვგულისხმობ მთლიან ონლაინ გამოწერებს. ამაში შედის როგორც ადგილობრივი, ისე საერთაშორისო პლატფორმებიდან გამოწერაც. მაგალითად, დღევანდელ რეალობაში უცხოური ელ.კომერციის პლატფორმებიდან გამოწერები 4-5-ჯერ უსწრებს ადგილობრივს — შესაბამისად, ბაზარი საკმაოდ დიდია და მომხმარებლის მზაობაც არსებობს, თუ სწორ სერვისსა და პროდუქტს შესთავაზებ.
M: როგორ ფიქრობთ, რა სჭირდება ელ.კომერციას იმისთვის, რომ წარმატებული იყოს და კონკურენტუნარიანობა შეინარჩუნოს?
პირველ რიგში, აქაც გასათვალისწინებელია, რომ თანამედროვე სამყაროს პირობებში რეალურად გლობალურ კონკურენციაში ხარ. „ველის“ მაგალითი რომ ავიღოთ, ერთი მხრივ, კონკურენციაში ვართ როგორც საქართველოში მოქმედ იქომერს პლატფორმებთან, ისე საერთაშორისოსთან — ამაზონი, ტრენდიოლი და ა. შ. მეორე მხრივ, კონკურენციაში ვართ ადგილობრივ ტრადიციულ რითეილთან. ეს კი ჩვენგან, საუკეთესო გამოცდილების შექმნასთან ერთად, პროდუქტებისა და სერვისების კუთხით დიდი ძალისხმევის ჩადებას მოითხოვს.
ჯამში, რა თქმა უნდა, ერთიანი ფორმულა არ არსებობს და სხვადასხვა კომპანიამ შეიძლება სულ სხვადასხვანაირი გზებით გაიკვლიოს გზა მომხმარებლების გულამდე. უბრალოდ, აქ კიდევ ერთხელ გავუსვამ ხაზს, რომ კონკურენცია არის როგორც გლობალურ, ისე ლოკალურ იქომერს პლატფორმებთან; და ასევე — ლოკალურ ტრადიციულ შოპინგთან.
M: შეთავაზებებზე ფიქრისას ერთია ელ.კომერციის გუნდის მხარე და მეორე მომხმარებლებზე დაკვირვება… ეს პროცესი როგორ მიმდინარეობს, რას აკვირდებით ყველაზე მეტად?
ელ. კომერციის განსაკუთრებული თავისებურება დიდი ოდენობით მონაცემების დაგროვების შესაძლებლობაა, რაც ძალიან საინტერესო მიგნებებს გვაკეთებინებს მომხმარებლის ქცევასთან დაკავშირებით. ასე ვთქვათ, მონაცემებზე დაყრდნობით სწორი გადაწყვეტილებების ალბათობა მნიშვნელოვნად იზრდება. ამავდროულად, არანაკლებ საინტერესოა პირდაპირი საუბარი მომხმარებელთან — ამას „ველიში“ რეგულარულად ვაკეთებთ და ხშირად ისეთ მიგნებებამდე მივდივართ, რომლებიც ზედაპირზე არ ჩანს.
გარდა ამისა, ძალიან მნიშვნელოვანია, რომ ელ.კომერციაში ძალიან სწრაფად შეგვიძლია მომხმარებლისგან უკუკავშირის მიღება — რა მოეწონათ ან არ მოეწონათ; ვაკვირდებით სხვადასხვა პარამეტრს, როგორიცაა პროდუქტი, მიტანა, გამოცდილება და ასე შემდეგ.
ამის საშუალებით, შეგვიძლია მყისიერი რეაგირება გვქონდეს, თუკი რომელიმე პარამეტრი გაუარესდება. ფაქტობრივად, ონლაინ რეჟიმში ვადევნებთ თვალს პულსაციას და თუ ოდნავი არითმია დაიწყო, სწრაფად შეგიძლია მოქმედება. ეს კი წარმოუდგენელი უპირატესობა და შესაძლებლობაა ჩვენთვის.
