ტერმინი ბოლო წლებში კი საკმაოდ ხშირად ჟღერდება, თუმცა მისი მნიშვნელობა ტექნოლოგიური ინოვაციების კვალდაკვალ ვითარდება. მართალია, ახლა უფრო მეტად ციფრულ სამყაროსთან მიმართებით გამოიყენება, მაგრამ ფიზიკური გამიფიკაციაც ცოცხალია და საკმაოდ ეფექტურადაც იყენებენ მარკეტერები.
QR კოდები, აუგმენტური რეალობა და ქვიზის სტილის კითხვები რამდენიმე მაგალითია იმ ტაქტიკებიდან, რომლებსაც ბრენდის კამპანიებში სახალისო ელემენტების ჩასართავად მიმართავენ. გამიფიკაციის მთავარი მიზანი კი ხშირად ჩართულობაა, რასაც ისეთ სასურველ შედეგებამდე მივყავართ, როგორიც გაყიდვები, ბრენდის ლოიალობა და მომხმარებელთა შენარჩუნებაა. ხოლო, როცა ეს საქმე სწორად კეთდება, იგი, შესაძლოა, შესანიშნავ ხელსაწყოდაც იქცეს, რათა სამიზნე აუდიტორიასთან უფრო სიღრმისეული ურთიერთობები ჩამოვაყალიბოთ.
აი, მაგალითად, თუ კრიზისული პერიოდია და ადამიანების უმეტესობისთვის ფასი გადამწყვეტი ფაქტორია, ბრენდმა თავისი სამიზნე ბაზრის ძირითად მოტივაციას უნდა მიმართოს და იპოვოს გზები მათთან შესაბამისობისთვის, გახდეს მათი ცხოვრების ნაწილი და დააჯილდოოს ადამიანები ერთგულებისთვის მაშინაც კი, როცა ფინანსურად არც ისე კარგად იქნებიან…
იმის გააზრება, თუ რა არის თქვენი ძირითადი დემოგრაფიის მოტივატორი უმნიშვნელოვანესი ფაქტორია. ამაში კი ქვემოთ მოყვანილი ბრენდების მაგალითები დაგარწმუნებთ, რომლებიც გამიფიკაციას საუკეთესოდ იყენებენ ბაზრის წილის გასაზრდელად:
SKY
ბრიტანულმა მაუწყებელმა Sky-მ ჯერ კიდევ 2015 წელს შემოგვთავაზა თავისი ლოიალობის სქემა, რომელიც მომხმარებლებს იმისდა მიხედვით აჯილდოებდა, თუ რამდენ ხანს ატარებდნენ ბრენდთან და მათ გარკვეულ კატეგორიებში ათავსებდა. აი, მაგალითად MySky-ის აპლიკაციის VIP სექციაში უამრავი პრიზი დაგხვდებათ, იქნება ეს უფასო კინოები, შოკოლადი, ფეხბურთის მატჩის ბილეთები თუ სხვა რამ. ამას ფსიქოლოგიურ მასტერკლასს უწოდებენ და BT-სთან, Virgin-თან თუ Netflix-თან კონკურენციაში წარმატებითაც იყენებენ. მომხმარებლებს აგრძნობინებენ, რომ აფასებენ მათ ერთგულებას და რაც ყველაზე მნიშვნელოვანია ეს წასვლის სურვილსაც აღარ უჩენს მათ. ამგვარად, SKY ბაზრის წილის დაახლოებით 30% ფლობს დიდ ბრიტანეთში და გამოდის, მისი სტრატეგიაც საკმაოდ კარგად მუშაობს.
Sainsbury’s
სუპერმარკეტების ქსელია, რომელიც Great fruit & veg challenge-ს გვთავაზობს. კამპანია მაღაზიებში სახალისო, ინტერაქციულ მეთოდებს ნერგავს, რათა მყიდველებს უბიძგონ, უფრო მეტიც შეიძინონ და უფრო მეტი ხილი თუ ბოსტნეული მიირთვან. გამოწვევა ბრენდის Nectar აპლიკაციით შეუძლიათ მართონ და თანხა აქ დაგროვილი ქულებით გადაიხადონ, როგორც Sainsbury’s-ში, ისე Argos-სა და Habitat-ში. კამპანია ჯანსაღი კვების მესიჯს გადმოგვცემს, რაც Sainsbury’s-ის ბრენდის ღირებულებების შესაბამისიცაა — living healthier lives. საინტერესოა ისიც, რომ გასულ წელს კი ამ გამოწვევაში 580 000 მომხმარებელმა მიიღო მონაწილეობა და 7 კვირაში ხილისა და ბოსტნეულის 88 მილიონი პორცია გაიყიდა.
TEMU
ჩინური საცალო ვაჭრობის კომპანიაა, რომელსაც მხოლოდ ოქტომბერში, Google Trends-ის მონაცემების მიხედვით, 650 000 ადამიანი ეძებდა. პროდუქტების მრავალფეროვნებას სთავაზობს მომხმარებლებს, რომლებიც პირდაპირ ჩინური ქარხნებიდან თუ საწყობებიდან იგზავნება. და ეს პროდუქტები ახლა გუგლის ძიებებში მოწინავე ადგილს იკავებს.
Temu-ს პროდუქტების ფასი კი მისი წარმატების ერთ-ერთი განმაპირობებელი ფაქტორია. თანაც ხშირად ისეთ დიდ ფასდაკლებებს სთავაზობს მომხმარებლებს, რომ შეუძლია, Amazon-სა და Ebay-ის კონკურენცია ძალიან მარტივად გაუწიოს. ამასთან, Temu ჭკვიანურ გამიფიკაციასაც მიმართავს — კალათის მრიცხველები აჩვენებს, თუ რამდენი პროდუქტია დარჩენილი, ხოლო ფასების შემცირების ტაიმერები ექსკლუზიურ ფასდაკლებებს სთავაზობს მომხმარებლებს, ეს კი მხოლოდ რამდენიმე ტაქტიკაა იმ მრავალი ძალისხმევიდან, რომელსაც კომპანია მყიდველების მოსაზიდად იყენებს.
McDonald’s Monopoly
ბუნებრივია, ამ თემაზე საუბარი ვერ ჩაივლიდა მაკდონალდსის ხსენების გარეშე — გამიფიკაციის შესანიშნავი მაგალითი 2005 წელს პირველად გაგვაცნეს და მას შემდეგ ნამდვილად დაამტკიცეს, რომ იგი დროსაც უძლებს. კონკრეტულ პერიოდში, აი, მაგალითად წელს სექტემბერ-ოქტომბერში ოქროს თაღების გულშემატკივრებს წაახალისებდნენ, ეყიდათ McDonald’s-ის პროდუქტები, რომლითაც პრიზების მოგების შანსი მიეცემოდათ, დაწყებული უფასო საკვებიდან, დამთავრებული 100 000 ფუნტამდე ნაღდი ფულით.
მომხმარებლები სათამაშო ტოკენებს აგროვებენ, რომლებიც ცნობილი Monopoly-ს დაფის ფერებს ესადაგება, რაღა თქმა უნდა, Gold Cards-ების განსაზღვრული რაოდენობით. მთლიანი კონცეფცია კი McDonald’s-ის აპლიკაციაშია ინტეგრირებული. კამპანიამ წელს პოზიტიური მედია გაშუქებაც დაიმსახურა და ამგვარად, კვლავ სამიზნე აუდიტორიის გონებაში „გაინაღდა“ თავისი ადგილი.
ეჭვგარეშეა, რომ გამიფიკაცია 2024 წელსაც მნიშვნელოვან როლს ითამაშებს ბრენდების ჩართულობაში და ეს მომავალ წლებშიც გაგრძელდება. დიახ, ბრენდები ეცდებიან ისეთი კამპანიების გამოშვებას, რომლებიც მათ მომხმარებელთა ყურადღებისა და ლოიალობის მოპოვებაში დაეხმარება…
