in

როგორ ვმართოთ შფოთვა საჯაროდ საუბრისას?

M2
M2

საჯაროდ საუბრის გეშინიათ? შესაძლოა, საქმე გლოსოფობიასთან გვქონდეს, რომელიც ფობიებს შორის ერთ-ერთი ყველაზე გავრცელებულია. ამიტომ, არც მარტო ხართ და არც გამოუვალ სიტუაციაში — ავტორი მარკ აბრაამსი გვიზიარებს რჩევებს, თუ როგორ შევამციროთ საჯაროდ საუბრის თანმდევი სიმპტომები და როგორ შევამსუბუქოთ მისი გამომწვევი წყაროები:

სიმპტომების შემცირება

ერთ-ერთი გზა შფოთვის სამართავად საკუთარ ფიზიოლოგიურ და კოგნიტიურ გამოცდილებაზე ფოკუსირებაა, უფრო მარტივად რომ გითხრათ, იმაზე, თუ რა ხდება თქვენს სხეულსა და ტვინში. ზოგს გული უჩქარდება, ზოგიც არათანმიმდევრულად სუნთქავს, ადრენალინის გამო ზოგი კანკალებს, ზოგიც კი წითლდება. ამოსუნთქვებზე ფოკუსირება სუნთქვასთან დაკავშირებული სიმპტომების თავიდან არიდებაში შეიძლება, დაგვეხმაროს. ყველაზე ეფექტურად კი აბრაამსი ღრმა ჩასუნთქვა-ამოსუნთქვებს ასახელებს. ეს გულისცემისა და სუნთქვის სიჩქარეს არეგულირებს და სწრაფად ლაპარაკის იმპულსსაც გარიდებთ თავიდან. 

ადრენალინთან დაკავშირებულ სიმპტომებს მოძრაობითაც შეგიძლიათ, გაუმკლავდეთ — ადრენალინის ევოლუციური მიზანი შიშს ეხება. მას სურს აგვამოძრაოს და სწორედ ამიტომ ვკანკალებთ“.

ამიტომ, საჯაროდ გამოსვლის დასაწყისში კარგი იქნება თუ სიარულს ან სხვა უფრო დიდ ჟესტებს მიმართავთ. ერთ ფაქტსაც გაგიზიარებთ: ნერვიული ადამიანები მეტად მყარ პოზაში თავსდებიან, რის გამოც ისინი უფრო მეტად ირხევიან… მთავარია, იმგვარად გადაადგილდეთ, რომ ამან დისკომფორტი არ შეგიქმნათ და პროცესის შემსუბუქებაში დაგეხმაროთ.

ხოლო, რაც შეეხება სახის გაწითლებასა და ტემპერატურის კონტროლს, როცა ვნერვიულობთ, ბუნებრივია, გულისცემა ჩქარდება და სხეულშიც იმატებს არტერიული წნევა — აქ კი, კარგი იქნება, თუ ხელში რაღაც ცივს დაიჭერთ, მაგალითად წყლის ბოთლს, რადგან ასე ოფლიანობასა და გაწითლებას შეწყვეტთ.

წყაროების შემსუბუქება

მეორე გზა საჯაროდ საუბართან დაკავშირებული შფოთვის მოსახსნელად მის გამომწვევ წყაროებზე ფოკუსირებაა. როგორც აბრაამსი ამბობს, საერთო წყარო ის არის, რის მიღწევასაც თქვენი კომუნიკაციით ცდილობთ. მაგალითისთვის, თუ მეწარმე დაფინანსებას ეძებს ან თანამშრომელს პროექტის დამტკიცება უნდა, ამ მდგომარეობებში მიზანი, ანუ სამომავლო მდგომარეობა, ნერვიულობის საბაბი ხდება.

სანაცვლოდ, აბრაამსი გთავაზობთ, იმ ქმედებებს მიჰყოთ ხელი, რომლებიც აწმყოზე ორიენტირებულია, რადგან ვერ იდარდებთ მომავალზე, როცა აწმყოში ხართ. მაგალითისთვის რაიმე ფიზიკური გააკეთეთ, ან მოუსმინეთ სიმღერას, ან უკუთვლით დაითვალეთ ან ენის გასატეხებში ივარჯიშეთ. 

თავად აბრაამს კი სცენაზე ყოფნისას ადამიანებთან ხანმოკლე გასაუბრებები ეხმარება — ეს აწმყოში მამყოფებს, რადგან მიწევს მოვუსმინო, რას ამბობენ. მე ვიცნობ პროფესიონალ სპიკერს, რომელსაც გამოსვლებში ათასობით დოლარს უხდიან, სცენაზე გასვლამდე კი იგი აწმყოზე ორიენტირებული რომ იყოს, Tetris-ს თამაშობს.

შფოთვის კიდევ ერთი წყარო სრულყოფილი კომუნიკაციის სურვილში იმალება, როცა სწორი პასუხების გაცემა და საუკეთესო უკუკავშირის მიღება გსურთ. აი, აბრაამსი კი გვეუბნება, რომ სულაც არ არსებობს სწორი გზები კომუნიკაციისთვის, აქ საქმე მხოლოდ უკეთეს ან უარეს გზებთან გვაქვს.

როცა სწორად კომუნიკაციას ცდილობთ, თქვენი კოგნიტიური რესურსების ნაწილს ამ მიზნისკენ აგზავნით იმის ნაცვლად, რომ თავად კომუნიკაციაზე ფოკუსირდეთ. არ იღელვოთ შესაფერისი სწორი სიტყვის შესაფერის სწორ დროზე თქმაზე. ფოკუსირდით კავშირზე და არა, სრულყოფილებაზე. დაუკავშირდით აუდიტორიას და გააკეთეთ რაც საჭიროა მათთვის ღირებულების მისაწოდებლად, — განმარტავს აბრაამსი. 

დაბოლოს, შფოთვის წყაროსთან გამკლავების მესამე გზა გამოცდილებასთან ერთად მოდის. ადამიანები მაშინ ნერვიულობენ, როცა გრძნობენ, რომ არ აქვთ ამ ამოცანისთვის საჭირო უნარები, მაგრამ ისიც ხომ ფაქტია, რომ იმას ვერ ისწავლით, რაც პრაქტიკაში არ გამოგიცდიათ… აქ კი აბრაამსი შესაბამისი კურსების გავლას, პოდკასტების მოსმენასა და სასაუბრო ტექნიკებზე წიგნების წაკითხვას გირჩევთ.

Gartner: როგორ გადავეწყოთ ციფრულ ტრანსფორმაციაზე

თქვენი ბიზნესის ტრანსფორმაცია საშუალო რგოლის მენეჯერებმა უნდა წარმართონ