თანამედროვე სამყაროს მუდმივად ცვალებადი, მაგრამ ამასთან, ამაღელვებელი თამაშის წესები აქვს. ბრენდებს ამ წესებთან ადაპტაციაში და თვითგადარჩენაში, ტრადიციულ მარკეტინგულ მიდგომებთან ერთად, ციფრული სამყაროს ტენდენციების გათვალისწინება ეხმარება. რომელი მიდგომებია დღეს ტრენდული და მზარდი? – ალბათ, არ გაგიკვირდებათ თუ ინფლუენსერ-მარკეტინგს ვახსენებთ და მის მნიშვნელობაზე მეტს ვისაუბრებთ. 2020 წლისთვის ბრენდებმა 65%-ით გაზარდეს ბიუჯეტი ამ მიმართულებით, 2021 წლის ბიუჯეტი კი კიდევ უფრო მზარდია.
მარტივად რომ ავხსნათ, ინფლუენსერი არის ადამიანი, რომელსაც სხვებზე გავლენის მოხდენა შეუძლია. კიდევ უფრო თუ დავწვრილმანდებით და ინფლუენსერ-მარკეტინგს ჩავეძიებით: დავუშვათ, ლუკას ჰყავს 100 000 მეგობარი და მას ენდობიან, მისი აზრი მეგობრებისთვის მნიშვნელოვანია. თუ ლუკა თავის მეგობრებს ჩვენს ბრენდზე მოუყვება, პროდუქტით დაინტერესების შანსი უფრო მაღალი იქნება, ვიდრე იმ შემთხვევაში, როცა ამ პროდუქტზე ჩვენ თვითონ მოვუყვებით. თუ ლუკას ბრენდის პოპულარიზაციისთვის გამოვიყენებთ – ის ჩვენი ინფლუენსერი, ეს კოლაბორაცია კი ჩვენი მარკეტინგული სტრატეგიის ნაწილი იქნება.
გამოდის ყველას შეუძლია ინფლუენსერობა, რადგან ყველას ჰყავს მეგობრები? – თან – კი და თან – არა. ამ შემთხვევაში საქმე ეხება რაოდენობას, ანუ რამდენ ადამიანს შეგიძლიათ მისწვდეთ და რამდენად გენდობა თქვენი აუდიტორია.
დავიწყოთ რაოდენობის განხილვით და გამოვყოთ ინფლუენსერების ქვეკატეგორიები. ნანო ინფლუენსერი – 10 000 მიმდევარი ან ნაკლები; მიკრო ინფლუენსერი – 10 000-დან 100 000-მდე მიმდევარი; მაკრო ინფლუენსერი – 100 000-დან 1 მილიონამდე მიმდევარი; მეგა ინფლუენსერი – 1 მილიონიდან და ზევით მიმდევრები. რაც შეეხება ნდობას და ინფლუენსერის ბუნებრივად გამოყენებას, მოდით, ინფლუენსერ-მარკეტინგის სტრატეგია Saatchi & Saatchi Tbilisi-ს წარმომადგენელთან ერთად განვიხილოთ.
რა უნდა გავითვალისწინოთ ინფლუენსერ-მარკეტინგის გამოყენებისას?
ნინუცა მეგრელიშვილი (სენიორ ექაუნთ მენეჯერი): რასაც არ უნდა ვაკეთებდეთ, სტრატეგიული ხედვა და მოვლენების წინასწარ ჭვრეტა ყველაზე მნიშვნელოვანია. რა არის კამპანიის მიზანი? – უნდა ვიცოდეთ რისი მიღწევა გვსურს ინფლუენსერების კამპანიაში ჩართვით. მიზნები რაც უფრო მკაფიო და რიცხვებში გამოხატული იქნება, მით უფრო გაგიმარტივდებათ ცხოვრება. არ დაისახოთ მიზნად ის, რის გაზომვასაც ვერ შეძლებთ.
ვისზე გსურთ გავლენის მოხდენა და როგორ გსურთ ინფორმაციის მიწოდება?
ინფლუენსერის სწორად შესარჩევად, აუცილებელია, გაიგოთ ვინ არის სამიზნე აუდიტორია და ვისთვის გსურთ ხმის მიწვდენა. რელევანტურობა საკვანძო ელემენტია, თქვენი სათქმელი ბუნებრივად და საინტერესოდ უნდა ჩაჯდეს კონტექსტში. ვისი გამოყენება გსურთ ინფლუენსერად? – პატარა ბაზარზე ისეთი ინფლუენსერის მოძიება, რომელიც კონკურენტს არ გამოუყენებია, საკმაოდ რთულია. მნიშვნელოვანია ეს ადამიანი იმ სფეროსთან იყოს ახლოს, რომელზეც გვსურს რომ ისაუბროს.
ამ პროცესში სააგენტოს ძალიან დიდი როლი აქვს, რადგან შეუძლია, ყველა იმ დეტალზე იფიქროს, რომელიც იდეალური თანამშრომლობისთვისაა საჭირო. სააგენტო ზრუნავს როგორც კლიენტის კმაყოფილებაზე, ისე ინფლუენსერის და წარმატებულ „შეთამაშებას“ საბოლოოდ სწორედ ეს რგოლი განსაზღვრავს.
რა მიდგომებია ინფლუენსერ-მარკეტინგის მიმართულებით საქართველოში?
საქართველოში ინფლუენსერების რიცხვი თანდათან იმატებს და განსაკუთრებით აქტუალური პანდემიის პერიოდში გახდა. სფეროების მიხედვით რომ განვიხილოთ, ყველაზე მეტად კულინარიის, ჯანსაღი ცხოვრების, ბიუთი-ბლოგერები ჭარბობს. პოპულარობის მიხედვით, ჩვენი გამოცდილებით, მოგზაურობის თემაა ერთ-ერთი გამორჩეული და მომხმარებლისთვის საინტერესო.
რაც შეეხება თანამშრომლობის პროცესს და სტრუქტურას, ინფლუენსერი ეცნობა ბრენდის სტრატეგიას, მაგრამ შემოქმედებითი მიდგომა კონტენტის განთავსებისას მასზეა დამოკიდებული. შესაძლოა, ბრენდს კონკრეტული ქმედების მოთხოვნა ჰქონდეს ინფლუენსერთან, თუმცა, აღსრულება, პროდაქშენი და სხვა დეტალები უშუალოდ ინფლუენსერზეა დამოკიდებული. სააგენტოს როლი ამ პროცესში არის ინფლუენსერთა ბაზების მუდმივი განახლება, კლიენტისთვის მათ კამპანიაზე თუ ბრენდზე მორგებული ინფლუენსერების შეთავაზება, კამპანიაში მათი ინტეგრაციის გზების განსაზღვრა და შემდეგ, თანამშრომლობის უზრუნველყოფა. ეს პროცესი საკმაოდ შრომატევადია და თითოეული ბრენდისთვის ინდივიდუალურად ვადგენთ სტრატეგიას, კამპანიაზე მორგებულ ინფლუენსერსაც დიდი რუდუნებით ვარჩევთ. როცა ბრენდის ნაცვლად, კონკრეტული პიროვნება ესაუბრება მომხმარებელს, მეტი სიფრთხილე და ოქროს შუალედის დაცვაა საჭირო.
გაგვიზიარეთ თქვენი, როგორც ინფლუენსერის გამოცდილება
გიორგი დანელია: წლების წინ, როდესაც იუთუბზე ვიდეოების ატვირთვა დავიწყე, არც მიფიქრია, რომ ოდესმე „ინფლუენსერი“ გავხდებოდი და დღესაც მგონია, რომ ეს სიტყვა არ გამოხატავს იმას, რასაც მე ყოველდღიურად ვაკეთებ. ჩემთვის მნიშვნელოვანია, რომ შევქმნა ისეთი კონტენტი, რომლის დახმარებითაც ადამიანებს ჩემს შთაბეჭდილებებს, ემოციებს და გამოცდილებას გავუზიარებ – სხვა ყველაფერი კი ამ პროცესის „გვერდითი ეფექტია“.
როდესაც ათობით ათასი ადამიანი თვალს გადევნებს, რა თქმა უნდა, შენს აზრს ან ქცევას მათზე დიდი გავლენა შეიძლება ჰქონდეს, მაგრამ ეს ჩემი თვითმიზანი არასდროს ყოფილა. ამ პოზიციაში ყოფნა დიდი პრივილეგიაა და ამავდროულად, დიდი პასუხისმგებლობაც, რაც ბოლომდე გაცნობიერებული მაქვს.
ვერ ვიტყვი, რომ ყველა ბრენდთან ერთნაირი გამოცდილება მქონდა: არსებობენ ბრენდები, რომლებიც პატივს სცემენ კონტენტ კრეატორის შეხედულებებს და გემოვნებას, მაგრამ სამწუხაროდ ხშირად ყოფილა ისეთი შემთხვევაც, როდესაც ბრენდი სარეკლამო ბანერად აღგიქვამს და ჰგონია, რომ მხოლოდ მას უნდა მოერგო. საერთაშორისო ბრენდებთანაც ხშირად ვთანამშრომლობ და მთავარი განსხვავება ის არის, რომ მათ პირველივე წამიდან ზუსტად იციან, რა უნდათ, რაც თანამშრომლობის პროცესს ძალიან ამარტივებს.
პირველ რიგში, სანამ ბრენდთან თანამშრომლობას დაიწყებ, აუცილებელია მკაფიოდ უნდა გქონდეს გამოხატული შენი ღირებულებები და ფასეულობები, რათა ბრენდს არასწორი მოლოდინები არ შეექმნას. თუ შენი ღირებულებები ბრენდის ღირებულებებს ემთხვევა, მაშინ კოლაბორაცია ბევრად უფრო მარტივი და საინტერესო ხდება.
[R]
