გაუსაძლისი სიცხე ალბათ თქვენც განდომებთ, სახლის გარეთ ცხვირი არ გაყოთ.. ჰო, ნამდვილად ჩამოცხა და სანამ ივნისი სიცხით ზედმეტად გვანებივრებს, ღონისძიებათა ორგანიზატორები, ცდილობენ, სულ უფრო კარგი საღამოები შესთავაზონ საზოგადოებას – სწორედ ისეთი, სახლიდან რომ გამოგიყვანთ. მაშ ასე, Marketer.ge ტრადიციულად გთავაზობთ უახლოეს და გემოვნებიან ღონისძიებებს:
Art Weekend 2019
7, 8 და 9 ივნისს კახა ბენდუქიძის საუნივერსიტეტო კამპუსში ტრადიციული Art Weekend ტარდება, რომელსაც უკვე მეხუთე საიუბილეო წელი უსრულდება. 3 დღის განმავლობაში საშუალება გექნებათ, საინტერესო ლექციები მოისმინოთ საინტერესო ადამიანებისგან (ლევან გიგინეიშვილი, ანა კორძაია-სამადაშვილი, დათო გორგილაძე და ა.შ). ასევე, შეგეძლებათ, ეზიაროთ სასიამოვნო მუსიკას და დადებითი ემოციებით დაბრუნდეთ სახლში. ღონისძიების პარალელურად გაიმართება გიორგი დადიანის ფოტოგამოფენაც. დასწრება თავისუფალია.
ქართული სახვითი ხელოვნების მუზეუმმა 31 მაისსა და 3 ივნისს „The New Generation Music Festival“– ის ორ კონცერტს უმასპინძლა. დასკვნითი, მესამე კონცერტი გაიმართება 7 ივნისს, საღამოს 8-ის ნახევარზე, შემდეგ კი ფესტივალის მონაწილეები გადაინაცვლებენ „პუბლიკაში“ და თქვენ გექნებათ საშუალება გაატაროთ საღამო მათთან ერთად. დეტალური ინფორმაციისთვის იხილეთ ბმული.
პარასკევს, 7 ივნისს Mtkvarze, მთავარ ოთახში მონრეალის ანდერგრაუნდ სცენის წარმომადგენელი
Project Pablo დაუკრავს. Project Pablo-ს მუსიკა კანადის ანდერგრაუნდ სცენის განმსაზღვრელ ჟღერადობას წარმოადგენს. მასთან ერთად კლუბის მთავარ ოთახში დაუკრავენ Kraumur და Hatsvali / HTSVL. სმოლ რუმში კი ლოკალური სცენის არტისტები Gio Shengelia და Ash Scholem მთელი ღამის განმავლობაში დაუკრავენ. ბილეთების შესაძენად ეწვიეთ Mtkvarze-ს ოფიციალურ საიტს.
თუკი ქართული სიმღერები მოგენატრათ, გაქვთ საშუალება, 7 ივნისს, 21:00 სთ-ზე Otium-ში ცნობილ ქართულ ჯგუფს “შვიდკაცას” მოუსმინოთ. საღამოს დასასრულს კი მსმენელს DJ BACHO ელის. ბილეთის ფასი 40 ლარია. სხვა დეტალების სანახავად ეწვიეთ ბმულს.
7 ივნისს კლუბი BASSIANI ბერლინელ პროდიუსერს და დიჯეის, ლეიბლ NAIF RECORDS-ის დამფუძნებელს, DIAL RECORDS-ის ერთ-ერთ მთავარ სახეს და კლუბ BERGHAIN-ის რეზიდენტ, EFDEMIN-ს უმასპინძლებს. HOROOM კი TELEPHONES, იგივე HENNING SEVERUD-ს უმასპინძლებს, რომელიც 2010 წლიდან აქტიურად გამოსცემს მუსიკას. ბილეთების შესაძენად ეწვიეთ ბასიანის ოფიციალურ საიტს.
8 ივნისს Backstage76-ში 2016 წელს ჩამოყალიბებული ჯგუფის “პანიკა” საღამო გაიმართება. ჯგუფი შემდეგ ჟანრებში მოღვაწეობს: პოპ პანკი; იმო; ინდი როკი. პანიკა შეასრულებს როგორც ძველ ასევე ახალ სიმღერებს. ბილეთის ფასი 7 ლარია.
ვაგონშემკეთებელ ქარხანაში 8 ივნისს მსმენლის წინაშე ცნობილი ქართული ჯგუფი “მგზავრები” წარსდგება. მგზავრები შეასრულებენ სიმღერებს როგორც ძველი, ასევე ახალი ალბომებიდანაც. ღონისძიება 20:00 სთ-ზე გაიხსნება, უშუალოდ საღამო კი 22:00 სთ-ზე დაიწყება. ბილეთების შესაძენად ეწვიეთ ბმულს.
12 ივნისს 20:00 სთ-ზე თბილისის სახელმწიფო კონსერვატორია ყველასათვის საყვარელ ქართველ მომღერალს, მანანა მენაბდეს უმასპინძლებს. მანანა მენაბდე ერთ-ერთ პირველ ქართველ ავანგარდისტი ქალია ქართულ მუსიკალურ სამყაროში, რომელიც მრავალი ქვეყნის სცენაზე ქართული სიტყვისა და მუსიკალური ტრადიციების პროპაგანდას ათეული წლების განმავლობაში ეწეოდა. საღამოზე დასწრების მსურველებს ბილეთების შეძენა შემდეგ ბმულზე შეგეძლებათ.
