ბოლო წლებში ონლაინ მედიის გააქტიურებას სარეკლამო კამპანიების სატელევიზიო სივრციდან სოციალურ მედიაში გადანაცვლება მოჰყვა. მსგავსი ტენდენცია გამოიკვეთა სადაზღვეო კომპანიების მარკეტინგულ სვლებშიც. ალბათ ბევრს ახსოვს „ალდაგსა“ და„ჯი-პი-აი“-ს ვიდეორგოლები, რექსისა და ლაბრადორის დაპირისპირებით. ამ ეტაპზე კი, სადაზღვევო კომპანიები უფრო მეტ ყურადღებას აქცევენ სოციალურ მედიაში გააქტიურებას, რაც ნაკლები დანახარჯით მომხმარებელთან უფრო მეტი ინტერაქციის საშუალებას იძლევა .
„ჯი–პი–აი ჰოლდინგის“ სატელევიზიო კამპანიების ინტენსივობის შემცირება კომპანიის სტრატეგიის შეცვლამ განაპირობა. მარკეტინგული კომუნიკაციების დეპარტამენტის უფროსის, თინათინ სტამბოლიშვილის თქმით, ძირითადი აქცენტი გადატანილია ახალი პროდუქტის განვითარებაზე: – „ვფიქრობ, სატელევიზიო ვიდეოების კონკურენციით კარგი მარკეტინგული ნაბიჯი გადავდგით და ცხადია, ეს ზრდის კომპანიების პოპულარობასა და ცნობადობას. იმის შემდეგ რამდენიმე საკომუნიკაციო აქცია გვქონდა, თუმცა უფრო ონლაინ პორტალის პრომოუშენზე გადავედით.“
ბოლო ორი წელია, რაც სადაზღვეო კომპანია „ალდაგმა“ ყველანაირი რესურსი მიმართა სოციალური მედიისკენ. „ალდაგის“ PR მენეჯერი თიკო გოფოძეც დადებითად აფასებს ვიდეორგოლების კონკურენციას, თუმცა აცხადებს, რომ სამომავლო გეგმებიდან გამომდინარე, კომპანია სატელევიზიო რეკლამებით აღარ იაქტიურებს: -„ამ ეტაპზე გავაქტიურდით სოციალური მედიის კუთხით. იმისათვის რომ მომხმარებელმა ინფორმაცია სწრაფად მიიღოს, ეს ყველაზე ხელმისაწვდომი გზაა, რაც საკმაოდ მომგებიანია ჩვენთვის.
სარეკლამო სააგენტოებში Windfor’s, რომელმაც„ჯი-პი-აი“-ს რექსის რეკლამა გადაიღო და JWT Metro, რომელიც ალდაგის სარეკლამო რგოლებზე მუშაობდა, ამბობენ, რომ ბოლო წლებში არა მარტო სადაზღვევო, არამედ ყველა სხვა კომპანიამაც გადაინაცვლა ციფრულ ბაზაზე. თუმცა, როდესაც კომპანიას უნდა რაიმე ახალი ბრენდის დამკვიდრება, ან პროდუქტზე საყოველთაო ცნობადობის შექმნა, ამ დროს სატელევიზიო რეკლამა შეუცვლელია.
Windfor’s-ის კლიენტებთან ურთიერთობის მენეჯერის თამარ ცინცაძის თქმით, კონკრეტული შეთავაზების ფრომოუშენისთვის და სამიზნე აუდიტორიასთან სასაუბროდ კარგია ინტერნეტ კამპანიები, რადგან სატელევიზიო რეკლამები უფრო ფართო საზოგადოებისთვისაა განკუთვნილი: -„2 წლის წინ ყველა აქტიურ ფაზაში იყო და ისეთი საერთო ფონი შეიქმნა, რომ სადაზღვევო სფეროში მარკეტინგს დიდ ყურადღებას უთმობდნენ. ამ ეტაპზე კი, სოციალურ მედიაში გადასვლას ამჯობინებენ, რადგან ამ ერაში ყველაფერი ციფრულდება და მომხმარებლისთვისაც უფრო მარტივი და ხელმისაწვდომია.“
JWT Metro-ს კრეატივ მენეჯერის, ეკა ყიფიანის აზრით, კონკურენცია ყოველთვის უნდა არსებობდეს: -„როცა კონკურენტს საკმაოდ ხმამაღალი საიმიჯო კამპანია აქვს და მასზე ბევრს საუბრობენ, თუ შენც არ გამოიჩინე თავი, ყველას მიავიწყდები. ეს არ ნიშნავს იმას, რომ ბრენდებს შორის ბრძოლა ყოველთვის გრძელდება. სხვა შემთხვევაში ისინი ერთად ავითარებენ თავიანთ ინდუსტრიას. სოციალური მედიის აქტივობას რაც შეეხება, ეს სარეკლამო აქტივობის თანმდევი პროცესია.“
2 წლის წინ, სარეკლამო კამპანიაში სადაზღვევო ჯგუფი „ირაოც” იყო ჩართული. მარკეტინგის დეპარტამენტის უფროსის, ნანა შონიას თქმით, სარეკლამო რგოლის შემუშავების მიზეზი იყო ახალი პროდუქტის განსაკუთრებული თვისებების ფართო აუდიტორიისთვის გაცნობა: -„მას მერე გვაქვს სოციალური კამპანიები. ჩვენი პროდუქტის თვისებებიდან და პროდუქტის განსხვავებულობიდან გამომდინარე, მომხმარებელთან საჭირო იყო ინტერაქტიული კომუნიკაცია. სოციალური მედიის საშუალებით კი, კლიენტთან ურთიერთობა უფრო ეფექტიანია.“
კომპანიების სოციალური მედიაზე ორიენტირების პოპულარობა ნაკლებმა დანახარჯებმა და მომხმარებელთანკომუნიკაციის ეფექტიანობამ განაპირობა. დღეისთვის ასეთი პრაქტიკა დაინერგა არა მხოლოდ სადაზღვეო კომპანიების ჭრილში, არამედ ბევრ სხვა კომპანიაშიც, პროდუქტის ხარისხიანობის გაზრდის პროცესში. თუმცა, უფრო ცოცხალ კონკურენციას მონატრებული საზოგადოებისთვის ცუდი არ იქნებოდა ახალი რექსის, ლაბრადორისა, ან„ცუდი“ მძღოლი თამაზის პერიოდული გამოჩენა სატელევიზიო ვიდეორგოლებში.
