პანდემიით გამოწვეულმა არაორდინალურმა გარემომ სხვადასხვა სახელმწიფო ინსტიტუტის, მედია საშუალებისა თუ ბიზნესის სფეროს წარმომადგენლის შესახებ, ჩვენი წარმოდგენები შეცვალა. იმას, თუ როგორ მოქმედებს ორგანიზაცია კრიზისის დროს, შეუძლია გაზარდოს, შეამციროს ან სრულად გააქროს ჩვენი ნდობა მის მიმართ. ეს მხოლოდ კონკრეტულ წარმომადგენლებს არ ეხება, საზოგადოების აზრი მუდმივი ფორმირების პროცესშია სრული სექტორის მიმართაც. მაგალითად, აშშ-ში უკვე ოთხი წელია ყველაზე სანდო ბიზნესის სფეროა. ამას ადასტურებს მსოფლიოს წამყვანი ფირმა აუდიტორულ და საკონსულტაციო მომსახურების სფეროში – PwC-ის თანახმად, საზოგადოების 63% ენდობა ამერიკულ კომპანიებს.
Harvard Business Review-ის (HBR) გამოკითხვის თანახმად, ბიზნესის ეს მხარდაჭერა, ნაწილობრივ, პანდემიით გამოწვეული პროცესების შედეგიცაა. კომპანიების მხრიდან გამოხატული ზრუნვა სამუშაო გარემოს უსაფრთხოებაზე, ვაქცინების სწრაფ წარმოებაზე ორიენტირება, ხელფასების ზრდა, სესხების გაცემა, ქველმოქმედება და სხვა მოქმედებები, რომლის განხორციელებაც კომპანიებს კრიზისის დადგომასთან ერთად მიეცათ,ზრდის ნდობას მათ მიმართ. თუმცა, გარდა ფორსმაჟორულ სიტუაციაში გადადგმული ნაბიჯებისა, ბიზნესის ნდობას სხვა ფაქტორებიც აყალიბებს. მაგალითად, საზოგადოება უფრო ენდობა კომპანიებს, რომელიც ორიენტირებულია გარემოსდაცვით საკითხებზე ან სოციალური პრობლემების აღმოფხვრაზე. ადამიანს სჭირდება იცოდეს, რომ თავისი ფული არ დაიხარჯება პლანეტის საზიანოდ, რომ კომპანია ხელმძღვანელობს მისი ღირებულებების შესაბამისად.
თუმცა საზოგადოების მხრიდან გამოცხადებულ ნდობას, კომპანიები, ხშირად ბოროტად იყენებენ. ჩვენ ვუზიარებთ პერსონალურ ინფორმაციას ამა თუ იმ ორგანიზაციას რადგან გვჯერა, რომ ეს მონაცემები პასუხისმგებლიანად იქნება გამოყენებული. მიუხედავად ამისა, დარღვევები ამ მიმართულებით, ყოველდღიურად ხდება.
HBR-ის გამოკითხვის თანახმად, არსებობს 4 ძირითადი საკითხი რაზეც კომპანიები და მომხმარებლები ერთხმად აცხადებენ, რომ ნდობისთვის აუცილებელია.
- მონაცემთა დაცვა და კიბერუსაფრთხოება
- კარგი მოპყრობა მომხმარებელთან
- ეთიკური ბიზნეს პრაქტიკა
- შეცდომების სწრაფად და გულწრფელად აღიარება
არსებობს ცდომილებებიც, სადაც ორგანიზაცია და ხალხი პრიორიტეტებს სხვადასხვანაირად ალაგებს. მაგალითად, გამოკითხვა გვიჩვენებს, რომ ადამიანებს სჭირდებათ ხელმძღვანელობის ზედამხედველობა, მათი მხრიდან ანგარიშვალდებულების გაცნობიერება და მისი კონკრეტულ ქმედებებში ასახვა, მათ შორის დაშვებულ შეცდომებზე სწრაფი და ეფექტური რეაგირება. თუმცა გამოკვლეულ კომპანიათა უმეტესობას, არ ჰყავს მაღალი რგოლის მენეჯერი, რომელიც ამას უზრუნველყოფს – ძირითადად ეს, ყველა მმართველ პოზიციაზე თანაბრადაა გადანაწილებული, რაც საბოლოოდ, ცუდ გავლენას ახდენს მომხმარებლის ნდობაზე.
ამდენად, საზოგადოების ნდობის მოსაპოვებლად კომპანიების მხრიდან, კონკრეტული ნაბიჯების გადადგმას მოითხოვს. ამისთვის, მხოლოდ პიარ კამპანია საკმარისი არაა. გთავაზობთ 3 ფაქტორს, რომელთა ხალხის ნდობის მოპოვებაში დაგეხმარებათ.
სანდო და გამჭვირვალე იმიჯზე ზრუნვა
ბიზნესლიდერებმა უნდა ჩამოაყალიბონ მკაფიო სტრატეგია ნდობისა და გამჭვირვალობის კულტურის ასაშენებლად. ამისთვის აუცილებელია მუდამ ჩააბაროთ ანგარიში – დაინტერესებულმა მხარეებმა, მათ შორის თანამშრომლებმა, ისევე როგორც ფართო საზოგადოებამ, უნდა იცოდეს, რომ კომპანია სერიოზულად ზრუნავს, თანასწორი, მრავალფეროვანი და ინკლუზიური გარემოს შექმნაზე. ორგანიზაციამ უნდა აჩვენოს, რომ პასუხისმგებლობით ეკიდება ნებისმიერ საკვანძო საკითხს და ამასთან დაკავშირებით დასამალი არაფერი აქვს.
აცნობეთ საზოგადოებას რატომ იღებთ დიდ გადაწყვეტილებებს
როცა საფუძვლიანი ცვლილებები ხდება, ეს მომხმარებლისთვის, რომელიც ძველ მოწყობაზეა ადაპტირებული, დისკომფორტს იწვევს. ნდობის შესანარჩუნებლად, აუცილებელია ყველას აცნობოთ არა მხოლოდ „რა“, არამედ – „რატომ“. მომხმარებელმა, თანამშრომლებმა, მარეგულირებელმა ორგანოებმა, ანალიტიკოსებმა და სხვა ნებისმიერმა დაინტერესებულმა მხარემ, რაც შეიძლება სწრაფად, მარტივად და საფუძვლიანად უნდა მიიღოს ინფორმაცია, რამ გამოიწვია მნიშვნელოვანი ცვლილება.
პასუხისმგებლობის აღება შეცდომებზე
შეუძლებელია ფუნქციონირება შეცდომების გარეშე. როგორი ძლიერი მექანიზმებითაც არ უნდა ხელმძღვანელობდეთ და რამდენად მკაცრი მაკონტროლებელი სისტემაც არ უნდა შექმნათ, შეცდომების დაშვება მაინც პროცესის განუყოფელი ნაწილი იქნება. ეს თითოეულმა ადამიანმა კარგად იცის. ამდენად, ნუ ეცდებით კომპანიის უშეცდომოდ წარმოჩენას – მაინც არავინ დაგიჯერებთ! სჯობს, დაშვებული შეცდომები ნდობის გასაძლიერებლად გამოიყენოთ და მომხმარებელს მათზე სწრაფი და ეფექტური რეაგირება, ასევე, სამომავლოდ მსგავსი შემთხვევების პრევენციის თქვენებური ხედვა აჩვენოთ.
წყარო: HBR
