Schweppes გაზიან სასმელებს იმ დროიდან აწარმოებს, როდესაც აშშ-ს ჯერ კიდევ პრეზიდენტიც კი არ ჰყავდა. 243-წლიანი ისტორიის შემდეგ ბრენდი მასშტაბურ განახლებას იწყებს, რათა თანამედროვე მომხმარებლებს შეახსენოს, რომ სწორედ ის ქმნიდა ამ კატეგორიის საფუძვლებს გაცილებით ადრე, ვიდრე გაზიანი სასმელები პოპულარული გახდებოდა.
ბრენდმა წარადგინა გლობალური რებრენდინგი, რომელიც ახალი პლატფორმის “With Time Comes Taste” („გემოვნება დროსთან ერთად მოდის“) – გარშემო არის აგებული. ეს სლოგანი ერთდროულად უსვამს ხაზს Schweppes-ის მრავალსაუკუნოვან ისტორიას და ბრენდის ახალ პოზიციონირებას თანამედროვე სასმელების ბაზარზე. განახლება მოიცავს ახალ ვიზუალურ იდენტობას, ახალ ბრენდამბასადორს, სახელად კლაივს და მასშტაბურ აქტივობებს დიდ ბრიტანეთში, მათ შორის Piccadilly Circus-ზე, Royal Ascot-სა და Queen’s Club Championships-ზე.
Schweppes 1783 წელს დააარსა იაკობ შვეპემ, რომელსაც ხშირად მიაწერენ გაზიანი წყლის ბოთლებში ჩამოსხმის პირველი კომერციულად წარმატებული მეთოდის შექმნას. ამ ინოვაციამ მნიშვნელოვანი როლი ითამაშა თანამედროვე გამაგრილებელი სასმელების ინდუსტრიის ჩამოყალიბებაში და საფუძველი ჩაუყარა ბიზნესს, რომელიც მოგვიანებით ტონიკების, მიქსერებისა და ცქრიალა სასმელების სინონიმად იქცა.
იმ დროს, როდესაც ბაზარზე ჯერ არც ენერგეტიკული სასმელები, არც ველნეს-პროდუქტები და არც ფუნქციური სასმელები არსებობდა, Schweppes უკვე აქტიურად უწევდა პოპულარიზაციას გაზიან მინერალურ წყალს მისი გამაჯანსაღებელი თვისებების გამო. ბრენდი მეცნიერებასა და განახლებულ ენერგიას აერთიანებდა ისე, რომ ეს მიდგომა დღესაც თანამედროვე ჩანს.
მე-19 საუკუნეში Schweppes-მა გავლენა კიდევ უფრო გააფართოვა. 1870 წელს წარმოდგენილმა Indian Tonic Water-მა, რომელიც ქინინსა და გაზიან წყალს აერთიანებდა, მიქსების კატეგორიის ერთ-ერთ ყველაზე მნიშვნელოვან პროდუქტად დაიმკვიდრა თავი. სამეფო ორდენის მიღებამ კი ბრენდის რეპუტაცია კიდევ უფრო გააძლიერა და Schweppes ბრიტანული სასმელების კულტურის განუყოფელ ნაწილად აქცია.
თუმცა დღეს მომხმარებლის ყურადღების მისაპყრობად მხოლოდ ისტორია უკვე საკმარისი აღარ არის. ბოლო წლებში გაზიანი სასმელებისა და უალკოჰოლო ალტერნატივების პოპულარობის ზრდამ Schweppes იმავე კატეგორიაში დააბრუნა კონკურენციის პირობებში, რომლის შექმნაშიც თავად მიიღო მონაწილეობა. სწორედ ამიტომ კომპანიამ გადაწყვიტა, გადაეხედა, თუ როგორ წარდგებოდა ბრენდი თანამედროვე მომხმარებლის წინაშე.
რებრენდინგის პროცესში დიზაინერებმა ბრენდის ისტორიულ არქივებს მიმართეს და საფუძვლად ძველი ტიპოგრაფია, ილუსტრაციები და ვიზუალური ელემენტები გამოიყენეს. განახლებული იდენტობა მოიცავს საფირმო ზაფრანისფერ ყვითელს, მე-18 საუკუნის სერიფული შრიფტებით შთაგონებულ ახალ ლოგოსა და შადრევნის სიმბოლოს განახლებულ ვერსიას, რომელიც 1851 წლის Great Exhibition-ის ვიზუალურ მასალებზეა დაფუძნებული. დეკორატიული ორნამენტები, მონოგრამები და გრაფიკული ელემენტები ხაზს უსვამს იდეას, რომ ოსტატობა და ხარისხი დროთა განმავლობაში იხვეწება.
განახლების ერთ-ერთი მთავარი სიახლეა ლეოპარდი „კლაივი”, რომელიც Schweppes-ის ბრენდინგში ჯერ კიდევ 1999 წლიდან არსებობდა, თუმცა აქამდე შედარებით მეორეხარისხოვან როლს ასრულებდა, ახლა კი ბრენდის მთავარ ამბასადორად იქცა.
ეს ტრანსფორმაცია სასმელების მოხმარების ჩვევების ცვლილებასაც ასახავს. სულ უფრო მეტი მომხმარებელი ინტერესდება პრემიუმ უალკოჰოლო სასმელებით, მოხმარების კულტურითა და ისეთი გამოცდილებებით, რომლებიც განსაკუთრებულ შეგრძნებებს ალკოჰოლის გარეშეც ქმნის. Schweppes მიიჩნევს, რომ მისი ისტორია, ცნობადობა და პრემიუმპოზიციონირება ამ ტენდენციების ფონზე მნიშვნელოვან კონკურენტულ უპირატესობას წარმოადგენს.
განახლებული ვიზუალური იდენტობა უკვე გამოჩნდა დიდ ბრიტანეთსა და სამხრეთ აფრიკაში, სადაც რებრენდინგის პირველი ეტაპი 2025 წლის დეკემბერში დაიწყო. 2026 წლის განმავლობაში კი Schweppes-ის ახალი სახე ეტაპობრივად ლათინურ ამერიკაში, აღმოსავლეთ ევროპასა და აზიაშიც გავრცელდება. პროექტზე მუშაობდნენ დიზაინსააგენტოები JKR, Studio.One და Mischief.
