მომხმარებლები ბრუნდებიან, ნელ-ნელა აქტიურდება პირადი შეხვედრები. შეკვეთები პანდემიამდელი მაჩვენებლებისკეენ მიიწევენ. ოფისები ეტაპობრივად ივსება თანამშრომლებით, ბავშვები – სასკოლო სეზონისთვის ემზადებიან, საფონდო ბირჟა ზრდას განაგრძობს – ასეთია მდგომარეობა აშშ-ში, სადაც აქტიური ვაქცინაცია მიმდინარეობს. წინააღმდეგობის მიუხედავად, ეს პროცესი პროგრესირებს, თუმცა მომხმარებლების მოლოდინი მნიშვნელოვნად სცდება კომპანიების შემოთავაზებებსა და მომსახურების მიდგომებს. ყოველივე ეს, მეტწილად, პანდემიამდელი სერვისის მოთხოვნითაა განპირობებული – მომხმარებელს ყველაფერი მომენტალურად სურს. მიუხედავად იმისა, რომ პანდემიის დასაწყისში, საზოგადოება ბიზნესის მიმართ ბევრად ტოლერანტული და თანამგრძნობიარე იყო, ახლა ეს ბევრად გართულდა, რადგან პროდუქტებზე, სერვისებზე, უძრავ ქონებასა თუ ჯავშნებზე მოთხოვნა მნიშვნელოვნად გაიზარდა. ავიაკომპანიების მგზავრები აგრესიულად იქცევიან, ცდილობენ მაქსიმალურად მიიღონ ის, რაშიც გადაიხადეს ფული და სხვებისთვის არაფრის დათმობაზე არ თანხმდებიან. ეს ეგოიზმი კი, პირადი თავისუფლებით არგუმენტირდება.
მნიშვნელოვანია მზად იყოთ ამ ახალი გამოწვევებისთვის, თუკი გსურთ, რომ თქვენმა ბიზნესმა გზა გაიკვალოს. ამავდროულად, გაითვალისწინეთ, რომ ეს ფანჯარა სწრაფადიხურება. მეორე შანსი ნაკლებად მოგეცემათ. ყველა ჩქარობს, რომ რაც შეიძლება მეტი მოიპოვოს და გაიმყაროს პოზიციები. ყოველივე კი მარტივ ფორმულას უკავშირდება: კმაყოფილება, ესაა მოლოდინს გადაჭარბებული გამოცდილება. თუკი მომხმარებელთან ურთიერთობას პროდუქტის შეთავაზების ნაცვლად, ამბების მოყოლით ააწყობთ, ბევრად გაგიადვილდებათ სწორი მოლოდინების ჩამოყალიბება, შეიძენთ მუდმივ კლიენტებს, რომლებიც თქვენი ერთგულები გახდებიან.
მეორე მხრივ, თუკი მეტისმეტად ბევრს დაპირდებით ან ზედმეტად სწრაფად იმოქმედებთ, მიაწოდოთ ის, რასაც ადრე აწვდიდით, შესაძლოა, იმედი გაუცრუოთ. რთულ პერიოდებში ძნელია დააფასო საიმედო კონტაქტების მნიშვნელობა, როგორც კლიენტებთან, ასევე, წინა ხაზზე მომუშავე თანამშრომლებთან მიმართებაში. თანამშრომლის ბედნიერება ძალიან მნიშვნელოვანია, რადგან თქვენი მომხმარებლები ვერასოდეს იქნებიან თქვენს ყველაზე ნაკლებად ბედნიერ თანამშრომელზე კმაყოფილები.
საკვანძო წესები, რაც უნდა გახსოვდეთ:
ადამიანები ყიდულობენ ამბებს და არა ნივთებს. თქვენი ამბავი უნდა იყოს მათ მდგომარეობასთან და არსებულ რეალობასთან ახლო. კომპანიის გუნდი სათანადოდ უნდა იაზრებდეს ამ წესს და მიყვებოდეს ამ მიდგომას. დროთა განმავლობაში, დაიხვეწებით, თუმცა ახლა აუცილებლად უნდა იყოთ ყურადღებით – დაპირდით ნაკლებს და მიაწოდეთ მოლოდინზე მეტი. არ იჩქაროთ. გააკეთეთ შედარებით ცოტა საქმე, მაგრამ მაქსიმალურად ხარისხიანად.
ამბები – მძლავრი საშუალებაა მოიპოვოთ ლოიალობა და შეინარჩუნოთ კონტაქტები. თქვენი ამბავი უნდა იყოს მიმღებლობაზე, გაგებასა და მომხმარებელთა სურვილებისა და მოთხოვნილებების შეფასებაზე. მარტივი ასახსნელი უნდა იყოს, თუ როგორ აპირებთ გულწრფელი ურთიერთობითა და შრომისმოყვარეობით გაზრდას. აქციეთ ეს თქვენი მიდგომის განუყოფელ ნაწილად.
ნუ დაეყრდნობით მათემატიკურ გამოთვლებსა და ტექნოლოგიებს. დღევანდელ დღეს, როდესაც ყველას ერთი და იგივე ინსტრუმენტები აქვს, ეს ხელსაწყოები განსაკუთრებულ უპირატესობას ნაკლებად მოგცემთ. მნიშვნელოვანია, გული და გონება სწორად გქონდეთ მომართული, რათა ამბავი სათანადოდ გადმოსცეთ. ესაა დრო, როცა უნდა ესაუბროთ ადამიანებს. უსულო ტექნოლოგიების, სტატისტიკისა და ელექტრონული აღწერის დრო ახლა ნაკლებადაა და გულწრფელ კომუნიკაციას ვერაფერს შემატებს. ადამიანები ემოციურ გადაწყვეტილებებს რიცხვების მიხედვით არ იღებენ – მათ თქვენი ამბები უყვარდებათ.
წყარო: inc.
